تهران (ويب ڊيسڪ) انقلابي گارڊز وچ ايران ۾ هڪ آمريڪي ايف-35 جهاز کي ڪيرائڻ جي دعويٰ ڪئي آهي، متضاد رپورٽن سان ته تباهه ٿيل جهاز جي پائلٽ کي ايران ۾ سيڪيورٽي فورسز گرفتار ڪيو آهي.ايران هرمز جي آبنائي جي ويجهو هڪ آمريڪي اي-10 فائٽر جيٽ کي ڪيرايو، پر پائلٽ فرار ٿيڻ ۾ ڪامياب ٿي ويو. هڪ آمريڪي ايف-15 کي به نشانو بڻايو ويو، ۽ ان کي بچائڻ لاءِ ايندڙ ٻن هيلي ڪاپٽرن تي به حملو ڪيو ويو. اهي هيلي ڪاپٽر پائلٽ کي بچائي رهيا هئا ۽ کڻي وڃي رهيا هئا. انهن هيلي ڪاپٽرن جو عملو باهه ۾ زخمي ٿي پيو، پر اهي لهي ويا.
صدر ٽرمپ جي ايران کي نئين ڌمڪي
صدر ٽرمپ ٽرٿ سوشل تي پنهنجي پوسٽ ۾ چيو آهي ته ايران 48 ڪلاڪن ۾ معاهدو نه ڪيو ته قيامت يعني وڏو قهر برپا ڪنداسين. “ياد ڪريو جڏهن مون ايران کي ڏهه ڏينهن ڏنا هئا ته معاهدو ڪريو يا هرمز لنگهه کوليو. وقت ختم ٿيندو پيو وڃي.هڪ ٻي پوسٽ ۾، جيڪا ان کان ٿوري دير اڳ ڪئي وئي، جنهن ۾ گهڻو ڪري ٽيرفن (محصولن) سان آمريڪي معيشت کي ٿيندڙ فائدن بابت ڳالهه ڪئي وئي هئي، هن آخر ۾ لکيو: “اهو سڀ ڪجهه، ۽ ساڳئي وقت هڪ ايٽمي ايران کان ڇوٽڪارو حاصل ڪرڻ لاءِ آهي.
ايراني قبائلين پاران ٻن بليڪ هاڪ هيليڪاپٽرن تي فائرنگ
ايران جو چوڻ آهي ته ايراني جبلن ۾ رهندڙ ٻن خانه بدوش قبيلن ٻن آمريڪي بليڪ هاڪ هيليڪاپٽرن کي نشانو بڻايو آهي۔ هڪ بيان ۾ اسلامي انقلابي گارڊ ڪور (IRGC) چيو آهي ته “ڪوھگيلويه ۽ بوئيراحمد صوبي جا خانه بدوش ۽ بختياري” ماڻهن “ايراني هٿياربند فوجن جي موجودگي کان پري، ڏکين جابلو علائقن ۾ ڪاميابي سان ٻن بليڪ هاڪ هيليڪاپٽرن کي نشانو بڻايو آهي”۔ بي بي سي تبصري لاءِ آمريڪي سينٽڪام سان رابطو ڪيو آهي۔ خانه بدوش ۽ بختياري روايتي طور ايران جا قبائلي ماڻهو سمجهيا وڃن ٿا، جيڪي پنهنجي سخت موسمي لڏپلاڻ لاءِ سڃاتا وڃن ٿا۔ اهي عام طور تي پنهنجي مال ۽ ڪيمپن کي جهنگلي جانورن ۽ چوري کان بچائڻ لاءِ پري جابلو علائقن ۾ رائفلون کڻندا آهن۔ بي بي سي ويريفاءِ جمعي جي ڏينهن جي هڪ وڊيو جي تصديق ڪئي آهي، جنهن ۾ لڳي ٿو ته ٽي هٿياربند ماڻهو گهٽ ۾ گهٽ ٻن بليڪ هاڪ هيليڪاپٽرن ڏانهن فائرنگ ڪري رهيا آهن۔ سي بي ايس، جيڪو بي بي سي جو آمريڪي ساٿي ادارو آهي، رپورٽ ڪيو آهي ته هڪ هيليڪاپٽر جيڪو F-15E جهاز مان بچايل پائلٽ کي کڻي وڃي رهيو هو، ان تي ننڍن هٿيارن سان فائرنگ ڪئي وئي، جنهن ۾ عملي جا ڪجهه ميمبر زخمي ٿيا، پر اهو محفوظ نموني لهي ويو۔ ڪوھگيلويه ۽ بوئيراحمد صوبي جي ڊپٽي گورنر پڻ چيو ته جمعي تي مقامي ماڻهن “دشمن هيليڪاپٽرن” تي رائفلن سان فائرنگ ڪئي، جنهن ڪري “انهن کي صوبي ۾ ڪٿي به لهڻ کان روڪيو ويو”۔
