پنوعاقل چورين ۾ اضافو، شهرين جو احتجاج پوليس جي خاطري تي معطل

پنوعاقل (رپورٽ سنتوش ڪمار) ڪافي مهينن کان پنوعاقل تعلقي مان ڄڻ ته امن جو پکي اڏامي ويو آهي، شهر جي چئني پاسن کان رات ڏينهن ناڪابندي ۽ سخت چيڪنگ باوجود به شهر مان چورين جي وارداتن ۾ گهٽتائي نه اچي سگهي آهي. گذريل رات پڻ ٻن دوڪانن جا چور تالا ٽوڙي لکين روپيا روڪ رقم ۽ ٻيو سامان کڻي فرار ٿي ويا. جنهن ۾ نيشنل بينڪ لڳ راشد جهنڍير جي ڪريانه اسٽور جا تالا ٽوڙي موبائل ڪارڊ ۽ ٻيو سامان چوري ڪري ويا، جڏهن ته ٻئي پاسي بائجي چوڪ لڳ امام الدين شيخ جي دوڪان جا تالا ٽوڙي ليپ ٽاپ، 37 هزار روڪ رقم ۽ ٻيو سامان ٻهاري ويا. شهر ۾ وڌندڙ اهڙي بدامني خلاف ٽائون چيئرمين شبير احمد شيخ جي اڳواڻي ۾ پوليس خلاف احتجاجي مظاهري لاءِ ٽائون ڪميٽي پنوعاقل ۾ سياسي سماجي مذهبي تنظيمن جي اڳواڻن جوڪٺ ٿيو، جنهن ۾ وڏي انگ ۾ شهرين شرڪت ڪئي، گڏجاڻي ۾ پوليس خلاف احتجاجي مظاهروڪرڻ جو فيصلو ڪيو ويو. جنهن دوران ڊي ايس پي پنوعاقل لياقت عباسي ۽ ايس ايڇ او پنوعاقل مٺل ککراڻي ٽائون ڪميٽي پهچي مظاهرو روڪرائڻ لاءِ هفتي جي مهلت ورتي ۽ چيو ته ڏوهن تي ضابطو آندو ويندو.

کیٹاگری میں : سنڌ

پهنجو تبصرو موڪليو