نوشھروفيروز(مشتاق مري) عدالت پاران ناري جي اغوا واري درخواست ڪوڙي قرار، جوڙي کي تحفظ ڏيڻ جو حڪم. ٿرڊ ايڊيشنل سيشن جج سيد اڪرام الرحمان شاھ جي عدالت ۾ درخواستگذار علي گل سرگاڻي 491 تحت درخواست داخل ڪرائيندي موقف اختيار ڪيو ته ڪجھه عرصو اڳ ڪنڊيارو لڳ منهنجي ڳوٺ محمد پريل سرگاڻي ۾ اعجاز علي لاشاري، شاھ محمد، محمد رفيق، محرم علي، غلام مصطفيٰ، رياض حسين ۽ عبدالحڪيم ھٿيارن سميت داخل ٿي ھٿيارن جي زور تي منهنجي ڌي بي بي شمائلا سرگاڻي کي اغوا ڪري ويا آھن جڏھن ته ٺاروشاھ پوليس ناري کي بازياب نٿي ڪرائي. عدالت ۾ ڇڪايل ڌر جا وڪيل ايڊووڪيٽ عبدالوحيد شيخ ۽ سيد زاھد علي شاھ پنهنجي اصيلن پاران دليل ڏيندي چيو ته ناري بي بي شمائلا سرگاڻي پنهنجي پسند سان سکر جي عدالت ۾ اعجاز علي لاشاري سان پسند جو پرڻو ڪيو آھي جڏھن ته ساڳئي عدالت ۾ جوڙي پاران پنهنجي تحفظ جي لاءِ درخواست داخل ڪئي آھي زندگي کي خطري سبب اڄ به عدالت ۾ پيش نه ٿي سگهيا آھن. عدالت ۾ وڪيلن پسند جي شادي ڪندڙ جوڙي جي شادي ۽ تحفظ جا ڪاغذ پڻ پيش ڪيا. عدالت دليل ٻڌڻ بعد داخل ڪيل درخواست کي خارج ڪري ڇڏيو ۽ ايس ايڇ او ٺاروشاھ کي حڪم ڏنو ته جوڙي کي تحفظ فراھم ڪيو وڃي.