ايران ۾ 55 لائبرريون آمريڪا ۽ اسرائيل جي حملن ۾ تباهه
آمريڪا ۽ اسرائيل جي حملن سبب ايران جي 55 لائبريرين کي سخت نقصان پهتو آهي، جن مان ٻه مڪمل طور تباهه ٿي چڪيون آهن، الجزيره ايران جي تسنيم نيوز ايجنسي جو حوالو ڏيندي رپورٽ ڪيو آهي، جنهن ملڪ جي پبلڪ لائبريريز ايسوسيئيشن جي سربراهه جو بيان نقل ڪيو آهي۔ جنگ دوران ايران جي درجنين ثقافتي ۽ ورثي وارن هنڌن کي به نقصان رسيو آهي، جن ۾ گلستان محل پڻ شامل آهي، جيڪو يونيسڪو جي عالمي ورثي واري فهرست ۾ شامل آهي۔
جوهري پلانٽ تي چوٿون ڀيرو حملو، تابڪاري خارج ٿي ته گلف ۾ به ڪو جيئرو نه هوندو
جيئن اسان هاڻي ئي رپورٽ ڪيو آهي، آمريڪا-اسرائيل جي حملي ايران ۾ هڪ جوهري سائيٽ جي ويجهو علائقي کي نشانو بڻايو آهي، جنهن ۾ اڄ صبح هڪ ماڻهو مارجي ويو آهي، ايران جي تسنيم نيوز ايجنسي موجب. هاڻي ايران جي ائٽمي توانائي تنظيم جو چوڻ آهي ته جيڪو ماڻهو مارجي ويو، اهو ان پلانٽ جي سيڪيورٽي عملي جو حصو هو، ۽ سهولت جي هڪ پاسائتي عمارت کي نقصان پهتو آهي. تسنيم موجب، هن حملي سبب هن وقت ڪا به تابڪاري خطري واري صورتحال پيدا ناهي ٿي. ٻئي پاسي عباس عراقچي چيو آهي ته ايٽمي پلانٽ تي هي چوٿون حملو ٿيو آهي، جيڪڏهن تابڪاري پکڙي تي گلف ۾ به ڪو جيئرو نه رهندو.
ايران جي وضاحت جي ڀليڪار ڪريون ٿا، اسحاق ڊار
نائب وزيراعظم ۽ پرڏيهي وزير اسحاق ڊار ايران جي پرڏيهي وزير عباس عراقچي طرفان جاري ڪيل وضاحت جي ساراهه ڪئي، جنهن ۾ چيو ويو ته تهران جي قيادت اسلام آباد ۾ امن ڳالهين لاءِ اچڻ کان انڪار ناهي ڪيو. “منهنجا پيارا ڀاءُ، مان اوهان جي وضاحت کي سچي دل سان ساراهيان ٿو.” ڊار عراقچي جي ايڪس (X) تي ڪيل پوسٽ جي جواب ۾ لکيو.
اسلام آباد وچڻ کان ڪڏهن انڪار ناهي ڪيو، پاڪستان جا شڪر گذار آهيون، عراقچي
ايران جي پرڏيهي وزير عباس عراقچي چيو آهي ته تهران “ڪڏهن به اسلام آباد وڃڻ کان انڪار ناهي ڪيو” ته جيئن جاري جنگ بابت ممڪن ڳالهين ۾ شرڪت ڪري سگهجي. هن چيو ته “آمريڪي ميڊيا ايران جي موقف کي غلط نموني پيش ڪري رهي آهي.” عراقچي زور ڏيندي چيو ته “اسان پاڪستان جي ڪوششن لاءِ دل جي گهراين سان شڪرگذار آهيون ۽ ڪڏهن به اسلام آباد وڃڻ کان انڪار ناهي ڪيو. جيڪو اسان لاءِ اهم آهي، اهو انهن شرطن جو تعين آهي جيڪي اسان تي مڙهيل غيرقانوني جنگ جي حتمي ۽ دائمي خاتمي کي يقيني بڻائين.” هن هڪ وڊيو پڻ شيئر ڪئي، جنهن ۾ ايراني ماڻهو پاڪستان جا جهنڊا لوڏيندي نظر اچن ٿا، جيڪو پاڪستان جي موقف ۽ ان جي عوام جي حمايت ۾ شڪريي جو اظهار لڳي ٿو.
