ڪراچي (اسٽاف رپورٽر) سنڌ جي سائنس ۽ انفارميشن ٽيڪنالاجي کاتي سمورن صوبائي کاتن لاءِ تيار ڪيل پنهنجي نئين اي-پورٽل جو افتتاح ڪري ڇڏيو آهي۔ هي ڊجيٽل گورننس جو هڪ اهم منصوبو آهي، جنهن جو مقصد ٽيڪنالاجي، شفافيت ۽ عوام دوست سهولتن وسيلي سرڪاري خدمتن جي فراهمي کي جديد ۽ وڌيڪ مؤثر بڻائڻ آهي۔ اي-پورٽل جو افتتاح وڏي وزير جي خاص مددگار محمد علي راشد ڪيو۔ ان موقعي تي سائنس ۽ انفارميشن ٽيڪنالاجي کاتي جي سيڪريٽري ذوالفقار علي نظاماڻي، ميمبر آءِ ٽي، سنڌ آءِ ٽي ڪمپني (SITC) جي چيف ايگزيڪيوٽو آفيسر، کاتي جي ٻين سينيئر آفيسرن ۽ ٻين شخصيتن پڻ شرڪت ڪئي۔ تقريب کي خطاب ڪندي محمد علي راشد چيو ته هي پورٽل هڪ گڏيل ڊجيٽل پليٽ فارم طور ڪم ڪندو، جنهن جي ذريعي شهري مختلف سرڪاري خدمتن تائين آساني ۽ مؤثر انداز ۾ رسائي حاصل ڪري سگهندا۔ ان سان مختلف کاتن ۾ شفافيت ۽ جوابدهي کي پڻ هٿي ملندي۔ هن چيو ته سرڪاري معاملن ۾ شفافيت ۽ ڪارڪردگي جي بهتري، شهرين ۽ سرڪاري کاتن جي وچ ۾ تيز تر رابطن ۽ صوبي جي ڊجيٽل گورننس ۽ جدت بابت وسيع ويزن کي هٿي ڏيڻ ۾ هي پورٽل اهم ڪردار ادا ڪندو۔ هن وڌيڪ ٻڌايو ته اي-پورٽل کي اهڙي نموني سان تيار ڪيو ويو آهي جو شهري، ڪاروباري ادارا ۽ سرڪاري ملازم مختلف عوامي خدمتن، معلومات ۽ انتظامي معاملن تائين آن لائين ۽ آساني سان رسائي حاصل ڪري سگهن۔ هي قدم سنڌ حڪومت جي ڊجيٽل تبديلي، بهتر حڪمراني ۽ عوامي خدمتن جي آسان فراهمي بابت عزم جو عڪاس آهي۔ هن چيو ته هن پورٽل جو جاري ٿيڻ سنڌ کي هڪ جديد، ٽيڪنالاجي سان ڀرپور ۽ عوام دوست سرڪاري نظام ڏانهن وٺي وڃڻ ۾ هڪ اهم سنگِ ميل ثابت ٿيندو، جيڪو صوبي جي عوام کي وڌيڪ مؤثر ۽ وقت سر خدمتون فراهم ڪرڻ ۾ مددگار ثابت ٿيندو۔
