لاس اينجلس(ويب ڊيسڪ) هالي ووڊ اسٽارز جي شهر لاس اينجلس ۾ لڳ ڀڳ 6 ڏينهن گذرڻ باوجود صرف 11 سيڪڙو باهه تي ضابطو آندو ويو آهي ۽ ماهرن جو اندازو آهي ته باهه تي مڪمل طور تي ضابطو آڻڻ ۾ ڪيترائي هفتا لڳي سگهن ٿا. پرڏيهي خابرو اداري موجب خوفناڪ باهه سبب هيستائين مري ويلن جو انگ 24 ٿي ويو آهي ۽ 16 لاپتا آهن، جڏهن ته فوتين جو انگ وڌڻ جو خدشو آهي. آمريڪي ميڊيا موجب لاس اينجلس جي جنگلن ۾ گذريل هفتي جي بدترين باهه تي ضابطو آڻڻ لاءِ هزارين فائر فائٽر، سوين فائر انجڻ، واٽر ٽينڪر ۽ 60 جهاز ڪم ڪري رهيا آهن. پرڏيهي خابرو اداري موجب پئسفڪ پالسيڊس ۾ لڳل سڀ کان وڏي باهه 11 سيڪڙو ۽ ايٽون ۾ لڳل باهه تي 27 سيڪڙو ڪنٽرول آهي. ماهرن سومر کان اربع تائين تيز هوائن جي به وارننگ جاري ڪئي آهي. 6 ڏينهن کان جاري باهه سبب 40 هزار ايڪڙ ايراضي تي موجود هر شئي سڙي رک ٿي وئي آهي، 15 لک ماڻهو شهر ڇڏي ويا آهن ۽ 160 هزار ماڻهن کي لڏپلاڻ جو نوٽيس ڏنو ويو آهي. ان کان علاوه 50,000 کان وڌيڪ صارفين بجلي کان محروم آهن، ۽ نقصان جو اندازو 150 بلين ڊالر کان وڌيڪ آهي. ٻئي پاسي چونڊيل صدر ڊونلڊ ٽرمپ ڪيليفورنيا رياست شهر لاس اينجلس ۾ لڳل باهه کي آمريڪا جي تاريخ جو بدترين واقعو قرار ڏيندي مقامي انتظاميا تي ناڪامي جو الزام لڳايو آهي ۽ چيو آهي ته مناسب انتظام نه ڪيا ويا آهن.