امن فوج جا 3 انڊونيشيائي اهلڪار لبنان ۾ ڌماڪي ۾ زخمي
جڪارتا ۾ گڏيل قومن جي انفارميشن سينٽر (UNIC) موجب، لبنان جي علائقي عديسه (Adaisseh) ويجهو جمعي ڏينهن زخمي ٿيل 3 امن فوجي انڊونيشيائي هئا. لبنان ۾ گڏيل قومن جي عبوري فوج (UNIFIL) جو چوڻ آهي ته انهن مان ٻه سخت زخمي ٿيا آهن. ڌماڪي جو سبب اڃا تائين معلوم نه ٿي سگهيو آهي. اهو واقعو انهن ڏينهن کانپوءِ پيش آيو آهي، جڏهن ڏکڻ لبنان ۾ 3 انڊونيشيائي امن فوجي مارجي ويا هئا۔
آمريڪا جو ايران ۾ تباهه ٿيل جنگي جهاز
آمريڪي F-15E اسٽرائيڪ ايگل فائٽر جهاز پهريون ڀيرو 1988ع ۾ فراهم ڪيو ويو. هي هڪ گهڻ-ڪردار جنگي جهاز آهي، جيڪو هوا کان هوا ۾ مقابلي ۽ زميني حملي جي مشنن لاءِ استعمال ٿيندو آهي. هن جهاز ۾ ٻه عملي جا ميمبر هوندا آهن: هڪ پائلٽ ۽ هڪ هٿيارن جو آفيسر. جڏهن ان جهاز پهريون ڀيرو اڏام ڪئي، تڏهن ان جي قيمت 31 ملين ڊالر هئي، پر نوان ماڊل لڳ ڀڳ 100 ملين ڊالر تائين پهچي ويا آهن.
ايران ۾ پنهنجن پائلٽن کي بچائڻ لاءِ ايندڙ آمريڪي هيلي ڪاپٽرن تي فائرنگ
آمريڪي ميڊيا موجب، ڳولا ۽ بچاءُ جي آپريشن ۾ شامل ٻن هيلي ڪاپٽرن کي نشانو بڻايو ويو. ٻئي هيلي ڪاپٽر تباهه ٿيل جنگي جهاز جي پائلٽن کي ڳولي رهيا هئا.
آمريڪي A-10 جهاز کي ڪيرائي ڇڏيو: ايراني ٽي وي
ايراني ٽي وي موجب، A-10 جهاز کي آبنائے هرمز جي علائقي ۾ ڪيرايو ويو.
ايران اسرائيل تي فتح ميزائل فائر، عمارتون تباهه، گاڏين کي باهه
ايران اسرائيلي گادي واري هنڌ تل ابيب ۽ حيفا سميت مختلف شهرن تي فتح ميزائل فائر ڪيا، عمارتن کي تباهه ڪيو ۽ گاڏين کي باهه ڏني. اسرائيل جو دفاعي نظام ايراني حملي دوران ميزائلن کي روڪڻ ۾ ناڪام رهيو.ايراني انقلابي گارڊز جي ترجمان هڪ ڀيرو ٻيهر خطي ۾ آمريڪي ۽ اسرائيلي انفارميشن ۽ ڪميونيڪيشن ٽيڪنالاجي ڪمپنين کي نشانو بڻائڻ جي ڌمڪي ڏني ۽ واضح ڪيو ته انقلابي گارڊز جي نظرن کان ڪجهه به لڪيل ناهي.
