قلندر بخش رند جي قتل جو معمو حل، جوابدار گرفتار

نواب شاهه(رپورٽ اي ڪي ڏاھري) بي سيڪشن ٿاڻي جي حد افضال شاھ ڪالوني ۾ ڪجھ ڏينھن اڳ قلندر بخش رند جي قتل جو معاملو پوليس حل ڪري ورتو ، مقتول قلندر بخش جو قاتل سندس ڊرائيور محمد علي بروھي نڪتو ، جوابدار کي پوليس گرفتار ڪري مقتول جي پٽ جي مدعيت ۾ ڪيس داخل ڪري ورتو، جڏھن ته قتل ۾ استعمال ٿيندڙ پسٽل ان ڏينھن ئي پوليس جي تحويل ۾ وٺي ڇڏيا ھئا ،اي ايس پي سٽي نواب شاهه ظفر صديق پنهنجي آفيس ۾ پريس ڪانفرنس ڪندي ميڊيا کي ٻڌايو ته قلندر بخش رند جو قاتل ، سندس ڊرائيور محمد علي بروھي آھي جنھن پيسن جي لاچ ۾ اچي ڪري قلندر بخش رند کي قتل ڪيو آھي ۽ جوابدار پڻ اعتراف ڪيو آھي ، پوليس جوابدار تي مقتول جي پٽ جي فرياد تي بي سيڪشن ٿاڻي تي ڪيس داخل ڪري ڇڏيو آھي ، اي ايس پي سٽي ظفر صديق وڌيڪ ٻڌايو ته جنهن ڏينهن قلندر بخش رند کي قتل ڪيو ويو. ، ان جو ڊرائيور محمد علي بروهي ، جيڪو گذريل ڏهن سالن کان ڊرائيور هو ۽ واقعي واري ھنڌ موجود هو ، ان وقت ان جي خاندان ۽ پاڙيسرين اطلاع ڏنو ته قلندر بخش رند خودڪشي ڪئي آهي. پوليس لاش قانوني ڪارروائي لاء پي ايم سي اسپتال آندو ۽ اسان کي شڪ ٿيو ته اهو خودڪشي نه پر قتل آھي جنھن کانپوء پوليس پنھنجي تفتيش شروع ڪئي جنھن مان خبر پئي ته مقتول قلندر بخش رند جو هڪ دوست ۽ هڪ ڪاروباري ساٿي الطاف حسين ڪيريو هو جنهن کان هن 12 لک رپيا ورتا هئا ۽ ان کي ان ئي ڪمري ۾ رکيو ويو هو جنهن ۾ مقتول کي قتل ڪيو ويو هو. قتل ۾ ھڪ يا وڌيڪ گوليون لڳل ھونديون  آهن ، پر هن کي ٻه گوليون لڳل هيون ۽ واقعي واري ھنڌ کان ٻن گولين جا خالي کول مليا  ۽ خودڪشي ڪندڙ ڪڏھن به پاڻ کي ٻه گوليون نه ٿو ھڻي سگھي  ۽ ان تي اسان کي شڪ ٿيو ۽ مقتول جي پٽن سان ملاقات ڪئي ۽ انهن جي شڪايت ۾ بي سيڪشن پوليس اسٽيشن ۽ ڊرائيور محمد علي بروهي تي ڪيس داخل ڪرايو. خفيه اطلاع تي شھر مان جوابدار کي گرفتار ڪيو ، ڪيس جي جاچ جاري آھي ، ۽ جوابدارن کي قانون مطابق سزا ڏني ويندي ، ان موقعي تي ايس ايڇ او بي سيڪشن محمد اقبال وساڻ ، پي آر او ياسين سولنگي ،اي ايس آئي علي رضا سولنگي پڻ موجود هو.

پهنجو تبصرو موڪليو