واشنگٽن(ويب ڊيسڪ) امريڪا جي چيئرمين جوائنٽ چيفس آف اسٽاف جنرل مارڪ ملي ان ڳالهه جي تصديق ڪئي آهي ته چين پهريون ڀيرو ايٽمي صلاحيت رکندڙ ميزائل جو تجربو ڪيو آهي، جنهن جو دفاع ڪرڻ تمام ڏکيو هوندو. پينٽاگون جي اعليٰ جنرل جو چوڻ آهي ته چين پاران گردش ڪندڙ هائپرسونڪ ميزائل جو تازو تجربو سوويت يونين جي دنيا جي پهرين سيٽلائيٽ اسپوتنڪ سان مشابهت رکي ٿو، جنهن کي هنن 1957ع ۾ ڪاميابيءَ سان آزمايو هو، اها سپر پاور خلائي ڊوڙ جي شروعات هئي. بلومبرگ ٽي وي سان ڳالهائيندي مارڪ ملي چيو ته اسان هائپرسونڪ ويپن سسٽم جي تجربي جو شاندار مظاهرو ڏٺو، جيڪو تمام گهڻو پريشان ڪندڙ آهي. ”مون کي خبر ناهي ته اهو بلڪل اسپوتنڪ طرز جو هو يا نه، پر مان سمجهان ٿو ته اهو ان جي بلڪل ويجهو آهي،“ هن وڌيڪ چيو ته “اهو هڪ تمام اهم ايڊوانس ٽيڪنالاجي جو واقعو هو ۽ اسان سڀني جي ان تي نظرآهي،” هن چيو ته ان کان اڳ، پينٽاگون ان تجربي جي تصديق ڪرڻ کان انڪار ڪيو هو، جيڪو پهريون ڀيرو 16 آڪٽوبر تي فنانشل ٽائمز پاران ٻڌايو ويو هو. اخبار جو چوڻ آهي ته آگسٽ ۾ ڪيل تجربي آمريڪا کي حيران ڪري ڇڏيو هو. فنانشل ٽائمز موجب، ميزائل گهٽ اونچائي تي زمين جي چوڌاري چڪر ڪاٽيو۽ آواز جي رفتار کان پنج ڀيرا وڌيڪ تيز هو، پر اهو پنهنجي مقصد کان 30 ڪلوميٽر (19 ميل) کان وڌيڪ پهرين ڪري پيو. هائپرسونڪ ميزائلن ۾ جديد ٽيڪنالاجي آهي، ڇاڪاڻ ته اهي گهٽ اڏام ڪن ٿا ۽ بيلسٽڪ ميزائلن جي مقابلي ۾ ان کي ڳولڻ وڌيڪ ڏکيو آهي، اهي تيزيءَ سان ٽارگيٽ تائين پهچي سگهن ٿا. اهو ميزائل کي وڌيڪ خطرناڪ بڻائي ٿو جيڪڏهن اهو ايٽمي وار هيڊ سان ڀريل هجي. آمريڪا، روس، چين ۽ اتر ڪوريا سڀني هائپرسونڪ ميزائل جا تجربا ڪيا آهن، جڏهن ته ٻيا ڪيترائي ملڪ اها ٽيڪنالاجي حاصل ڪرڻ جي ڪوشش ڪري رهيا آهن. چين 2019 ۾ ڊي ايف-17 هائپرسونڪ مڊ رينج ميزائل ٺاهڻ جو انڪشاف ڪيو هو، جيڪو 2,000 ڪلوميٽرن جو سفر ڪري سگهي ٿو ۽ ايٽمي وار هيڊز کڻي سگھي ٿو. فنانشل ٽائمز ٻڌايو آهي ته ميزائل، جنهن جي وسيع رينج آهي، پنهنجي هدف کي مارڻ لاءِ خلا ۾ واپس اچڻ کان اڳ مدار ۾ لانچ ڪري سگهجي ٿو.
