تهران (ويب ڊيسڪ) آمريڪا ۽ اسرائيل جي ايران جي مختلف شهرن تي بنڪر بسٽر بمن جي بمباري جاري آهي، زنجان ۾ امام بارگاهه کي نشانو بڻايو ويو آهي. آمريڪا جي چيئرمين جوائنٽ چيف آف اسٽاف جنرل ڊين ڪين بريفنگ ۾ ٻڌايو آهي ته ايران ۾ 11 هزار هدفن تي بمباري ڪئي آهي. جايران آمريڪي اڏن ۽ اسرائيل تي بيلسٽڪ ميزائلن ۽ خودڪش ڊرون سان حملو ڪري ڇڏيو، ڪمانڊ اينڊ ڪنٽرول سينٽر کي تباهه ڪرڻ جي دعويٰ ڪري ڇڏي. ايران جي مارجي ويل نيول چيف علي رضا تنگسيري جو جنازو پڙهيو ويو، جنهن ۾ وڏي انگ ۾ ايراني شهري شريڪ ٿيا. هڪ ٽريلر ۾ سندس ميت آندو ويو.
ڪينيڊا پاران لبنان تي اسرائيلي حملي جي مذمت
ڪينيڊا جي وزيراعظم مارڪ ڪارني اسرائيل جي “غير قانوني حملي” جي سخت مذمت ڪئي آهي، جيڪو هن جي چوڻ موجب لبنان خلاف ڪيو ويو آهي۔ ڪيوبيڪ ۾ ڳالهائيندي، هن صحافين کي چيو: “هي هڪ غير قانوني حملو آهي، هي لبنان تي چڙهائي آهي، ۽ هي انهن جي علائقائي خودمختياري جي ڀڃڪڙي آهي.” هن وڌيڪ چيو: “عملي طور تي، لبنان جي حڪومت حزب الله تي پابندي لڳائي آهي ۽ حزب الله ۽ انهن جي دهشتگرد سرگرمين ۽ اسرائيل لاءِ خطري خلاف ڪارروائي ڪرڻ جي ڪوشش ڪري رهي آهي.” “اهو ئي هن حملي جو ظاهر ڪيل جواز آهي، تنهنڪري اسان ان جي مذمت ڪريون ٿا.” اهو بيان ان وقت آيو آهي جڏهن اسرائيلي دفاعي وزير اسرائيل ڪيٽز چيو آهي ته ملڪ حزب الله سان جاري جنگ ختم ٿيڻ کان پوءِ به ڏکڻ لبنان جي ڪجهه حصن تي سيڪيورٽي ڪنٽرول برقرار رکندو۔ اسرائيلي عملدارن جو چوڻ آهي ته زميني فوج لبنان ۾ ان لاءِ موڪلي وئي ته جيئن اتر اسرائيل جي رهواسين کي حزب الله جي حملن کان بچائي سگهجي، جڏهن ته ڪٽز اڳ ۾ چيو هو ته اسرائيل ڪارروائي ان ڪري ڪئي ڇاڪاڻ ته لبناني حڪومت “ڪجهه به نه ڪيو هو.”
اسپين پاران اسرائيل جي فلسطينين لاءِ موت جي قانون جي مذمت
اسپين جي وزيراعظم پيڊرو سانچز خبردار ڪيو آهي ته اسرائيل جو نئون موت جي سزا وارو قانون، جنهن تحت فوجي عدالتن کي هدايت ڪئي وئي آهي ته “دهشتگردي” جي عملن ۾ اسرائيلي ماڻهن کي قتل ڪرڻ جي ڏوهه ۾ سزا يافته فلسطينين کي موت جي سزا ڏني وڃي، صرف غير يهودين تي لاڳو ٿئي ٿو، ۽ هن ان کي “اپارٿائيڊ ڏانهن هڪ ٻيو قدم” قرار ڏنو آهي۔ ايڪس (X) تي هڪ پوسٽ ۾، سانچز چيو: “اسپين جي حڪومت فلسطينين لاءِ منظور ڪيل موت جي سزا جي مذمت ڪري ٿي، جيڪا تازو اسرائيلي پارليامينٽ پاران منظور ڪئي وئي آهي.” هن وڌيڪ چيو ته: “هي هڪ غير متوازن قدم آهي، جيڪو انهن اسرائيلين تي لاڳو نه ٿيندو جيڪي ساڳيا ڏوهه ڪن ٿا۔ ساڳيو ڏوهه، مختلف سزا۔ اهو انصاف ناهي۔ اهو اپارٿائيڊ ڏانهن هڪ ٻيو قدم آهي۔ دنيا خاموش نٿي رهي سگهي.”
