ڪراچي (اسٽاف رپورٽر): پاڪستان جي خاتون اول محترمه آصفه ڀٽو زرداري سومر ڏينهن آٽزم ۾ مبتلا ٻارن لاءِ پاڪستان جي پهرين وقف ٿيل رهائشي سهولت جو افتتاح ڪيو. ان موقعي3 تي سنڌ جو وڏو وزير سيد مراد علي شاهه به موجود هو. سينٽر فار آٽزم ريهيبيليٽيشن اينڊ ٽريننگ، سنڌ (C-ARTS) جي تحت ڪورنگي ڪراچي ۾ قائم ڪئي ويو آهي. هي تاريخي اڳڀرائي آٽزم جي شڪار ٻارن لاءِ جامع، گهڻي وقت تائين هلندڙ ۽ خاص سنڀال فراهم ڪرڻ ۽ سندن خاندانن جي مدد لاءِ ملڪ جي ڪوششن ۾ هڪ وڏو سنگ ميل آهي. سنڌ جي وڏي وزير سيد مراد علي شاهه افتتاح واري تقريب کي خطاب ڪندي هن منصوبي کي آٽزم ۾ مبتلا ٻارن ۽ سندن سنڀال ڪندڙن لاءِ اميد، شموليت ۽ وقار جي علامت قرار ڏنو. هن چيو ته رهائشي سهولت سنڌ حڪومت جي ان اٽل عزم جي عڪاسي ڪري ٿي ته آٽزم جي شڪار هر ٻار کي معياري تشخيص، تعليم، بحالي، زندگي جي مهارتن جي تربيت ۽ هڪ آزاد مستقبل لاءِ موقعا ميسر هجن. تقريب ۾ سيڪريٽري ڊي اي پي ٽي (DEPT) طهٰ فاروقي، سفارتي ۽ ترقياتي برادري جي ميمبرن، آٽزم جي ماهرن، تعليمي ماهرن، والدين ۽ سول سوسائٽي جي نمائندن شرڪت ڪئي. سي-آرٽس (C-ARTS) جي چيف آٽزم ڪنسلٽنٽ ۽ سي اي او، محترمه ارم رضوان شرڪت ڪندڙن کي اداري جي خدمتن ۽ مستقبل جي توسيع جي منصوبن بابت بريفنگ ڏني. نئين افتتاح ٿيل سهولت کي آٽزم جي شڪار انهن ٻارن لاءِ هڪ محفوظ ۽ پرورش وارو ماحول فراهم ڪرڻ لاءِ تيار ڪيو ويو آهي جن کي خاص مدد جي ضرورت آهي. هي سهولت لڳ ڀڳ 250 ٻارن جي سنڀال ڪندي ۽ آٽزم جي ثبوتن تي ٻڌل مداخلت جي پروگرامن ۾ تربيت يافته هڪ گھڻ رخي شعبي جاتي ٽيم جي ذريعي ڪم ڪندي. وڏي وزير ٻڌايو ته اهو ادارو ان وقت کان وٺي پاڪستان ۾ سڀ کان وڏو آٽزم سپورٽ ۽ بحالي وارو نيٽ ورڪ بڻجي چڪو آهي، جيڪو 1,500 کان وڌيڪ ٻارن ۽ سندن خاندانن کي خدمتون فراهم ڪري رهيو آهي. هن چيو ته هن وقت ڪراچي، حيدرآباد، شهيد بينظيرآباد، گمبٽ، سکر ۽ لاڙڪاڻي ۾ ڏهه سي-آرٽس (C-ARTS) مرڪز ڪم ڪري رهيا آهن، جيڪي تشخيص، تعليم، بحالي، رويي جي ٿراپي، زندگي جي مهارتن جي تربيت، پيشي ورانه ترقي ۽ خانداني ڪائونسلنگ سميت مڪمل طور تي مفت خدمتون فراهم ڪري رهيا آهن. خاص آٽزم جي خدمتن تائين پهچ کي وڌيڪ وڌائڻ لاءِ، وڏي وزير اعلان ڪيو ته تيرهن وڌيڪ سي-آرٽس (C-ARTS) يونٽ گلشن اقبال ٽائون، ماڊل ڪالوني، پريميئر ڪاليج ناظم آباد، سومار ڪنڌاڻي ڳوٺ، لانڍي، ناظم آباد، حيدرآباد، مٽياري، ميرپورخاص، لاڙڪاڻو، ٽنڊو محمد خان، سڪر ۽ شهيد بينظيرآباد ۾ زير تعمير آهن يا مڪمل ٿيڻ جي ويجهو آهن. هن چيو ته انهن مان ڪيتريون ئي سهولتون مڪمل ٿيڻ جي آخري مرحلي ۾ آهن ۽ جلد ئي ڪم شروع ڪري ڏينديون. وڏي وزير لانڍي، ملير ۽ نارٿ ناظم آباد ۽ بحريا ٽائون ۾ ٽن جديد ترين سي-آرٽس انڪلوسو پارڪن جي قيام جو پڻ اعلان ڪيو. مراد شاهه چيو ته سي-آرٽس (C-ARTS) ماڊل جي ڪاميابيءَ سنڌ کان ٻاهر به ڌيان ڇڪايو آهي ۽ ملڪ جي ٻين حصن ۾ به اهڙن ئي قدمن جي حوصلا افزائي ڪئي آهي. هن انڪشاف ڪيو ته سنڌ حڪومت بلوچستان ۽ اسلام آباد ڪيپيٽل ٽيريٽري جي حڪومتن سان مفاهمت جي يادداشتن تي دستخط ڪيا آهن ته جيئن انهن علائقن ۾ آٽزم مرڪز قائم ڪرڻ لاءِ فني ماهر ۽ ادارتي مدد فراهم ڪئي وڃي. هن خدمتن جي هن توسيع کي پي پي پي چيئرمين بلاول ڀٽو زرداري جي هڪ انڪلوسو ۽ منصفاڻي پاڪستان جي ويزن سان منسوب ڪيو، ۽ چيو ته آٽزم جي شڪار هر ٻار کي، چاهي اهو ڪٿي به رهندو هجي، معياري سنڀال، تعليم ۽ موقعن تائين پهچ ملڻ گهرجي. آٽزم جو شڪار ٻارن سان سڌو سنئون ڳالهائيندي، پاڪستان جي پهرين خاتون آصفه ڀٽو چيو ته اهي معاشري جا قيمتي، باصلاحيت ۽ اهم ميمبر آهن. هن چيو آٽزم توهان جي صلاحيتن جو تعين نٿو ڪري. توهان مان هر هڪ منفرد طاقت، صلاحيتن ۽ خوابن جو مالڪ آهي. هي اسان جي ذميواري آهي ته اسان اهڙو ماحول پيدا ڪريون جتي توهان ترقي ڪري سگهو، اعتماد سان سکي سگهو ۽ فخر سان معاشري ۾ پنهنجو حصو وجهي سگهو.
