اسلام آباد: (بيورو رپورٽ) پرڏيهي وزارت چيو آهي ته هو حوثي باغين پاران جهازن تي حملن جي مذمت ڪري ٿي، پاڪستاني جهنڊي وارن جهازن خلاف ڪارروائي کي قومي سلامتي لاءِ خطرو سمجهيو ويندو، ۽ پاڪستان پنهنجي سامونڊي مفادن جي حفاظت لاءِ پرعزم آهي.
پرڏيهي آفيس جي ترجمان طاهر حسين اندرابي هفتيوار نيوز بريفنگ ۾ چيو ته حوثي سعودي تجارتي جهازن کي ڌمڪيون ڏنيون آهن، ۽ حوثي طرفان جهازن تي حملن جون رپورٽون پڻ آهن. پاڪستان حوثي باغين جي انهن ڪاررواين جي مذمت ڪري ٿو.
طاهر حسين اندرابي چيو ته سعودي عرب سان واپار کي نشانو بڻائڻ يا ڌمڪيون ڏيڻ ناقابل قبول آهي. پاڪستان کي سعودي عرب سان جائز واپاري سرگرمين ۾ مصروف جهازن جي خلاف خطرن تي ڳڻتي آهي.
پرڏيهي آفيس جي ترجمان چيو ته پاڪستاني جهنڊي وارن جهازن خلاف ڪنهن به جارحاڻي ڪارروائي کي قومي سلامتي لاءِ خطرو سمجهيو ويندو، ۽ پاڪستان جي سامونڊي مفادن خلاف جارحاڻي ڪارروائي کي خودمختيار مفادن لاءِ سنگين خطرو سمجهيو ويندو.
طاهر حسين اندرابي چيو ته گڏيل قومن جي قانون موجب، پاڪستان پنهنجي سامونڊي اثاثن جي دفاع لاءِ طاقت استعمال ڪرڻ جو حق محفوظ رکي ٿو. پاڪستان پنهنجي سامونڊي مفادن جي حفاظت لاءِ پرعزم آهي.
*ايران ۽ آمريڪا ۾ ڳالهين لاءِ پراميد*
پرڏيهي آفيس چيو ته پاڪستان سڀني ڌرين کي صبر کان ڪم وٺڻ جي اپيل ڪئي آهي، پاڪستان کي وچ اوڀر ۾ ڇڪتاڻ تي ڳڻتي آهي، پاڪستان ڳالهين ۽ سفارتي ڪوششن جي حمايت جاري رکندو، ۽ ايران ۽ آمريڪا ڳالهين لاءِ پراميد آهن.
هن چيو ته ايراني گهرو وزير وزيراعظم، نائب وزيراعظم ۽ فيلڊ مارشل سان ملاقات ڪئي آهي. پاڪستان جون سفارتي ڪوششون جاري آهن. ڳالهيون ئي تڪرار جو واحد حل آهي. ڪمرشل جهازن کي خطرو علائقائي امن ۽ عالمي واپار لاءِ سنگين خطرو آهي.
هن وڌيڪ چيو ته نائب وزيراعظم آسيان ريجنل فورم جي موقعي تي مختلف ملڪن جي پرڏيهي وزيرن سان اهم ملاقاتون ڪيون آهن، ملاقاتن ۾ وچ اوڀر ۾ امن قائم ڪرڻ ۽ ڇڪتاڻ ختم ڪرڻ جي اهميت تي زور ڏنو ويو.
*سعودي عرب کي تڪرار ۾ ڇڪڻ جي ڪوششن تي خدشا*
پرڏيهي آفيس چيو ته پاڪستان کي سعودي عرب خلاف حوثي مليشيا جي مسلسل ڌمڪين تي سخت ڳڻتي آهي، هو بحيره احمر ۾ تجارتي جهازن کي نشانو بڻائڻ جي اعلانن جي سخت مذمت ڪري ٿو، ۽ سعودي عرب کي وچ اوڀر جي تڪرار ۾ گهلڻ جي ڪوششن تي ڳڻتي آهي.
پرڏيهي آفيس جي ترجمان چيو ته افغانستان ۾ دهشتگردن جون محفوظ پناهگاهون اڃا تائين موجود آهن، ۽ افغان طالبان پاران دهشتگردن جي حمايت علائقائي امن لاءِ خطرو آهي.
هن چيو ته دهشتگرد واقعن ۾ هزارين پاڪستاني شهيد ٿيا آهن، ۽ عالمي برادري کي افغان طالبان کي دهشتگردن جي حمايت ڪرڻ تي جوابده قرار ڏيڻ گهرجي.
پرڏيهي آفيس يورپي يونين جي رپورٽ تي جواب ڏيندي چيو ته پاڪستان لاءِ جاري ڪيل جي ايس پي رپورٽ حتمي آهي، پاڪستان 27 ڪنوينشنز تي عمل ڪري رهيو آهي، جي ايس پي پلس اسٽيٽس پاڪستان جي معيشت لاءِ فائديمند رهيو آهي، اسان يورپي يونين سان مسلسل رابطي ۾ آهيون، پاڪستان بين الاقوامي ڪنوينشنز تي عمل جاري رکندو.
