اسلام آباد(بيورو رپورٽ)وزيراعظم شهباز شريف چيو آهي ته ايندڙ مالي سال پاڪستان ۽ عوام جي آمدني ۾ واڌ جو سال ثابت ٿيندو.پنهنجي هڪ بيان ۾ وزيراعظم چيو ته 24-2023ع جي بجيٽ نوجوانن جي ترقي، ڪاروبار ۽ روزگار جي لاءِ تاريخي بجيٽ آهي، ان جي تعمير، ترقي ۽ خوشحالي ذريعي نااميدين کي ختم ڪرڻ، نئون اعتماد ۽ اميد بحال ڪرڻ جي ضرورت پوندي. هن چيو ته صنعت، زراعت، آءِ ٽي ۽ توانائي جي شعبن ۾ تيز رفتار ترقي ۽ معاشي استحڪام لاءِ بجيٽ رکي وئي آهي.وزيراعظم جو چوڻ آهي ته نوجوان ملڪ جو مستقبل آهن ۽ سندن مستقبل سنوارڻ هميشه وانگر منهنجي پهرين ترجيح آهي، نوجوانن کي آءِ ٽي، زراعت ۽ صنعت ۾ ڪاروبار شروع ڪري پاڪستان جي ترقي جو معمار بڻائينداسين.شهباز شريف چيو ته هو نوجوانن کي هڪ لک ليپ ٽاپ، ننڍا ۽ رعايتي قرض ڏئي رهيا آهن، انهن جي حوصلا افزائي لاءِ بجيٽ ۾ آءِ ٽي ڪاروبار ۾ ٽيڪس ڇوٽ ڏني وئي آهي، بهتري جو سفر تيز ٿيندو.هن چيو ته 24-2023ع جي بجيٽ ذريعي زرعي شعبي لاءِ مراعتون جاري رکيون وينديون، انهن قدمن سان فوڊ سيڪيورٽي حاصل ٿيندي، نوجوانن کي زرعي ترقي ۾ حصو وٺندڙ بڻائينداسين، هارين، نوجوان هارين کي زرعي ۽ ڪاروباري قرضن سان نوازيو ويندو، نوجوان ۽ پاڪستان خوشحال ٿيندا.
