اسلام آباد (بيورو رپورٽ): وفاقي حڪومت پيٽروليم شعبي کي مرحليوار ڊي ريگوليٽ (سرڪاري ڪنٽرول مان آزاد) ڪرڻ جو فيصلو ڪيو آهي، جنهن تحت هاءِ اسپيڊ ڊيزل جي قيمت ۾ وڏي گهٽتائي جي تياري ڪئي پئي وڃي. تجويز موجب ڊيزل جو بين الاقوامي ڪريڪ اسپريڊ 70 ڊالر مان گهٽائي 35 کان 40 ڊالر في بيرل ڪيو ويندو، جنهن سان مقامي مارڪيٽ ۾ ڊيزل جي قيمت تمام گهڻو هيٺ ايندي. پيٽروليم پرائسنگ ڪميٽي ايندڙ ٻن هفتن ۾ وزيراعظم شهباز شريف کي حتمي سفارشات پيش ڪندي، جنهن کانپوءِ پيٽرول جي قيمتن جو تعين به اوگرا جي بجاءِ مارڪيٽ جي حوالي ڪيو ويندو.
