ڪراچي (اسٽاف رپورٽر) مڪاني ادارن واري صوبائي وزير ناصر حسين شاهه تحريڪ انصاف جي چيئرمينن تي دٻاءُ واري الزام کي رد ڪندي چيو آهي ته سندن ناراضگي سندس قيادت سان آهي، پي ٽي آءِ جا 30/40 ميم؟بر ووٽنگ ۾ حصو وٺڻ کان انڪار ڪري رهيا آهن جنهن کانپوءِ پيپلز پارٽي ۽ جماعت اسلامي جي ووٽن ۾ فرق صاف ظاھر ٿي ويو آهي. حافظ نعيم ذهني طور تي ميئر آهي پر اخلاقي طور تي ميئر پيپلز پارٽي جو هجڻ گهرجي. سامونڊي طوفان جي صورتحال ۾ سنڌ جي وڏي وزير پاڻ هدايتون جاري ڪيون ۽ نيوي، آرمي، رينجرز ۽ ضلعي انتظاميا آن بورڊ ھئا. اهڙن خيالن جو اظهار هن صوبائي وزير گيانچند اسراڻي سان گڏ سنڌ اسيمبلي ۾ ميڊيا سان ڳالهائيندي ڪيو. ان موقعي تي صحافين سان ڳالهائيندي هن چيو ته سنڌ جي سامونڊي پٽي مان 80 سيڪڙو ماڻهو لڏي ويا آهن ۽ جيڪي به ڪئمپن ۾ آهن انهن کي سهولتون فراهم ڪيون ويون آهن. هن چيو ته ڪراچي ۾ ڪيترائي بل بورڊز هٽايا ويا آهن ۽ احتياطي طور تي ڪراچي ۾ وڏا تعميراتي ڪم پڻ روڪيا ويا آهن. ناصر شاهه چيو ته سائڪلون ڪراچي ۾ ڪڪرن جي ڦاٽڻ جو ڪوبه خطرو ناهي، ترقياتي هنڌن تي احتياطي بورڊ لڳايا ويا آهن، ماڻهو انتظاميه جي هدايتن تي عمل ڪن. هن چيو ته ڪراچي جي شهرين کي گذارش آهي ته سمنڊ ڏانهن نه وڃن. ميئر سان ڳالهائيندي ناصر شاهه چيو ته حافظ نعيم ذهني طور تي ميئر بڻجي چڪو آهي، جماعت اسلامي واحد وڏي جماعت ناهي، اخلاقي طور کيس اسان جو ميئر ٿيڻ گهرجي. هن چيو ته اسان جماعت اسلامي کي ڊپٽي ميئر جي عهدي جي آڇ ڪئي آهي، ڪراچي جي بهتري ۽ ترقي لاءِ سڀني کي گڏ کڻي هلڻ چاهيون ٿا. هن چيو ته پي ٽي آءِ جي ڪيترن ميمبرن پنهنجي قيادت جي فيصلي سان اختلاف ڪيو آهي ۽ 30 ميمبر ووٽ نه ڏئي رهيا آهن، ان حساب سان اڪثريت اسان جي ھجڻ گھرجي. هن چيو ته 9 مئي جي واقعن کانپوءِ پي ٽي آئي جي مرڪزي اڳواڻ خان صاحب جو ساٿ ڇڏي ڏنو آهي جڏھن تھ هي يو سي چيئرمين آهن جيڪڏهن اسان کي دٻاءُ وجھڻو هجي ها ته اسان پنهنجي لاءِ ووٽ وٺي رهيا هجون ها، پر هو پاڻ کي ووٽ ڏيڻ نٿا چاھين . هن چيو ته جيڪڏهن حافظ نعيم کٽي ٿو ته سندس آجيان ڪنداسين ۽ کيس ڳچيءَ ۾ ھار پارائينداسين، جن ايم پي ايز تي ڪيس نه آهن اهي اجلاس ۾ اچي سگهن ٿا پرامن ماڻهن کي ڊڄڻ نه گهرجي. ناصر شاهه چيو ته جيل ۾ قيد پي ٽي آءِ جي سٽي ڪائونسلرن جي حاضري يقيني بڻائينداسين. سنڌ اسيمبلي ۾ مخالف ڌر جي اڳواڻ بابت سوال جو جواب ڏيندي هن چيو ته اسان مخالف ڌر جي اڳواڻ تي پابندي ناهي لڳائي، هو پنهنجي مرضي سان نٿا اچن ۽ مخالف ڌر جي اڳواڻ جو فيصلو اپوزيشن پارٽيون ڪنديون، اسان جمهوري پارٽي آهيون
