ڪاراڪس(ويب ڊيسڪ)وينزويلا جي عبوري صدر ڊيلسي روڊريگيز چيو آھي ته هو وينزويلا جي مستقبل بابت آمريڪا سان تعاون ڪرڻ لاءِ تيار آھي، جيڪو آمريڪي اسپيشل فورسز طرفان ليڊر نڪولس مادورو جي اغوا جو سبب بڻيل فوجي آپريشن جي فوري نتيجن کان واضح تبديليءَ جو اشارو آھي. “اسان آمريڪا ۽ وينزويلا جي وچ ۾ متوازن ۽ احترام واري تعلق ڏانھن وڌڻ کي ترجيح ڏيون ٿا،”
الجزيره جي رپورٽ موجب روڊريگيز آچر ڏينھن ٽيليگرام تي لکيو. “اسان آمريڪي حڪومت کي دعوت ڏيون ٿا ته گڏجي تعاون جي ايجنڊا تي ڪم ڪريون جيڪو گڏيل ترقيءَ ڏانھن ھدايت ٿيل ھجي،” ھن جاري رکيو.
روڊريگيز، جيڪا 2018ع کان مادورو جي نائب رھي آھي، کي وينزويلا جي سپريم ڪورٽ طرفان ڇنڇر ڏينھن عبوری ليڊر بڻايو ويو هو. ڇنڇر تي فجر مهل آمريڪي فوجين آپريشن ۾ مادورو ۽ سندس زال کي گرفتار ڪيو هو. هي آپريشن جيڪو 2011ع ۾ آمريڪي نيوي سيل ٽيم طرفان القاعدہ ليڊر اسامه بن لادن کي پاڪستان جي ايبٽ آباد ۾ محفوظ گھر ۾ مارڻ کان پوءِ سڀ کان وڌيڪ اعليٰ پروفائل ۽ خطرناڪ آپريشن ھو.
ڇنڇر ڏينھن ٽيليويزن خطاب ۾ روڊريگيز آمريڪي عملن کي “بين الاقوامي قانون جي ڀڃڪڙي واري ظلم” قرار ڏنو هو، ۽ واضه ڪيو هو ته “وينزويلا جو رڳو صدر نڪولس مادورو آهي.” تنهن 24 ڪلاڪن کان به گهٽ وقت ۾ 90 ڊگري جو يوٽرن وٺندي هي بيان جاري ڪيو آهي.
روڊريگيز جي ٽيليويزن بيانن ٽرمپ سان اختلاف پيدا ڪيو، جنھن مادورو جي گرفتاريءَ جي فوري نتيجن ۾ اشارو ڏنو ھو ته آمريڪي آفيسر ان سان رابطي ۾ آھن ۽ هو تعاون لاءِ تيار آھي. جنهن بعد صدر ٽرمپ روڊريگيز سان مادورو کان به خراب حشر جي ڌمڪي ڏني هئي. ٽرمپ ايٽلاٽڪ ميگزين کي ڏنل انٽرويو ۾ چيو هوته “جيڪڏھن هو صحيح ڪم نه ڪندي، ته کيس تمام وڏي قيمت ادا ڪرڻي پوندي، شايد مادورو کان به وڌيڪ.”
روڊريگيز الڳ طور آچر ڏينھن چيو ته ھن مادورو ۽ فلوريس جي آمريڪي حراست مان رھائيءَ لاءِ ھڪ ڪميشن شروع ڪئي آھي، جتي وينزويلائي ليڊر کي “نارڪو ٽيررزم سازش، ڪوڪين درآمد سازش، مشين گنن ۽ تباه ڪن هٿيارن جي قبضي جي سازش” جا الزام آھن.
ڪميشن کي وينزويلائي وزير خارجا ايوان گل ۽ ان جي ڀاءُ خورخي گڏجي چيئرمين ڪندا، جيڪو وينزويلا جي قومي اسيمبليءَ جو صدر آھي. مادورو کي شايد پاناما جي صدر مينوئل نوريگا وارو مستقبل سامھون اچي، جنھن کي 1990ع ۾ آمريڪي فورسز پاناما تي حملي کان پوءِ پنھنجي ملڪ جي ويٽيڪن سفارتخاني ۾ لڪڻ کان پوءِ کڻي ويا ھئا.
نوريگا، جيڪو اڳ آمريڪا جو مضبوط اتحادي ھو، کي به “ريڪيٽيئرنگ، منشيات سمگلنگ، ۽ مني لانڊرنگ” جهڙا الزام ھئا ۽ کيس 40 سال قيد جي سزا ٿي. ان جي سزا چڱي رويي جي ڪري 17 سالن تائين گھٽائي ويئي، پر پوءِ کيس الڳ الزامن تي فرانس ڏانھن ملڪ بدر ڪيو ويو، پوءِ وري پاناما ڏانھن، جتي ھن وڌيڪ قيد ڪاٽيو، جيسين 2017ع ۾ مري ويو.
مادورو کي سومر ڏينھن نيويارڪ فيڊرل ڪورٽ ۾ پيش ٿيڻو آھي. ٽرمپ حڪومت جي آفيسرن گرفتاريءَ کي قانون نافذ ڪندڙ عمل قرار ڏنو آھي ته جيئن مادورو کي 2020ع ۾ داخل ڪيل ڏوھاري الزامن جو احتساب ڪيو وڃي جنھن ۾ نارڪو ٽيررزم سازش جو الزام شامل آھي.