ڪجهه وڌيڪ وقت سان اسان آساني سان آبنائي هرمز کي کولي سگهون ٿا: ڊونلڊ ٽرمپ
آمريڪي صدر ڊونلڊ ٽرمپ دعويٰ ڪئي ته ڪجهه وڌيڪ وقت سان، اسان آساني سان هرمز جي آبنائي کي کولي سگهون ٿا، تيل حاصل ڪري سگهون ٿا ۽ پئسا ڪمائي سگهون ٿا.ان کان اڳ، ٽرمپ ايران جي پلن ۽ بجلي گهرن کي ڌماڪي سان اڏائڻ جي ڌمڪي ڏني هئي ۽ چيو هو ته هن اڃا تائين ايران ۾ بچيل شيءِ کي تباهه ڪرڻ شروع نه ڪيو آهي، نئين حڪومت جي قيادت کي خبر آهي ته ڇا ڪيو ويو آهي ۽ ڇا ڪرڻو آهي.ايراني صدر مسعود پيشڪشيان، آمريڪي صدر ٽرمپ جي ڌمڪي جي جواب ۾ چيو ته تاريخ انهن ماڻهن سان ڀريل آهي جن ڏوهارين جي سامهون خاموشي جي ڳري قيمت ادا ڪئي، ايران کي پٿر جي دور ۾ موڪلڻ جي ڌمڪي جو مطلب هڪ وڏي جنگي ڏوهه کان سواءِ ڇا آهي؟
آمريڪي سپاهي عيسيٰ لاءِ وڙهي رهيا آهن: آمريڪي جنگ جو سيڪريٽري
آمريڪي جنگ جو سيڪريٽري ايران تي حملن کي مذهبي رنگ ڏيڻ جي ڪوشش ڪئي، هن چيو ته آمريڪي سپاهي عيسيٰ لاءِ وڙهي رهيا آهن، پيٽ هيگسٽ پوپ ليو کان درخواست ڪئي ته هو عيسيٰ لاءِ جنگ کٽڻ لاءِ دعا ڪري.آمريڪي درخواست تي ڪيٿولڪ عيسائين جي روحاني اڳواڻ جو اختلاف به سامهون آيو، پوپ ليو اهڙين دعائن ۾ پنهنجي عدم دلچسپي جو اظهار ڪيو ۽ چيو ته عيسائي مشن کي تسلط جي خاطر مسخ ڪيو ويو آهي، اهڙيون شيون عيسيٰ جي طريقي کان بلڪل مختلف آهن، خدا زندگيون تباهه ڪرڻ جي ترغيب نه ڏني آهي، پر انهن کي پيدا ڪرڻ جي.
ايران ۾ جنگي جهاز جي تباهي ڳالهين تي اثر انداز نه ٿيندي: آمريڪي صدر
آمريڪي صدر ڊونلڊ ٽرمپ چيو ته ايف 16 جهاز جي تباهي ايران سان ڳالهين تي اثر انداز نه ٿيندي، هن چيو ته هي هڪ جنگ آهي ۽ اسان جنگ ۾ آهيون.
سلامتي ڪائونسل ۾ آبنائي هرمز کي زبردستي کولڻ جي قرارداد تي ووٽنگ رد
قرارداد تي ووٽنگ لاءِ ڪا نئين تاريخ جو اعلان نه ڪيو ويو آهي. فرانس، چين ۽ روس مسودي جي قرارداد جي مخالفت ڪئي، ۽ سلامتي ڪائونسل جي 10 ٻين غير مستقل ميمبرن ۾ اختلاف پيدا ٿيا. ايراني پرڏيهي وزير عباس عراقچي چيو ته آبنائے هرمز تي ووٽنگ جهڙا قدم صورتحال کي وڌيڪ پيچيده بڻائيندا.
پاڪستان نه رڳو ايران خلاف جارحيت جي مذمت ڪري ٿو پر ايران سان گڏ به بيٺو آهي: علامه طاهر اشرفي
علامه طاهر اشرفي چيو ته پاڪستان جو موقف آهي ته اسلامي ملڪن تي حملا به ناقابل قبول آهن. سڄي دنيا اسان جي اڳواڻن جي امن قائم ڪرڻ جي ڪوششن جي تعريف ڪري رهي آهي.
