اسلام آباد(بيورو رپورٽ) اڳوڻو وزيراعظم جو پرنسپل سيڪريٽري اعظم خان 190 ملين پائونڊ ريفرنس ۾ نيب آڏو پيش ٿي ويو.قومي احتساب بيورو (نيب) اڳوڻي وزيراعظم جي پرنسپل سيڪريٽري اعظم خان کي 20 جولاءِ تي نوٽيس جاري ڪندي اڄ صبح 10 وڳي نيب راولپنڊي ۾ پيش ٿيڻ جي هدايت ڪئي هئي.اعظم خان 190 ملين پائونڊ ڪيس جي جاچ جي سلسلي ۾ نيب ۾ اڪيلو پيش ٿيو، جتي هن نيب جي گڏيل جاچ ٽيم آڏو پنهنجو بيان رڪارڊ ڪرايو ۽ ٽيم جي سوالن جا جواب ڏنا.ذريعن موجب اعظم خان پنهنجي بيان ۾ 190 ملين پائونڊ بابت اڳ ۾ موجود دستاويزن جي تصديق ڪئي ۽ ٻڌايو ته رقم ڪيئن ادا ڪئي وئي.ذريعن موجب اعظم خان ان ڳالهه جي تصديق ڪندي چيو ته هو پاڪستان جي اڪائونٽ ۾ آيل رقم جي انهن سمورن ڪيسن ۾ اکين ڏٺي شاهد آهي، هن ڪيتريون ئي شيون ڏٺيون آهن، عمران خان ان حوالي سان هدايتون به ڏيندو رهيو آهي.ذريعن موجب اعظم خان وڌيڪ چيو ته ڪابينا اجلاس لاءِ تيار ڪيل سمري جي تياري ۾ اهم ڪردار شهزاد اڪبر جو هو جنهن جي ڪابينا منظوري ڏني هئي. سمري پيش ڪرڻ کان اڳ به عمران خان سان ملاقات ٿي جنهن ۾ شهزاد اڪبر به موجود هو.ذريعن جو چوڻ آهي ته اعظم خان نيب آڏو ڪابينا اجلاس بابت سوالن جا جواب به ڏنا ۽ نيب ٽيم کي سمري بابت اجلاسن بابت به آگاهه ڪيو.ذريعن موجب 190 ملين پائونڊ ڪيس ۾ اعظم خان عمران خان جي دعوائن جي ابتڙ بيان ڏنو آهي ۽ ٻڌايو آهي ته ان موقعي تي عمران خان ان حوالي سان هدايتون جاري ڪيون، جڏهن ته شهزاد اڪبر به رقم جي حوالي سان صلاح مشورا ڪري رهيو هو. ان حوالي سان سمري ڪابينا ۾ پيش ڪرڻ جو فيصلو عمران خان جي منظوري سان ڪيو ويو.
