ڪراچي(اسٽاف رپورٽر)سنڌ جي سڌ سماءَ واري صوبائي وزير شرجيل انعام ميمڻ چيو آهي ته عمران خان نااهل، نااهل ۽ ڪوڙو آهي، جيڪڏهن هو لاوارث آهي ته پوءِ قانون تبديل ڪري، اهو نٿو ٿي سگهي ته ساڻس خاص سلوڪ ڪيو وڃي. ڪراچي ۾ پريس ڪانفرنس ڪندي شرجيل انعام ميمڻ چيو ته ڪالهه روڊن تي جيڪو ڪجهه ٿيو ان خلاف قانوني ڪارروائي ٿيندي، جيڪڏهن اجازت آهي ته پوءِ سڀني کي اجازت ڏني وڃي.شرجيل انعام ميمڻ جو چوڻ آهي ته پي ٽي آءِ اليڪشن ڪميشن جي فيصلي خلاف عدالت سان رجوع ڪيو، عدالت ذوالفقار علي ڀٽو جي عدالتي قتل جو فيصلو ڪڏهن ڏيندي، کيس انصاف ڪڏهن ملندو، ذوالفقار علي ڀٽو دنيا جو مشهور ليڊر هو.صوبائي وزير چيو ته جنهن هر ڪنهن کي چور ۽ ڌاڙيل چيو هو پاڻ ئي نااهل ٿي ويو آهي، اليڪشن ڪميشن کيس ڪرپٽ عملن تي نااهل ڪيو، پاڻ اليڪشن ڪمشنر مقرر ڪيو، سمورن ميمبرن متفقه فيصلو ڏنو ته عمران خان صادق ۽ امين ناهي رهيو. هاڻي ثاقب نثار جو جعلي سرٽيفڪيٽ به ختم ٿي ويو آهي.هنن جو وڌيڪ چوڻ آهي ته عمران خان تحفا لڪايا ۽ وڪرو ڪيا، ڏٺو ويندو ته عمران خان کي به نااهل ڪيو وڃي ٿو يا برطرف ڪيو وڃي ٿو، جيڪڏهن قانون ٽوڙڻ تي عمران خان خلاف ڪارروائي نه ڪئي وئي ته پوءِ ڪنهن جي خلاف به ڪارروائي نه ٿيڻ گهرجي.هن اهو به چيو ته ڀارت پاڪستان کي گري لسٽ ۾ رکڻ جي ڀرپور ڪوشش ڪئي، پاڪستان ڪالهه ايف اي ٽي ايف جي گري لسٽ مان ٻاهر آيو، ان جو ڪريڊٽ پرڏيهي وزير بلاول ڀٽو زرداري کي وڃي ٿو.
