بيروت(ويب ڊيسڪ)اسرائيل خميس ڏينهن لبنان ۾ وڌيڪ هدفن تي بمباري ڪئي، جنهن آمريڪا-ايران جنگبندي کي وڌيڪ خطري ۾ وجهي ڇڏيو، ڇو ته جنگ دوران اسرائيل جي پنهنجي پاڙيسري ملڪ تي سڀ کان وڏي حملن ۾ 250 کان وڌيڪ ماڻهو مارجي ويا ۽ ڊونلڊ ٽرمپ جي صلح کي به ناڪام بڻجڻ جو خطرو پيدا ٿيو آهي۔پاڪستان ۾، اختيارين جنگ جي پهرين امن ڳالهين جي امڪان سبب گادي واري شهر اسلام آباد کي لاڪ ڊائون ڪري ڇڏيو۔ سرينا هوٽل جي چوڌاري لڳ ڀڳ 3 ڪلوميٽر (2 ميل) علائقو بند ڪيو ويو، جتي آمريڪا ۽ ايران جا وفد رهڻ جا امڪان آهن۔ مهمانن کي آچر تائين هوٽل خالي ڪرڻ لاءِ چيو ويو، ڇو ته ان کي “هڪ اهم تقريب” لاءِ “حڪومتي استعمال” ۾ آندو وڃي.پر اهڙو ڪو اشارو نه مليو آهي ته ايران هورموز تي لڳ ڀڳ مڪمل پابندي ختم ڪري رهيو آهي، جنهن سبب عالمي توانائي سپلاءِ ۾ تاريخ جي سڀ کان وڏي رڪاوٽ پيدا ٿي آهي۔ تهران چيو آهي ته جيستائين اسرائيل لبنان تي حملا جاري رکندو، تيستائين ڪو به معاهدو نه ٿيندو۔جنگبندي جي پهرين 24 ڪلاڪن دوران رڳو هڪ تيل کڻي ويندڙ ٽينڪر ۽ پنج سڪل مال کڻي ويندڙ جهازن هن آبنائي مان گذريا، جڏهن ته جنگ کان اڳ روزانو لڳ ڀڳ 140 جهاز هتان گذرندا هئا۔اسرائيل جو چوڻ آهي ته جنگبندي لبنان تي لاڳو نٿي ٿئي اسرائيل، جنهن گذريل مهيني ايران سان جنگ جي دوران لبنان تي به حملا ڪيا ته جيئن ايران سان لاڳاپيل هٿياربند گروهه حزب الله کي ختم ڪري سگهجي، چوي ٿو ته لبنان ۾ سندس ڪارروايون ٽرمپ پاران اڱاري رات اعلان ڪيل جنگبندي ۾ شامل ناهن۔ واشنگٽن به چيو آهي ته لبنان جنگبندي جو حصو ناهي، پر ايران ۽ پاڪستان، جيڪي ثالث جو ڪردار ادا ڪري رهيا آهن، چون ٿا ته لبنان واضح طور تي هن معاهدي ۾ شامل هو۔ برطانيا ۽ فرانس سميت ڪيترن ئي ملڪن چيو آهي ته جنگبندي کي لبنان تائين وڌايو وڃي۔ايران جي پارليامينٽ جي اسپيڪر محمد باقر قاليباف، جيڪو امڪاني طور تي آمريڪي نائب صدر جي ڊي وينس جي مقابلي ۾ ايراني وفد جي اڳواڻي ڪندو، سوشل ميڊيا تي چيو ته لبنان ۽ ايران جي علائقائي اتحادي قوتن جو “محور” ڪنهن به جنگبندي جو الڳ نه ٿيندڙ حصو آهن۔هڪ پاڪستاني ذريعي موجب، پاڪستان لبنان سان گڏ يمن لاءِ به جنگبندي تي ڪم ڪري رهيو آهي، جتي اسرائيل ايران سان لاڳاپيل قوتن تي حملا ڪيا آهن: “اهو (ايندڙ) ڳالهين دوران بحث هيٺ ايندو ۽ اسان ان کي حل ڪنداسين.”
اسرائيل جو دعويٰ: حزب الله اڳواڻ جو ڀاڻيجو مارجي ويو
اسرائيلي فوج چيو آهي ته هن حزب الله جي سيڪريٽري جنرل نعيم قاسم جي ڀاڻيجي کي ماريو آهي ۽ رات جو ڏکڻ لبنان ۾ درياهه جي گذرگاهن تي حملا ڪيا۔
لبناني سرڪاري ميڊيا موجب، اسرائيل اڌ رات کان ٿورو اڳ ۽ صبح سوير بيروت جي ڏاکڻي علائقن تي حملا ڪيا، جڏهن ته خميس صبح ڏکڻ لبنان جي ڪيترن ئي شهرن کي نشانو بڻايو ويو.
