ڊيلاس(ويب ڊيسڪ)فرانس فيفا ورلڊ ڪپ ۾ پنهنجي شاندار بالادستي واري دور کي وڌيڪ اڳتي وڌائڻ کان رڳو هڪ فتح پري بيٺل آهي. جيڪڏهن هو اڄ رات پاڪستاني وقت موجب 12 هين وڳي سيمي فائنل ۾ اسپين کي شڪست ڏئي ٿو ته هو لڳاتار ٽيون ڀيرو ورلڊ ڪپ جي فائنل ۾ پهچي ويندو، جڏهن ته گذريل اٺ ورلڊ ڪپن دوران اهو سندس پنجون فائنل هوندو.
ان منزل تائين پهچڻ لاءِ ديدييه ديشان جي ٽيم کي اهڙي اسپين کي شڪست ڏيڻي پوندي، جنهن تازن سالن ۾ بار بار فرانس جي راهه روڪي آهي ۽ جنهن جي دفاع کي هن ٽورنامينٽ ۾ هيل تائين رڳو هڪ ئي گول سان ٽوڙيو ويو آهي.
اسپين، جنهن هن ورلڊ ڪپ ۾ لاها چاڙها ڏسندي اڳڀرائي ڪئي آهي، يورو 2024 جي سيمي فائنل ۾ فرانس کي ٻاهر ڪيو هو ۽ گذريل سال نيشنز ليگ جي نَوَ گولن واري دلچسپ مقابلي ۾ به کيس شڪست ڏني هئي. پر هن ڀيري لي بليو (فرانس) وٽ ٽورنامينٽ جا ٻه سڀ کان وڌيڪ گول ڪندڙ رانديگر موجود آهن، ڪليان ايمباپي اٺ گولن سان ۽ عثمان ڊيمبيلي پنج گولن سان، ۽ گڏوگڏ هڪ وڌيڪ متوازن ٽيم پڻ آهي.
ٻنهي ٽيمن ۾ ٻه سال اڳ ميونخ ۾ ٿيل مقابلي کان ڪيترائي رانديگر اڃا به موجود آهن، جڏهن اسپين، راندال ڪولو مواني جي شروعاتي گول کانپوءِ واپسي ڪندي، لامين يامال ۽ داني اولمو جي گولن جي مدد سان 2-1 تان ڪاميابي حاصل ڪئي هئي. پر ڊيلاس ۾ ٿيندڙ هن مقابلي جون حالتون گهڻو مختلف آهن.
يورو 2024 جي سيمي فائنل تائين پهچندڙ فرانس اڃا پنهنجي بهترين تلاش ۾ هو. ايمباپي افتتاحي ميچ دوران نڪ ڀڄڻ سبب مڪمل فارم ۾ نه هو، اينتوان گريزمان به اثرائتو نه ٿي سگهيو هو، ۽ ٽيم کليل راند مان گهڻا گول ڪرڻ ۾ ناڪام رهندي به آخري چئن ٽيمن تائين پهتي هئي.
هاڻي صورتحال مختلف آهي
آمريڪا ۾ جاري ورلڊ ڪپ دوران فرانس جي ڪاميابي جو بنياد مڪمل طور تبديل ٿي چڪو آهي. ايمباپي ۽ ڊيمبيلي گڏجي 13 گول ڪري چڪا آهن، جڏهن ته مائيڪل اوليسي مڊفيلڊ ۽ حملي وچ ۾ تخليقيت ۽ ڪنٽرول فراهم ڪيو آهي. بريڊلي بارڪولا ۽ ڊيزائري دوئي به شروعاتي اليون يا متبادل رانديگر طور تيز رفتار حملن جو اهم هٿيار ثابت ٿيا آهن.
فرانس بنا بال جي وڌيڪ منظم ۽ بال سان وڌيڪ متنوع ٽيم بڻجي چڪو آهي. اها ٽيم تيز حملو به ڪري سگهي ٿي، راند جي رفتار به گهٽائي سگهي ٿي ۽ ڊگهي وقت تائين منظم دفاع ڪندي به پريشان نظر نٿي اچي.
اهڙي حڪمت عملي جو بهترين مثال مراڪش خلاف ڪوارٽر فائنل ۾ 2-0 جي فتح هئي، جتي فرانس دٻاءُ برداشت ڪيو، مخالف کي صاف موقعا نه ڏنا ۽ مناسب موقعي جو صبر سان انتظار ڪري آخرڪار ميچ پنهنجي نالي ڪئي.
هاڻي ساڳي توازن جو امتحان اسپين خلاف ٿيندو، جنهن وٽ وري لامين يامال جهڙو رانديگر موجود آهي، جيڪو هيم اسٽرنگ جي تڪليف کانپوءِ آهستي آهستي پنهنجي بهترين فارم ڏانهن موٽي رهيو آهي.
لوئس ڊي لا فوئينتي جي ٽيم يورپي چيمپيئن بڻجڻ واري پنهنجي گڏيل فلسفي تي قائم آهي. اسپين بال تي قبضي کي رڳو موقعا ٺاهڻ لاءِ نه، پر مخالف کي دٻائڻ ۽ پنهنجي دفاع کي محفوظ رکڻ لاءِ به استعمال ڪري ٿو.
