تهران(ويب ڊيسڪ) ايران جي سپريم ليڊر آيت الله علي خامنه اي جي هڪ ڀيڻ بدري حسيني خامنه اي حڪومت خلاف بغاوت ڪندي احتجاج ڪندڙ عوام جي حمايت جو اعلان ڪيو آهي. هن ملڪ گير احتجاجن تي ڪريڪ ڊائون جي مذمت ڪئي آهي ۽ وڏي پئماني تي خوفزده انقلابي گارڊز تي زور ڀريو آهي ته هو هٿيار ڦٽا ڪن. اهڙو اظهار سندس فرانس ۾ رهندڙ پٽ طرفان جاري ڪيل خط ۾ ڪيو ويو آهي. ايران 16 سيپٽمبر تي پوليس جي حراست ۾ 22 سالن جي ڪرد ايراني عورت مهسا اميني جي موت کان پوءِ بدامني جي لپيٽ ۾ آهي ۽ سومر کان شروع ٿيندڙ ٽن ڏينهن جي عام هڙتال واري تحريڪ کي منهن ڏئي رهيو آهي. بدري حسيني خامنه اي، جيڪا ايران ۾ رهي ٿي ۽ آيت الله خامنه اي جي ڀيڻ آهي، اسلامي جمهوريه ايران جي مرحوم باني آيت الله روح الله خميني جي وقت کان وٺي هن جي ڀاءُ جي حڪمراني تائين شروع ٿيندڙ مذهبي اسٽيبلشمينٽ تي ڇتي تنقيد ڪئي وئي آهي ، خط، تاريخ ”ڊسمبر 2022“ ۾ لکيو ويو آهي. ”مان سمجهان ٿي ته هاڻي اهو اعلان ڪرڻ مناسب آهي ته مان پنهنجي ڀاءُ جي عمل جي مخالفت ڪريان ۽ مان خميني جي دور کان وٺي علي خامنه اي جي ظالم خلافت جي موجوده دور تائين اسلامي جمهوريه جي ڏوهن تي ماتم ڪندڙ سڀني مائرن سان پنهنجي همدردي جو اظهار ڪريان ٿي. هن جو اهوخط اربع تي سندس پٽ محمود مرادخاني جي ٽوئيٽر اڪائونٽ تي شيئر ڪيو ويو آهي. خط ۾ چيو ويو آهي ته ”علي خامنه اي جي انقلابي گارڊز ۽ ڀاڙيتو سپاهي جلد کان جلد پنهنجا هٿيار ڦٽا ڪن ۽ ماڻهن سان شامل ٿي وڃن ان کان اڳ جو گهڻي دير ٿي وڃي. انقلابي گارڊز ايران جي اشرافيه قوت آهي جنهن ملڪ جي مدد ڪئي آهي پراڪسي قائم ڪرڻ ۾ پوري وچ اوڀر ۾، ۽ هڪ وسيع ڪاروباري سلطنت به هلائين ٿا. اڱاري ڏينهن، اشرافيه قوت هڪ بيان جاري ڪيو هو جنهن ۾ عدليه تي زور ڀريو ويو هو ته ”فساد پرستن، ٺڳن ۽ دهشتگردن تي رحم نه ڪيو وڃي“، اهو ظاهر ڪري ٿو ته اختيارين جو ڪو به ارادو ناهي ته هو اختلاف راءِ تي ڪا سوديبازي ڪن. ايران جي عدليه جي ترجمان، مسعود سيٽيشي، اڱاري تي چيو آهي ته پنجن ماڻهن کي باسج مليشيا جي ميمبر روح الله اجميان جي قتل ۾ موت جي سزا ٻڌائي وئي آهي پر کين اڃا اپيل ڪري سگهن ٿا. نومبر ۾، بدري جي سرگرم ڌيءَ فريده مرادخاني کي اختيارين طرفان گرفتار ڪيو ويو هو جنهن پوري دنيا جي ملڪن کي تهران سان سمورا لاڳاپا ختم ڪرڻ جو مطالبو ڪيو هو. ايران جي صدر ابراهيم رئيسي گذريل ڏينهن يونيورسٽي ۾ شاگردن کي خطاب ڪيو ته ڪيترن ئي شاگردن ملائيت ختم ڪريو، خامنه اي مرده باد سميت حڪومت خلاف سخت نعريبازي ڪئي هئي. ياد رهي ته ايران ۾ گذريل ٽن مهينن کان زندگي جي هر شعبي جا ماڻهو لڳاتار احتجاج ڪري رهيا آهن، ڪاروبار بند آهي، سرڪاري مولوين جا روڊن تي عورتون پٽڪا لاهي رهيون آهن ۽ کين سر عام گڏيون هڻي رهيون آهن. ايران ۾ 39 سالن کان پردي جي پابندي ڪرائڻ لاءِ جوڙيل ’اخلاقي پوليس‘ جنهن مهسا اميني کي ايراني اسلامي انداز ۾ حجاب نه پائڻ جي ڏوهه۾ گرفتار ڪيو هو پوليس حراست ۾ کيس تشدد ڪري قتل ڪيو ويو هو، تنهن پوليس برگيڊ کي ختم ڪرڻ جو اعلان به ڪيو ويو هو، جنهن کي ايراني عوام رد ڪندي اسلام جي اوٽ ۾ لڳايل پابنديون ختم ڪرڻ، شهري آزادي بحال ڪرڻ لاءِ جدوجهد جاري رکڻ جو اعلان ڪيو هو. ايران ۾ هن وقت تائين 300 کان مٿي شهري قتل ڪيا ويا آهن، عورتون روڊن تي ٽائر ساڙي حجاب، برقعا، پوتيون ۽ وارن جون چڳون ساڙي احتجاج ڪن پيون. ايران جي حڪومت آمريڪا ۽ اسرائيل سميت مختلف مخالف ملڪن تي بغاوت جو الزام لڳائي رهيو آهي.
