لاهور: (ويب ڊيسڪ) لاهور هاءِ ڪورٽ ۾ سموگ جي روڪٿام بابت درخواستن تي ٻڌڻي ٿي، جنهن ۾ عدالت ڪينال روڊ تي وڻن جي تحفظ بابت واضح حڪم جاري ڪيا ۽ چيو ته ڪينال روڊ تي ڪنهن به منصوبي تحت هڪ به وڻ نه ڪٽيو وڃي.عدالت ريمارڪس ڏنا ته ڪينال روڊ تي وڻ ڏهاڪن پراڻا ۽ ماحول دوست آهن، انهن کي ڪٽڻ ماحول لاءِ نقصانڪار هوندو. عدالت اهو به ياد ڏياريو ته ڪينال روڊ تي وڻن جي ڪٽائي خلاف سپريم ڪورٽ جو فيصلو به آهي.ٻڌڻي دوران عدالت سي بي ڊي ۾ بلند عمارتن بابت چيو ته اهي بين الاقوامي ماحولياتي معيارن مطابق ٺاهيا ويندا ۽ انهن جي ڇتين تي گرين هائوس لڳائڻ ضروري هوندو ته جيئن ماحولياتي توازن برقرار رهي سگهي. عدالت پنجاب حڪومت جي وڪيل کان پيلي بس منصوبي بابت به سوال ڪيو، جنهن تي وڪيل چيو ته حڪومت اليڪٽرڪ پيلي بسون متعارف ڪرائي رهي آهي ۽ ان تي سروي جاري آهي. عدالت اطمينان جو اظهار ڪندي چيو ته توهان کي منصوبو ضرور آڻڻ گهرجي، اسان ان جي خلاف نه آهيون، پر ڪينال روڊ تي وڻن کي هر قيمت تي بچايو وڃي. عدالت چيو ته موسمياتي تبديلي جا اثر اسان سڀني جي سامهون آهن، تنهن ڪري اهڙو ڪو به منصوبو نه آندو وڃي جيڪو ماحولياتي نقصان جو سبب بڻجي يا وڻن جي ڪٽائي جو سبب بڻجي.
