ڍاڪا(ويب ڊيسڪ)بنگلاديش نيشنلسٽ پارٽي (بي اين پي) جو قائم مقام چيئرمين طارق رحمان لڳ ڀڳ 17 سالن جي جلاوطني کان پوءِ خميس ڏينهن ڍاڪا واپس موٽي آيو. پارٽي کي اميد آهي ته سندس واپسي حامين ۾ نئون جوش پيدا ڪندي، ڇو ته 12 فيبروري تي ٿيندڙ چونڊن ۾ رحمان وزيراعظم جي عهدي لاءِ سڀ کان مضبوط اميدوار طور ڏٺو پيو وڃي.
گادي واري شهر جي هوائي اڏي کان استقباليه هنڌ تائين رستن تي لکين حامين قطارون ٺاهي بيٺا هئا. هو پارٽي جا جهنڊا لهرائي رهيا هئا ۽ پلي ڪارڊ، بينر ۽ گل کڻي نعرا هڻي رهيا هئا، جڏهن ته بي اين پي جي سينيئر اڳواڻن سخت سيڪيورٽي انتظامن هيٺ ڍاڪا ايئرپورٽ تي رحمان جو استقبال ڪيو.
60 ورهين جو طارق رحمان، بيمار اڳوڻي وزيراعظم خالدہ ضياءُ جو پٽ آهي. هو 2008 کان لنڊن ۾ رهي رهيو هو ۽ 2018 کان بي اين پي جو قائم مقام چيئرمين طور پارٽي جي اڳواڻي ڪري رهيو هو.
هلڪي سرمئي رنگ جي نفيس چيڪدار بليزر ۽ اڇي قميص ۾ ملبوس، رحمان ايئرپورٽ کان ٻاهر نڪتو، بنگلاديش جي زمين تي ننگي پير پير رکڻ لاءِ جوتا لاٿائين ۽ علامتي طور مٽيءَ جي هڪ مُٺ کنئي، جيڪا ڏکڻ ايشيائي ملڪ ڏانهن سندس واپسي جي نشاني هئي.
هو هڪ بس ۾ ڊرائيور جي سيٽ ڀرسان بيٺل ڏٺو ويو، جيڪا کيس استقباليه هنڌ ڏانهن وٺي وڃي رهي هئي، جتي هو مرڪندي ۽ هٿ لوڏيندي ماڻهن کي ڏسي رهيو هو، جڏهن ته ماڻهو پنهنجي واپس آيل اڳواڻ جي هڪ جهلڪ ڏسڻ لاءِ آيل هئا.
هو ڪيترن ئي فوجداري ڪيسن کي منهن ڏيڻ سبب هو اڳ ۾ وطن واپس اچڻ کان قاصر هو.
رحمان کي غير موجودگي ۾ مني لانڊرنگ سميت ڪيترن ئي الزامَن هيٺ سزا ڏني وئي هئي، جن ۾ اڳوڻي وزيراعظم شيخ حسينه کي قتل ڪرڻ جي مبينا سازش سان لاڳاپيل ڪيس به شامل هو. پر گذريل سال شاگردن جي اڳواڻي هيٺ اٿيل تحريڪ کان پوءِ شيخ حسينه جي اقتدار کان هٽجڻ سان اهي فيصلا رد ٿي ويا، جنهن سان سندس واپسي لاءِ قانوني رڪاوٽون ختم ٿي ويون.
سندس واپسي ذاتي لحاظ کان به اهم آهي، ڇو ته خالدہ ضياءُ ڪيترن ئي مهينن کان سخت بيمار آهي. پارٽي عملدارن موجب، رحمان ايئرپورٽ کان استقباليه هنڌ ويندو ۽ ان کان پوءِ پنهنجي ماءُ سان ملاقات ڪندو.
شيخ حسينه جي اقتدار مان نڪرڻ کان پوءِ سياسي منظرنامي ۾ تيزي سان تبديلي آئي آهي، جنهن سان اهي ڏهاڪا ختم ٿيا آهن جن دوران هوءَ ۽ خالدہ ضياءُ واري واري سان اقتدار ۾ اينديون رهيون.
ڊسمبر ۾ آمريڪا ۾ قائم انٽرنيشنل ريپبلڪن انسٽيٽيوٽ جي هڪ سروي مطابق، بي اين پي پارلياماني سيٽن جو سڀ کان وڏو انگ حاصل ڪرڻ جي راهه تي آهي، جڏهن ته جماعتِ اسلامي پارٽي پڻ مقابلي ۾ آهي.
شيخ حسينه جي عوامي ليگ، جيڪا چونڊن لاءِ نااهل قرار ڏني وئي آهي، بي چيني ۽ احتجاج جي ڌمڪي ڏني آهي، جنهن سبب ڪجهه ماڻهن کي خدشو آهي ته چونڊ عمل متاثر ٿي سگهي ٿو.
بنگلاديش نوبل انعام يافته محمد يونس جي اڳواڻي هيٺ قائم عبوري حڪومت جي نگراني ۾ چونڊن ڏانهن وڌي رهيو آهي.
جيتوڻيڪ اختيارين آزاد ۽ پرامن چونڊن جو واعدو ڪيو آهي، پر تازو ميڊيا ادارن تي حملا ۽ وقفي وقفي سان ٿيندڙ تشدد خدشن کي جنم ڏنو آهي، جنهن ڪري طارق رحمان جي واپسي بي اين پي ۽ ملڪ جي نازڪ سياسي منتقلي لاءِ هڪ اهم موڙ بڻجي وئي آهي۔
