ڪراچي (اسٽاف رپورٽر) لاهور پوليس منشيات فروش ملزم انمول عرف پنڪي ۽ سندس اڳوڻي مڙس ناصر جي جاچ ۾ اهم انڪشاف ڪيا آهن.پوليس موجب، انمول عرف پنڪي جو اڳوڻو مڙس ناصر ڀائرن سان گڏ هن ڪاروبار ۾ شامل هو. ناصر پنهنجن ٻن ڀائرن سان گڏ لاهور آيو، جتي ٽنهي شروعات ۾ گيسٽ هائوسز ۽ شراب جي ڪاروبار ۾ ڪم ڪرڻ شروع ڪيو. بعد ۾، ناصر پنهنجن ڀائرن، هڪ دوست ۽ پنهنجي ڀاڻيجي سان گڏ ڪوڪين جو ڪاروبار شروع ڪيو.جاچ ڪندڙ عملدارن جو چوڻ آهي ته ناصر پنڪي کي ڪوڪين ٺاهڻ جو ماهر بڻايو، جنهن کان پوءِ جوڙي لاهور، ڪراچي ۽ ملڪ جي ٻين شهرن ۾ ڪوڪين فراهم ڪئي.پوليس موجب، ناصر بعد ۾ هن ڪاروبار کي پنهنجن ڀائرن سان گڏ ڪراچي منتقل ڪيو، جتي نيٽ ورڪ کي وڌيڪ وڌايو ويو. ملزم پنڪي 2021 ۾ رانا اڪرم جي چوڻ تي ناصر کي طلاق ڏئي ڇڏي.