نيتن ياهو جو لبنان سان سڌي ريت ڳالهين جو اعلان
اسرائيلي وزيراعظم بنيامين نيتن ياهو چيو آهي ته اسرائيل لبنان سان سڌيون ڳالهيون شروع ڪندو، جن جو مقصد حزب الله کي بي هٿيار ڪرڻ ۽ ٻنهي ملڪن وچ ۾ پرامن لاڳاپا قائم ڪرڻ آهي۔ ايران، آمريڪا ۽ اسرائيل سان ان ڳالهه تي اختلاف رکي ٿو ته ڇا جنگبندي اسرائيل جي اتر سرحد تي ايران جي حمايت يافته نيم فوجي گروهه حزب الله خلاف جاري فوجي ڪارروائين تي به لاڳو ٿئي ٿي يا نه۔سي اين اين وائيٽ هائوس جي ذريعن جي حوالي سان خبر ڏني آهي ته صدر ڊونلڊ ٽرمپ نيتن ياهو کي لبنان سان اهي ڳالهيون شروع ڪرڻ لاءِ چيو آهي۔ الڳ طور تي، صدر اربع ڏينهن چيو ته آمريڪي فوجون “پنهنجي جاءِ تي برقرار” رهنديون جيستائين ايران سان مڪمل معاهدو نه ٿي وڃي۔ لبنان جي صدر چيو آهي ته اصل مسئلو جنگبندي آهي. حملا روڪيو جيئن ڳالهيون شروع ٿي سگهن.
”اسان جي مدد ڪيو“ لبنان جي اسرائيلي حملا روڪرائڻ لاءِ پاڪستان کي اپيل
لبناني وزيراعظم نواف سلام لبنان ۽ ان جي عوام تي حملن کي فوري طور تي ختم ڪرڻ لاءِ پاڪستان کان سهڪار جي درخواست ڪئي آهي.وزيراعظم آفيس مان جاري ڪيل بيان موجب وزيراعظم شهباز شريف ۽ لبنان جي وزيراعظم وچ ۾ ٽيليفونڪ رابطو ٿيو. وزيراعظم شهباز شريف لبنان خلاف اسرائيل جي جاري جارحيت جي سخت مذمت ڪئي ۽ لبنان ۾ هزارين قيمتي جانين جي زيان تي ڏک جو اظهار ڪيو. وزيراعظم چيو ته پاڪستان علائقائي امن لاءِ مخلصاڻي ڪوششن ۾ رڌل آهي ۽ ان ئي جذبي تحت ايران ۽ آمريڪا وچ ۾ امن ڳالهين جو بندوبست ڪيو پيو وڃي. وزيراعظم آفيس موجب، لبناني وزيراعظم، وزيراعظم شهباز شريف جي امن ڪوششن تي ٿورا مڃيا ۽ لبنان ۽ ان جي عوام تي حملن کي فوري ختم ڪرڻ لاءِ پاڪستان کان سهڪار جي درخواست ڪئي، ٻنهي اڳواڻن رابطي ۾ رهڻ تي اتفاق ڪيو.
لبناني وزيراعظم جي پاڪستان کان ايران جنگبندي ۾ لبنان جي شموليت جي تصديق ڪرڻ جي درخواست
ٻئي پاسي پرڏيهي خابرو اداري جي رپورٽ موجب، لبناني وزيراعظم جي آفيس مان جاري ڪيل بيان ۾ چيو ويو آهي ته نواف سلام ٽيليفونڪ گفتگو ۾ پاڪستان طرفان جنگبندي لاءِ ڪيل ڪوششن کي ساراهيو ۽ چيو ته ان ڳالهه جي تصديق ڪئي وڃي ته جنگبندي ۾ لبنان به شامل آهي ته جيئن گذريل ڏينهن جي اسرائيلي حملن جهڙن وڌيڪ حملن کي روڪي سگهجي. اها اڳڀرائي اهڙي وقت سامهون آئي آهي جڏهن گذريل ڏينهن اسرائيلي حملن ۾ لبنان ۾ 200 کان وڌيڪ ماڻهو شهيد ويا هئا. آمريڪا ۽ اسرائيل جو چوڻ آهي ته جنگبندي ۾ لبنان شامل ناهي جڏهن ته اسرائيل اعلان ڪيو آهي ته هو ايران جي حمايت يافته حزب الله خلاف ڪارروائيون جاري رکندو. هواڏنهن ايراني پارليامينٽ جي اسپيڪر خبردار ڪيو آهي ته ايران لبنان کي جنگبندي جو لازمي حصو سمجهي ٿو.