هن ٽورنامينٽ ۾ رڳو هڪ گول کائڻ ان ڳالهه جو ثبوت آهي ته مخالف ٽيمن لاءِ اسپين جي دفاع کي ٽوڙڻ ڪيترو ڏکيو رهيو آهي. البته بيلجيم ڪوارٽر فائنل ۾ 2-1 جي شڪست باوجود اهو ڏيکاريو ته جيڪڏهن شروعاتي پريسنگ ٽوڙي مڊفيلڊ جي پٺيان خالي جڳهه تي حملو ڪيو وڃي ته اسپين کي پريشان ڪري سگهجي ٿو.
فرانس شايد ٻين سڀني ٽيمن کان وڌيڪ اهڙن موقعن مان فائدو وٺڻ جي صلاحيت رکي ٿو. ايمباپي جي غيرمعمولي رفتار سبب اسپين جا محافظ گهڻو اڳتي نٿا وڌي سگهن، جڏهن ته ڊيمبيلي جي ونگ تان حملي ڪرڻ جي صلاحيت مخالف لاءِ اهو اندازو لڳائڻ ڏکيو بڻائي ٿي ته اصل خطرو ڪهڙي پاسي کان ايندو.
ٻئي طرف، مائيڪل اوليسي فرانس لاءِ اهم ڳنڍيندڙ ڪردار ادا ڪري رهيو آهي، جيڪو مڊفيلڊ سان گڏجي راند ٺاهيندو آهي ۽ پوءِ اوچتو تيز حملي ذريعي مخالف تي وار ڪندو آهي.
ديدييه ديشان کي اهو فيصلو ڪرڻو پوندو ته هو مڊفيلڊ کي وڌيڪ مضبوط بڻائڻ چاهي ٿو يا وري انهيءَ جارحاڻي حڪمت عملي تي قائم رهي، جنهن فرانس کي هن ٽورنامينٽ جي سڀ کان خوفناڪ ٽيم بڻائي ڇڏيو آهي.
جيڪڏهن هو چار جارحاڻا رانديگر ميدان ۾ لاهيندو ته اسپين تي وڌيڪ دٻاءُ پوندو، پر جيڪڏهن اسپين فرانس جي پريسنگ ٽوڙي ويو ته پوءِ فرانس جي دفاع لاءِ به خطرو وڌي سگهي ٿو.
تاريخ ٺاهڻ جو موقعو
بيلجيم خلاف فتح کانپوءِ اسپين جي ڪوچ لوئس ڊي لا فوئينتي چيو، “اسين ئي واحد ٽيم آهيون جنهن فرانس کي لڳاتار ٻه ڀيرا شڪست ڏني آهي، پر هي ٽيون مقابلو بلڪل مختلف هوندو. ٻئي ٽيمون دنيا جي اعليٰ درجي جون آهن.”
پر فرانس وٽ تاريخ رقم ڪرڻ جو بهترين موقعو آهي.
فرانس 1998، 2006، 2018 ۽ 2022 ۾ ورلڊ ڪپ جو فائنل کيڏي چڪو آهي ۽ انهن مان ٻه ڀيرا عالمي چيمپيئن بڻي آهي. جيڪڏهن هو ڊيلاس ۾ ڪاميابي حاصل ڪري ٿي ته گذريل اٺ ورلڊ ڪپن دوران پنجون ڀيرو فائنل ۾ پهچندي.
ان سان گڏ، فرانس 1994 کان 2002 تائين برازيل کانپوءِ پهريون ملڪ بڻجي ويندو، جيڪو لڳاتار ٽن ورلڊ ڪپ فائنلن ۾ کيڏندو.
ڪوچ ديدييه ديشان جي وڏي خوبي اها رهي آهي ته هو ٽيم ۾ نون رانديگرن کي شامل ڪندي به ان جي مقابلي واري سڃاڻپ کي برقرار رکڻ ۾ ڪامياب رهيو آهي.
2018 واري عالمي چيمپيئن ٽيم مضبوط دفاع ۽ تيز جوابي حملن تي ڀاڙيندي هئي، جڏهن ته 2022 واري فائنلسٽ ٽيم گهڻي حد تائين ايمباپي جي غيرمعمولي صلاحيت تي دارومدار رکندي هئي.
پر موجوده فرانس وڌيڪ گهري، وڌيڪ دلير ۽ ڪنهن هڪ رانديگر يا هڪ ئي حڪمت عملي تي گهٽ ڀاڙيندڙ ٽيم بڻجي چڪي آهي.
البته اسپين شايد واحد اهڙي ٽيم آهي، جيڪا اڃا به فرانس جي باقي رهيل ڪمزورين کي سامهون آڻي سگهي ٿي.
اسپين جي ٽيم هن ٽورنامينٽ ۾ رڳو هڪ گول کاڌو آهي، بال تي غيرمعمولي ڪنٽرول رکي ٿي ۽ ڊگهي عرصي تائين راند تي حاوي رهڻ کانپوءِ سزا واري علائقي ۾ اوچتو فيصلائتا حملا ڪرڻ جي صلاحيت به رکي ٿي.
فرانس ۽ اسپين هن مهل تائين 38 ميچ کيڏيا آهن، جن مان 18 ڀيرا اسپين ۽ 13 ڀيرا فرانس ميچ کٽيا آهن ۽ 7 ميچ ڊرا ٿيا آهن.
تنهن هوندي به، فرانس هن اهم مقابلي ۾ وڌيڪ جارحاڻي طاقت، وڌيڪ اعتماد ۽ ان يقين سان ميدان ۾ لهندي ته سندس نئين ارتقا کيس اهڙي سطح تي پهچائي ڇڏيو آهي، جتي ماضي جون شڪستون هاڻي هن مقابلي جو رخ طئي نه ٿيون ڪن.
