اسلام آباد(بيورو رپورٽ) حڪومت تحريڪ انصاف جي 24 نومبر جي اسلام آباد مارچ جي سڏ کي منهن ڏيڻ لاءِ تياريون شروع ڪري ڇڏيون آهن.حڪومت پي ٽي آءِ جي احتجاج ۽ ممڪنه ڌرڻي کي منهن ڏيڻ لاءِ تياريون شروع ڪري ڇڏيون آهن ۽ ان حوالي سان وفاقي راڄڌاني ۾ سيڪيورٽي جا انتظام سخت ڪرڻ جو فيصلو ڪيو ويو آهي.اسلام آباد پوليس 22 نومبر کان 9 هزار رينجرز ۽ ايف سي اهلڪارن کي طلب ڪري ورتو آهي، جڏهن ته پوليس اختيارين کان اينٽي رائيٽس ڪٽس به طلب ڪيون ويون آهن.اسلام آباد ۾ 2 مهينن لاءِ قلم 144 پڻ لاڳو ڪئي وئي آهي، جنهن تحت هر قسم جي عوامي ميڙ، جلوس، ريلي ۽ 5 يا وڌيڪ ماڻهن جي مظاهرن تي پابندي هوندي.ذريعن موجب پي ٽي آءِ اسلام آباد ۾ به احتجاج جون تياريون مڪمل ڪري ورتيون آهن ۽ پارٽي ذريعن دعويٰ ڪئي آهي ته ان سلسلي ۾ 10 هزار ڪارڪن اسلام آباد، راولپنڊي ۽ ڀرپاسي وارن علائقن ۾ پهچي چڪا آهن.ذريعن موجب پي ٽي آءِ پنهنجي باني کي جيل مان ڪڍڻ لاءِ پرعزم آهي ۽ چيو پيو وڃي ته اسان جو مينڊيٽ واپس اچڻو آهي، جڏهن ته مطالبن جي مڃتا تائين واپس نه وڃڻ جو به اعلان ڪيو پيو وڃي.
