ڪراچي (اسٽاف رپورٽر) بلاول ڀٽو زرداري ٻڌايو آهي ته اڳوڻو صدر آصف علي زرداري ويڊيو لنڪ ذريعي ڪل جماعتي ڪانفرنس ۾ شريڪ ٿيندو. هوڏانهن مسلم ليگ (ن) به اعلان ڪيو آهي ته ميان شهباز شريف جي سربراهي ۾ 11 رڪني وفد شرڪت ڪندو جنهن ۾ مريم نواز به شامل هوندي. گذريل ڏينهن پاڪستان پيپلزپارٽي پاران اڳوڻي وزيراعظم نوازشريف کي آل پارٽيز ڪانفرنس ۾ وڊيو لنڪ ذريعي شرڪت جي دعوت ڏني هئي. بلاول ڀٽو نوازشريف سان رابطو ڪري سندس خيريت معلوم ڪئي ۽ دعوت ڏني. بلاول ٽوئيٽ ڪندي چيو ته هُن نوازشريف کي 20 سيپٽمبر تي سڏايل اَي پي سي ۾ وڊيو لنڪ ذريعي شرڪت جي دعوت به ڏني، جنهن جي ميزباني پيپلزپارٽي ڪري رهي آهي. پيپلزپارٽي جي ذريعن جي دعويٰ آهي ته نوازشريف اي پي سي ۾ وڊيو لنڪ ذريعي شرڪت ڪرڻ تي راضپو ظاهر ڪيو آهي. ذريعن جو چوڻ آهي ته جيڪڏهن ميان نواز شريف ويڊيو لنڪ تي لنڊن کان اي پي ي ۾ شريڪ ٿيو ته صدارت کائنس ڪرائي ويندي. ٻئي پاسي حڪومت به سرگرم آهي ۽ ميان نواز شريف جو اي پي سي کي خطاب آن ايئر نه ڪرن لاءِ پيمرا چينلز کي هدايتون جاري پئي ڪري ڇو ته هو سزا يافته مجرم آهي.
