لاهور (ويب ڊيسڪ) پاڪستان ڪرڪيٽ بورڊ (پي سي بي) جي چيئرمين محسن نقوي ڪرڪيٽرن جي ميچ فيس ۾ واڌ جي منظوري ڏئي ڇڏي محسن نقوي جي صدارت هيٺ پي سي بي بورڊ آف گورنرز جو اجلاس ٿيو، جنهن ۾ نئين مالي سال 2026-27ع جي سرپلس بجيٽ جي گڏيل طور تي منظوري ڏني وئي.اجلاس ۾ پي ايس ايل جي 12 هين ايڊيشن جي بجيٽ ۽ پي ايس ايل کي انتظامي توڙي مالي طور تي خود مختار بڻائڻ جي منظوري ڏني وئي، جڏهن ته ڊوميسٽڪ ڪرڪيٽ جي بجيٽ ۾ 1 ارب رپين جي واڌ ڪري ان کي 3 ارب رپين مان وڌائي 4 ارب رپيا ڪرڻ جو فيصلو ڪيو ويو. نئين سينٽرل ڪانٽريڪٽ جي فارميٽ ۽ ادائيگي جي طريقيڪار جي به منظوري ڏني وئي، قائدِ اعظم ٽرافي جي رانديگرن جي ميچ فيس 30 هزار رپين مان وڌائي 1 لک رپيا ۽ ريزرو (اضافي) رانديگرن جي ميچ فيس 15 هزار رپين مان وڌائي 50 هزار رپيا ڪرڻ جو فيصلو ڪيو ويو آهي. اجلاس ۾ وومينز ون ڊي ۽ ٽي-20 ٽورنامنٽس جي انعقاد ۽ ان حوالي سان فنڊز مختص ڪرڻ جي منظوري به ڏني وئي. ان کان علاوه اجلاس ۾ ريجنل گراؤنڊ اسٽاف جي گهٽ ۾ گهٽ پگهار 42 هزار رپيا ڪرڻ، وڌيڪ 12 گراؤنڊز کي آپريشنل ڪرڻ ۽ هيومن ريسورس (انساني وسيلن) لاءِ فنڊز جي منظوري به ڏني وئي. اجلاس ۾ نيشنل اسٽيڊيم ۽ ٻين انفراسٽرڪچر جي اپ گريڊيشن (سڌاري) لاءِ 6 ارب 70 ڪروڙ رپين جي منظوري ڏني وئي. هائي پرفارمنس سينٽر لاهور ۾ بائيوميڪينڪس مشين لڳائڻ لاءِ فنڊز مختص ڪرڻ جي به منظوري ڏني وئي ۽ بورڊ آف گورنرز جي گذريل گڏجاڻي جي فيصلن جي توثيق ڪئي وئي.
