اسلام آباد(رپورٽ اياز مهر) وزيراعظم شهباز شريف ايس سي او سربراهي اجلاس جي مهمانن کي خوش آمديد ڪندي چيو آهي ته اسان سڀني کي خطي جي امن، سلامتي، خوشحالي ۽ ترقي لاءِ گڏجي ڪم ڪرڻ گهرجي. اجلاس جي صدارت ڪندي ابتدائي خطاب ۾ هن چيو ته شنگهائي تعاون تنظيم جي ميمبر ملڪن جي آبادي دنيا جي 40 سيڪڙو آهي ۽ هي تنظيم خطي ۾ تعاون لاءِ ملٽيليٽرل ازم جي روشني آهي. اسلام آباد جي ڪنوينشن سينٽر ۾جاري حڪومتي سربراهن جي ڪائونسل (سي ايڇ جي) جي 23 هين اجلاس جي صدارت ڪري رهيو آهي. ايس سي او ۾ چين، ڀارت، روس، پاڪستان، ايران، قزاقستان، ڪرغزستان، تاجڪستان، ازبڪستان ۽ بيلاروس شامل آهن. هن تنظيم جا 16 وڌيڪ ملڪ مبصرن يا ”ڊائيلاگ پارٽنر“ جي حيثيت سان جڙيل آهن. پاڪستان 2017ع ۾ قزاقستان ۾ ايس سي او جي سربراهه اجلاس ۾ مڪمل ميمبر ٿيو، جنهن ۾ اڳوڻي وزيراعظم نواز شريف شرڪت ڪئي هئي، جنهن تازو ئي ڀارت سان لاڳاپن جي بحالي جي اميد جو اظهار به ڪيو آهي. اجلاس کي خطاب ڪندي وزيراعظم چيو ته: ”شي جن پنگ جي بي آر آءِ ۽ سيپيڪ جهڙا فليگ شپ منصوبا، جيڪي پنهنجي ٻئي مرحلي ۾ آهن، اهي بين الاقوامي اتر-ڏکڻ رابطي جي ڪوريڊور کي وڌائي رهيا آهن. جنهن ۾ روڊ، ريل ۽ ڊجيٽل انفراسٽرڪچر جي ترقي تي فوڪس آهي. “اچو ته اسان اهڙن منصوبن کي تنگ سياسي نظر سان نه ڏسون ۽ اسان جي اجتماعي رابطي جي صلاحيت ۾ سيڙپڪاري ڪريون جيڪي اقتصادي طور تي مربوط خطي جي اسان جي گڏيل ويزن کي اڳتي وڌائڻ ۾ اهم آهن،”. هن چيو ته عامي برادري افغانستان ۾ انساني بنيادن تي مدد لاءِ اڳتي اچي ڇو ته پر امن ۽ مضبوط افغانستان اسان سڀني لاءِ ضروري آهي. اسانکي اهو ممڪن بنائڻو آهي ته افغانستان جي سرزمين پاڙيسري ملڪن ۾ دهشتگردي لاءِ استعمال نه ٿئي. هن سمٽ ۾ شريڪ نمائندن تي زور ڀريو ته هو خطي ۾ گڏيل معاشي ۽ سماجي ترقي لاءِ پنهنجي پهترين تجربن جون تجويز پيش ڪن جيئن اسين علائقائي امن، سلامتي ۽ معاشي ترقي لاءِ گڏجي ڪم ڪري سگهون. هن چيو ته اسانکي علائقائي سياحت، تجارت ۽ معاشي ترقي کي فروغ ڏيڻ گهرجي. ياد رهي ته سمٽ ۾ شرڪت لاءِ 900 وفد پاڪستان پهتل آهن. ڪانفرنس جي شروعات کان اڳ سڀني ملڪن جي نمائندن جو گروپ فوٽو به ورتو ويو.
ايس سي او ۾ شرڪت ڪندڙ ملڪن جي سربراهن جو گروپ فوٽو
