اسلام آباد (بيورو رپورٽ)سپريم ڪورٽ 26 هين آئيني ترميم خلاف درخواستن تي ڌرين کي نوٽيس جاري ڪري ڇڏيا آهن.سپريم ڪورٽ 26 هين آئيني ترميم خلاف داخل درخواستن جي ٻڌڻي ڪئي.جسٽس محمد علي مظهر ريمارڪس ڏنا ته فل ڪورٽ جو معاملو صرف چيف جسٽس وٽ وڃي سگهي ٿو، جڏهن ته جسٽس جمال مندوخيل چيو ته لڳي ٿو ته توهان پهرين ڏينهن کان ئي ويڙهه جي موڊ ۾ آهيو،جنهن تي درخواست ڏيندڙ جي وڪيل فيصل صديقي چيو ته اسان ڪنهن سان به وڙهڻ نٿا چاهيون، جسٽس امين الدين چيو ته جيڪڏهن ڪو به ڌر دليل پيش ڪرڻ لاءِ تيار نه آهي ته عدالت حڪم جاري ڪندي،جڏهن ته جسٽس جمال مندوخيل چيو ته “مون کي سمجهه ۾ نٿو اچي ته توهان ڇو هٻڪي رهيا آهيو،جيڪو به هن بينچ جي سامهون بحث ڪرڻ نٿو چاهي، ان کي پوئين پاسي ويهڻ گهرجي.جسٽس عائشه ملڪ چيو ته فل ڪورٽ ٺاهڻ تي ڪا پابندي ناهي، جڏهن ته وڪيل فيصل صديقي چيو ته 26 هين آئيني ترميم اختيارن جي عليحدگي جي اصول جي خلاف آهي،جڏهن ته عزير ڀنڊاري چيو ته 26 هين ترميم جي منظوري وقت ايوان نامڪمل هو.جسٽس جمال مندوخيل چيو ته ڇا 26 هين آئيني ترميم لاءِ ووٽنگ ميمبرن جي ڪل تعداد تي ٻڌل هئي يا موجود ميمبرن تي؟ جنهن تي وڪيل فيصل صديقي چيو ته موجود ميمبرن 26 هين آئيني ترميم تي ووٽ ڏنو، جنهن تي جسٽس مندوخيل سوال ڪيو ته ڇا موجود ميمبرن جو ڪل تعداد ايوان جي ٻه ڀاڱي ٽي اڪثريت کي پورو ڪري ٿو؟،وڪيل فيصل صديقي چيو ته حڪومت اڳ ۾ ئي ڳڻپ مڪمل ڪري چڪي آهي ۽ اهو معاملو نه کڻي رهيا آهيون، جنهن تي جسٽس عائشه ملڪ پڇيو ته ڇا ايوان ۾ سڀني صوبن جي مڪمل نمائندگي هئي؟،درخواستگذار جي وڪيل چيو ته خيبرپختونخواهه جي سينيٽ ۾ نمائندگي مڪمل نه هئي، ڇاڪاڻ ته اتي اڃا تائين سينيٽ چونڊون ٿي رهيون آهن،وڪيل صلاح الدين چيو ته اختر مينگل جي ترميم جي درخواست ۾ حالتن جو ذڪر ڪيو ويو آهي، اسيمبلي ميمبرن کي ووٽ ڏيڻ ۾ ڪيتري آزادي هئي، ان کي به نظر ۾ رکڻ گهرجي، جنهن تي جسٽس عائشه ملڪ چيو ته مخصوص سيٽن بابت فيصلي تي عمل نه ڪيو ويو. وڪيل صلاح الدين چيو ته درخواست ۾ مخصوص سيٽن بابت هڪ نقطو به اٿاريو ويو آهي، وڪيل صلاح الدين چيو ته ايوان مڪمل نه هو، پوءِ هو ترميم ڪيئن ڪري سگهي ٿو؟ جڏهن ته وڪيل شاهد جميل چيو ته صرف عوام جي حقيقي نمائندن کي آئين ۾ ترميم جو اختيار آهي،جسٽس محمد علي مظهر چيو ته توهان چونڊ ڪيسن جي فيصلن جو انتظار ڪرڻ چاهيو ٿا، پوءِ آئيني ترميم جو ڪيس ٻڌو؟ ان ۾ ته آئيني ترميم جو ڪيس ڊگهي عرصي تائين التوا ۾ رهندو،سپريم ڪورٽ ڪيس جي ٻڌڻي ٽن هفتن لاءِ ملتوي ڪري ڇڏي، ڇهين آئيني ترميم، فل ڪورٽ جي جوڙجڪ ۽ عدالتي ڪارروائي جي لائيو اسٽريمنگ جي درخواست تي ڌرين کي نوٽيس جاري ڪري ڇڏيا.
