نيويارڪ (ويب ڊيسڪ) عالمي وبا ڪورونا جي ٽئين لهر سموري دنيا جي لاءِ خطري جي گهنٽي وڄائي ڇڏي آهي.ڪورونا جي ٽئين لهر دوران وڌندڙ ڪورونا ڪيسن کي نظر ۾ رکندي جرمن چانسلر انجيلا مرڪل جو چوڻ آهي ته ٻيهر لاڪ ڊائون جي طرف وڃڻو پوندو. پرڏيهي ميڊيا موجب فرانس ۾ هن مهيني کان 16 علائقن ۾ ٻيهر لاڪ ڊائون لاڳو ڪيو ويندو. جڏهن ته پولينڊ ۾ سڀاڻي کان 3 هفتن جي لاءِ جزوي لاڪ ڊائون جي شروعات ڪئي ويندي.پرڏيهي ميڊيا جي رپورٽن ۾ ٻڌايو ويو آهي ته برازيل ۾ ڪورونا ڪيسن جي صورتحال خراب ٿيڻ سبب ملڪ گير لاڪ ڊائون جو مطالبو زور وٺڻ لڳو آهي. ٻئي طرف ڪورونا جي ٽئين لهر کي نظر ۾ رکندي اسپين به ايسٽر جي موڪلن ۾ سفري پابندين جو فيصلو ڪري ورتو آهي.ياد رهي ته آمريڪا ۾ ڪورونا کان بچاءُ جي لاءِ ويڪسينيشن جو عمل جاري آهي. جڏهن ته برطانيه جي وزيراعظم بورس جانسن به ايسٽرازينيڪا ويڪسين لڳرائي آهي. برطانيه ۾ ننڍي عمر جي ٻارن جي لاءِ اسڪول کولڻ بابت نيون هدايتون جاري ڪيون ويون آهن.
