اسلام آباد(رپورٽ اياز مهر)پاڪستان جي ڪسٽم ڊيوٽي رعايتن واري نظام ۾ گاڏين جو شعبو سڀ کان وڌيڪ غالب حيثيت رکي ٿو، جيڪو اربين رپين جي مقامي رعايتن مان فائدو حاصل ڪري رهيو آهي.
مالي سال 2024-25 دوران ڪسٽم ڊيوٽي جي مد ۾ اندازي مطابق 499.14 ارب رپين جي ڪل ٽيڪس خرچن مان گاڏين جي صنعت سان لاڳاپيل ادارن سڀ کان وڏو حصو حاصل ڪيو.
خاص طور تي، آٽوموٽو شعبي جي اوريجنل ايڪوپمينٽ مينوفيڪچررز (OEMs) کي SRO 656(1)/2006 تحت 219.60 ارب رپين جي وڏي رعايت ملي.
ان کان علاوه، آٽوموٽو وينڊرز (پرزا ٺاهيندڙ ۽ فراهم ڪندڙ ڪمپنيون) SRO 655(1)/2006 تحت الڳ طور 41.70 ارب رپين جا فائدا حاصل ڪيا.
وڌيڪ اهو ته مڪمل طور جدا ٿيل گاڏين جا ڪِٽ (Completely Knocked-Down يا CKD Kits) ۽ برقي گاڏين (EVs) لاءِ مخصوص پرزن کي پنجين شيڊيول جي حصي V(B) تحت اضافي 23.86 ارب رپين جي رعايت ملي.
مجموعي طور تي، گاڏين جي شعبي سان لاڳاپيل اهي رعايتون قومي خزاني پاران ڇڏيل ڪسٽم آمدني جي اڌ کان به وڌيڪ حصي جي برابر آهن.