نئين جديد ترين هوائي دفاعي نظام 2 جهاز، 5 ڊرون ۽ 2 ڪروز ميزائل تباهه ڪري ڇڏيا: انقلابي گارڊز
آمريڪي جهازن کي ڪيرائڻ تي انقلابي گارڊز جو رد عمل پڻ سامهون آيو آهي. انقلابي گارڊز پاران جاري ڪيل بيان ۾ چيو ويو ته اڄ آمريڪا لاءِ ڪارو ڏينهن آهي. نئين جديد ترين هوائي دفاعي نظام 2 جهاز، 5 ڊرون ۽ 2 ڪروز ميزائل تباهه ڪري ڇڏيا. رپورٽون آهن ته هڪ عملو جهاز مان محفوظ طور تي ٻاهر نه نڪري سگهيو. ترجمان چيو ته ايراني سرحدون دشمن لاءِ خطرناڪ بڻجي ويون آهن.
سعودي عرب ۾ آمريڪي سفارتخاني کي ايراني حملي ۾ ناقابل تلافي نقصان پهتو: آمريڪي عملدارن جو اعتراف
آمريڪي عملدارن اعتراف ڪيو آهي ته ايران کي 3 مارچ تي سعودي عرب ۾ آمريڪي سفارتخاني تي حملي ۾ ناقابل تلافي نقصان پهتو ۽ حملي مان نقصان بابت سيڪريٽري آف اسٽيٽ مارڪو روبيو جو بيان غلط هو.آمريڪي ميڊيا موجب، رياض ۾ آمريڪي سفارتخاني تي حملي سبب عمارت ۾ باهه لڳڻ سان وڏي تباهي ٿي، عمارت جا محفوظ ترين حصا به متاثر ٿيا، ۽ باهه جيڪا اڌ ڏينهن تائين نه وسامي سگهي.آمريڪي عملدارن پاران دعويٰ ڪئي وئي ته هڪ ايراني ڊرون عمارت سان ٽڪرائجي ويو ۽ هڪ ٻيو ڊرون هڪ منٽ اندر ان جي ٺاهيل سوراخ ۾ ڪري پيو. ايران پرنس سلطان ايئر بيس تي به حملو ڪيو هو، جنهن ۾ هڪ AWACS جهاز ۽ هڪ ريفيولنگ جهاز کي به نشانو بڻايو ويو هو. آمريڪي ميزائل دفاعي نظام ٻنهي حملن کي روڪڻ ۾ ناڪام رهيو.
ايران جا اسرائيل تي تازا حملا، ڪيترائي گهر تباهه، ڪيترن ئي هنڌن تي باهه
ايران جوابي ڪارروائي ۾ اسرائيل تي ميزائل فائر ڪيا. ميڊيا رپورٽن موجب، ايراني ميزائل حملي ۾ اسرائيلي شهر روش هين ۾ ڪيترائي گهر تباهه ٿي ويا، ميزائل جو ملبو ڪيترن ئي هنڌن تي ڪري پيو، اسرائيلي پوليس ۽ بم ڊسپوزل يونٽ آپريشن ۾ مصروف آهن، اسرائيلي اختيارين شهرين کي متاثر علائقن کان پري رهڻ جي هدايت ڪئي آهي.
تهران ۾ آمريڪي ۽ اسرائيلي هوائي حملي ۾ 3 ماڻهو شهيد
ايراني وزارت صحت موجب 28 فيبروري کان جاري حملن ۾ شهيدن جو انگ 2000 کان وڌي ويو آهي، جڏهن ته 26000 کان وڌيڪ زخمي ٿيا آهن. صحت واري وزارت موجب حملن ۾ 600 کان وڌيڪ اسڪولن ۽ تعليمي ادارن کي به نقصان پهتو آهي.
ايران 48 ڪلاڪن جي جنگ بندي جي آمريڪي تجويز کي رد ڪري ڇڏيو
ايراني ميڊيا ذريعن جو حوالو ڏيندي دعويٰ ڪئي آهي ته اها تجويز اربع تي ڪنهن ٻئي ملڪ طرفان پيش ڪئي وئي هئي، پر ملڪ جو نالو نه ٻڌايو ويو آهي.ان دوران، آمريڪي اخبار واشنگٽن پوسٽ دعويٰ ڪئي آهي ته ايران ۽ آمريڪا جي وچ ۾ جنگ بندي جي حوالي سان پاڪستان جي اڳواڻي ۾ علائقائي ملڪن پاران ڪوششن جو تازو دور ختم ٿي ويو آهي. اخبار موجب، ايران اسلام آباد ۾ آمريڪي عملدارن سان ملڻ لاءِ تيار ناهي.
