اسلام آباد: (بيورو رپورٽ) سينيٽ جي چيئرمين سيد يوسف رضا گيلاني صدر آصف علي زرداري کي سندس 69 هين سالگرهه جي مبارڪباد ڏني آهي. سينيٽ چيئرمين چيو ته ملڪ ۾ جمهوريت جي فروغ ۽ عوامي ڀلائي لاءِ صدر آصف علي زرداري جون خدمتون ساراهه جوڳيون آهن. سيد يوسف رضا گيلاني چيو ته اڄ اسان هتي پاڪستان جي صدر آصف علي زرداري جي سالگرهه ملهائڻ لاءِ گڏ ٿيا آهيون. هن چيو ته پيپلز پارٽي هڪ جذبي، تحريڪ ۽ ارادي جو نالو آهي، هن پارٽي جي قيادت نه رڳو ملڪ ۾ جمهوريت کي هٿي وٺرائڻ، آئين جي بالادستي، عورتن کي بااختيار بڻائڻ ۽ غريب عوام جي خوشحالي لاءِ اڻٿڪ محنت ڪئي آهي. قربانيون پڻ ڏنيون آهن. شهيد ذوالفقار علي ڀٽو پاڪستان کي نه رڳو ايٽمي طاقت بڻايو پر ان جي دفاع کي به ناقابل تسخير بڻايو. عوام ۽ ملڪ جي خوشحالي لاءِ شهيد ڀٽو پاڪستان جي آئين جو تحفو ڏنو، سندس شهادت کانپوءِ محترمه بينظير ڀٽو به پنهنجي والد جي نقش قدم تي هلي ملڪ ۾ جمهوريت کي هٿي وٺرائڻ، آئين ۽ روح جي احترام لاءِ جدوجهد ڪئي. عوامي خدمت جي بلندي محترمه بي بي جي شهادت کان پوءِ پاڪستان جي صدر آصف علي زرداري ملڪ جي باگ ڈور سنڀالي ۽ صوبن جو استحصال ختم ڪرڻ لاءِ 18هين ترميم جو تحفو ڏنو، جنهن تحت صوبن کي برابري جا حق ڏنا ويا. پاڪستان پيپلز پارٽي جي موجوده چيئرمين بلاول زرداري ڀٽو به هن ملڪ جي ترقي ۽ خوشحالي لاءِ نمايان خدمتون سرانجام ڏنيون آهن. اها بلاول ڀٽو جي انتھائي محنت آهي جو اڄ آصف علي زرداري پاڪستان جو صدر ۽ مان سينيٽ چيئرمين جي حيثيت سان اوهان جي سامهون بيٺو آهي. پاڪستان پيپلز پارٽي جي ٻن صوبن ۾ صوبائي حڪومت ۽ ٻن صوبن ۾ گورنر شپ به آهي. پاڪستان پيپلز پارٽي پنهنجي آئيني ۽ عوامي ڀلائي جي جدوجهد جاري رکندي. پاڪستان جي صدر آصف علي زرداري شهيد ذوالفقار علي ڀٽي جو ڪيس عدالت ۾ موڪليو ۽ عوام جو پراڻو مطالبو پورو ڪيو ۽ سندس قتل کي عدالتي قتل ثابت ڪيو. هن چيو ته مون کي غيرقانوني طور پاڪستان جي وزيراعظم جي عهدي تان هٽايو ويو هو، پر اسان جمهوريت ۽ ملڪ جي بقا لاءِ سرگرم هئاسين ۽ ان حوالي سان جسٽس اطهر من الله به گذريل ڏينهن آمريڪا ۾ پنهنجي تقرير ۾ ان ڳالهه کي ورجايو. پاڪستان پيپلز پارٽي سڄي ملڪ ۾ واحد پارٽي آهي جنهن جمهوريت ۽ آئين جي بالادستي لاءِ سڀ کان وڌيڪ قربانيون ڏنيون آهن. اڄ صدر پاڪستان جي سالگرهه جي موقعي تي ملڪ ۾ جمهوريت جي فروغ لاءِ صدر پاڪستان جي خدمتن کي خراج تحسين پيش ڪريون ٿا. پاڪستان جو صدر ملڪ ۾ خوشحالي آڻڻ لاءِ سرگرم عمل آهي ۽ هو ملڪ جي چئن صوبن ۾ ترقي ۽ خوشحالي آڻڻ جي ڪوشش ڪري رهيو آهي. پاڪستان پيپلز پارٽي زنده آباد. اجلاس ۾ اڳوڻو وزيراعظم ۽ قومي اسيمبلي جي اسپيڪر راجا پرويز اشرف، سينيٽر سليم مانڊوي والا، سينيٽر شهادت اعواڻ، سينٽر پلوشه محمد زئي خان، بينظير انڪم سپورٽ پروگرام جي چيئرپرسن سينيٽر روبينا خالد، سينيٽر فاروق حامد نائيڪ، سينيٽر عبدالقادر، سينيٽر حسنا بانو، سينيٽر عمر فاروق ۽ ٻين شرڪت ڪئي. اجلاس ۾ قومي اسيمبلي جي ميمبر سحر ڪامران، سينيٽر سيد مسرور احسن، سينيٽر اسلم ابڙو ۽ ٻين ڪيترن ئي سينيٽرن ۽ قومي اسيمبلي ميمبرن شرڪت ڪئي. سينيٽ چيئرمين سيد يوسف رضا گيلاني پارليامينٽ جي ميمبرن سان گڏ صدر آصف علي زرداري جي سالگرهه جو ڪيڪ پڻ ڪاٽي ۽ صدر جي لاءِ دعا گهري.
