’مارڪيٽ ويليو‘ مائيڪرون، ميٽا ۽ ٽيسلا کان به اڳتي نڪري وئي

ڪراچي(ويب ڊيسڪ) ميموري چپس ٺاهيندڙ آمريڪي ڪمپني مائيڪرون ٽيڪنالاجي خميس ڏينهن پهريون ڀيرو مارڪيٽ ويليو جي لحاظ کان ميٽا ۽ مختصر وقت لاءِ ٽيسلا کي به پوئتي ڇڏي وئي. ان واڌ جو سبب ڪمپني جي مضبوط مالي اڳڪٿي هئي، جنهن مصنوعي ذهانت (AI) سان لاڳاپيل ان جي تيز ترقي کي وڌيڪ هٿي ڏني.
ڪمپني جا شيئر آخري واپاري سيشن دوران 18.4 سيڪڙو وڌي 1,236 ڊالر تائين پهچي ويا، جنهن سان ان جي مارڪيٽ ويليو 1.398 ٽريلين ڊالر ٿي وئي. ان جي مقابلي ۾ ميٽا جي مارڪيٽ ويليو 1.392 ٽريلين ڊالر هئي، جڏهن ته ٽيسلا جي مارڪيٽ ويليو تقريباً 1.4 ٽريلين ڊالر تي بيٺل هئي.
اربع ڏينهن مائڪرون پنهنجي چوٿين ٽه ماهي لاءِ آمدني ۽ منافعي بابت مضبوط اڳڪٿيون جاري ڪيون، جنهن کان پوءِ ڪمپني جا شيئر تازو آيل گهٽتائي مان ٻاهر نڪري آيا. ڪمپني اهو پڻ ظاهر ڪيو ته ان جي گراهڪن ميموري چپس جي فراهمي يقيني بڻائڻ لاءِ 22 ارب ڊالرن جا آرڊر ۽ واعدا ڪيا آهن.
مائڪرون 26 مئي تي هڪ ٽريلين ڊالر مارڪيٽ ويليو واري ڪلب ۾ شامل ٿي هئي. ان کان اڳ سامسنگ اليڪٽرونڪس به هن ڪلب ۾ شامل ٿي چڪي هئي. ميموري چپ ٺاهيندڙ ڪمپنين کي وڏي ٽيڪنالاجي ڪمپنين جي مصنوعي ذهانت تي وڏي پئماني واري خرچن مان فائدو ملي رهيو آهي.
مائڪرون، جيڪا اينويڊيا جي AI پروسيسرن لاءِ هڪ اهم فراهم ڪندڙ ڪمپني آهي، ميموري چپس جي کوٽ سبب خاص فائدو حاصل ڪري رهي آهي.
هي ڪمپني آمريڪا ۾ واحد ميموري چپ ٺاهيندڙ آهي جيڪا هاءِ بينڊوڊٿ ميموري (HBM) چپس ٺاهي ٿي، جيڪي اينوڊيا جي AI پروسيسرن سان گڏ استعمال ٿينديون آهن. انهن چپس جي طلب ڪمپني جي پيداواري صلاحيت کان گهڻو وڌيڪ آهي، جنهن سبب مائڪرون ۽ ان جون حريف ڪمپنيون SK Hynix ۽ سامسنگ اليڪٽرونڪس پنهنجن شين لاءِ وڌيڪ قيمتون وصول ڪرڻ جي قابل ٿي ويون آهن.
SK Hynix آمريڪي اسٽاڪ مارڪيٽ ۾ لسٽ ٿيڻ جي امڪانن جو به جائزو وٺي رهي آهي، جيڪو ظاهر ڪري ٿو ته سيڙپڪار AI سان لاڳاپيل ميموري مارڪيٽ جي تيز واڌ مان فائدو حاصل ڪرڻ چاهين ٿا.
مائڪرون جي سي اي او سنجي مهروترا چيو: “اسان کي اميد آهي ته AI سبب پيدا ٿيندڙ طلب ايندڙ ڪيترن ئي سالن تائين برقرار رهندي.”
هن وڌيڪ چيو ته ڪمپني کي في الحال اهو اندازو ناهي ته ميموري چپس جي فراهمي وڌندڙ طلب سان ڪڏهن برابري ڪري سگهندي.
ڪمپني پنهنجي ڪاروباري ماڊل ۾ به تبديلي جو اعلان ڪيو آهي، جنهن جو مقصد طلب کي معاشي چڪر جي اثرن کان گهٽ متاثر بڻائڻ آهي. 22 ارب ڊالرن جا واعدا 16 اهم گراهڪن سان ٿيل معاهدن مان حاصل ٿيندا، جيڪي ڊيٽا سينٽر، صارفين ۽ گاڏين جي صنعتن سان لاڳاپيل آهن. انهن معاهدن ۾ لازمي خريداري، نقد جمع رقم ۽ گهٽ ۾ گهٽ قيمت جون شرطون شامل آهن، ته جيئن فراهمي يقيني بڻائي وڃي ۽ منافعي جي شرح محفوظ رهي.
مائڪرون اهو به ٻڌايو ته هيل تائين ڪيل معاهدن تحت مستقبل جي متوقع آمدني تقريباً 100 ارب ڊالرن تائين پهچي ويا آهن.
ٽيڪنالاجي ريسرچ اداري فيوچر گروپ جي سي اي او ڊينئل نيومين چيو: “مصنوعي ذهانت جي انفراسٽرڪچر جي تعمير جي ماپ ۽ رفتار کي هر مرحلي تي گهٽ سمجهيو ويو آهي، ۽ فراهمي جي محدوديتن سبب ميموري چپس مستقبل ۾ به پريميئم قيمتن تي وڪامنديون رهنديون.”