واشنگٽن(ويب ڊيسڪ) امريڪا پاڪستان لاءِ ڊونلڊ اَرمين بلوم کي نئون سفير مقرر ڪرڻ جو فيصلو ڪيو آهي. ٽن سالن کان پاڪستان ۾ آمريڪا جو ڪو سفير نه رهيو آهي. مسٽر بلوم ڪابل ۾ به رهيو آهي پر ڪيريئر جو ڳڄ حصو هن ڪويت، بغداد، مصر، اسرائيل، تيونس، لبيا، فلسطين، اسرائيل ۽ ٻين ملڪن ۾ سفارتي ذميواريون نڀائي چڪو آهي.هو عربي ٻولي رواني سان ڳالهائيندو آهي. وائيٽ هائوس پاران جاري ڪيل بيان ۾ سندس نامزدگي جو اعلان ڪيو ويو آهي. امريڪا ۾ سفيرن جي نامزدگي بعد حتمي منظوري سينيٽ ڏيندي آهي. هن کي اهڙي وقت ۾ نامزد ڪيو ويو آهي جڏهن افغانستان مان آمريڪا جي نڪرڻ بعد سندن حمايت يافتا حڪومت ختم ٿي وئي ۽ طالبان اقتدار تي قبضو ڪيو آهي. خطي ۾ چين جو اثر وڌي رهيو آهي. امريڪا ۽ پاڪستان جا تعلقات به ايترا سٺا نه آهن.