ترڪيه تي ميزائيل ايران فائر ناهي ڪيو، عراقچي
ايران جي پرڏيهي وزير عباس عراقچي انهن خبرن کي “بلڪل بي بنياد” قرار ڏئي رد ڪري ڇڏيو آهي، جن ۾ چيو ويو هو ته تهران ترڪي ڏانهن ميزائل فائر ڪيا هئا، ۽ هن گڏيل جاچ جي آڇ به ڪئي آهي۔ ايران جي پرڏيهي وزارت جي بيان موجب ترڪي جي پنهنجي هم منصب حڪان فدان سان ٽيليفون تي ڳالهه ٻولهه دوران، عراقچي دشمنن طرفان “فالس فليگ آپريشنز” کان خبردار ڪيو ۽ چيو ته ايران “ڪنهن به ممڪن دعويٰ جي جاچ لاءِ گڏيل فني سهڪار لاءِ تيار آهي”. ايراني پرڏيهي وزارت جي بيان موجب۔ سومر ڏينهن، ترڪي جي دفاع واري وزارت چيو ته NATO جون فوجون ايران مان فائر ڪيل هڪ نئين ميزائل کي روڪڻ ۾ ڪامياب ٿيون ــ جيڪو وچ اوڀر واري جنگ شروع ٿيڻ کان پوءِ چوٿون ميزائل هو۔
فرانس ۽ اٽلي جو آمريڪا کي انڪار
صدر ڊونلڊ ٽرمپ فرانس کي “تمام غير مددگار” قرار ڏنو آهي، ڇو ته هن اسرائيل ڏانهن فوجي سامان کڻي ويندڙ جهازن کي پنهنجي فضائي حدن مان گذرڻ جي اجازت نه ڏني۔ ان کان اڳ، ٻڌايو ويو آهي ته اٽلي ڪجهه ڏينهن اڳ آمريڪا جي ان درخواست کي رد ڪري ڇڏيو هو، جنهن ۾ سسلي ۾ موجود سگونيلا ايئر بيس کي فوجي جهازن لاءِ استعمال ڪرڻ جي اجازت گهري وئي هئي ــ جيڪو روم جي فوجي ڪارروائين ۾ محتاط روَيَي کي ظاهر ڪري ٿو۔ اٽلي جي روزاني اخبار Corriere della Sera اڱاري ڏينهن رپورٽ ڏني ته دفاع واري وزير Guido Crosetto اجازت ڏيڻ کان انڪار ڪيو هو. رپورٽ موجب، اهو منصوبو تڏهن شيئر ڪيو ويو جڏهن جهاز اڳ ۾ ئي اڏام ۾ هئا، ۽ اطالوي اختيارين کان اڳواٽ ڪا به اجازت نه ورتي وئي هئي۔ جاچ مان ظاهر ٿيو ته اهي جهاز اٽلي ۽ آمريڪا وچ ۾ موجود معاهدن تحت ٿيندڙ عام يا لاجسٽڪ آپريشنز جو حصو نه هئا۔ رپورٽ موجب، درخواست ۾ بمبار جهاز شامل هئا، جن لاءِ خاص اجازت ۽ پارلياماني نگراني ضروري هوندي آهي۔
صدر ٽرمپ جا برطانيا ۽ فرانس کي ڏوراپا
آمريڪي صدر ڊونلڊ ٽرمپ چيو آهي ته “برطانيا جهڙن ملڪن” کي، جيڪي هرمز لنگهه جي بند ٿيڻ سبب جيٽ فيول حاصل نٿا ڪري سگهن، گهرجي ته “پنهنجي اندر همت پيدا ڪن، هرمز وڃن ۽ بس تيل کڻي اچن.” هن اها به تجويز ڏني ته “آمريڪا کان تيل خريد ڪريو، ڇاڪاڻ ته اسان وٽ تمام گهڻو تيل موجود آهي.” سوشل ميڊيا پليٽفارم ٽروٿ سوشل تي پوسٽ ۾ آمريڪي صدر لکيو ته ملڪن کي “سکڻو پوندو ته پنهنجي لاءِ جنگ ڪيئن وڙهي وڃي. آمريڪا هاڻي اوهان جي مدد لاءِ نه ايندو، بلڪل ائين جيئن اوهان اسان جي مدد لاءِ نه آيا هئا.” ٽرمپ جو اشارو انهن ملڪن ڏانهن هو جن ايران خلاف آمريڪي ڪارروائي ۾ حصو وٺڻ کان انڪار ڪيو هو. آمريڪي صدر پنهنجي پوسٽ ۾ وڌيڪ لکيو: “ايران بنيادي طور تباهه ٿي چڪو آهي، هي مشڪل ڪم هاڻي ختم ٿي ويو آهي.” ٽروٿ سوشل جي هڪ ٻي پوسٽ ۾ آمريڪي صدر فرانس خلاف به پنهنجي ناراضگي جو اظهار ڪيو. هن لکيو ته: “فرانس اسرائيل لاءِ فوجي سامان کڻي ويندڙ جهازن کي پنهنجي فضائي حدن مان گذرڻ جي اجازت نه ڏني.” ٽرمپ ايران جي سپريم اڳواڻ جي هلاڪت ۾ ڪردار ادا نه ڪرڻ تي به فرانس سان شڪايت ڪندي لکيو: “فرانس تمام غير مددگار رهيو، آمريڪا اها ڳالهه ياد رکندو.”
ڪويتي آئل ٽينڪر تي دبئي ۾ حملو، تيل ليڪ ٿيڻ کان بچي ويو
دبئي جي اختيارين تصديق ڪئي آهي ته ايراني ڊرون حملي کان پوءِ باهه لڳل ٽينڪر مان ڪو به تيل ليڪ نه ٿيو آهي۔ جيئن ته اڳ ۾ رپورٽ ڪيو ويو هو، “ال سلمي” نالي ٽينڪر ۾ ٻه ملين بيرل تيل ڀريل هو ۽ اهو چين ڏانهن ويندي دبئي ۾ بيٺو هو، جڏهن ڊرون حملي دوران ان کي نشانو بڻايو ويو ۽ ان ۾ باهه لڳي وئي۔ دبئي ميڊيا آفيس بعد ۾ تصديق ڪئي آهي ته ريسپانس ٽيمن “دبئي جي سامونڊي علائقي ۾ ڪويتي تيل ٽينڪر سان پيش آيل واقعي تي ڪاميابي سان ضابطو آڻي ورتو آهي، جتي نه تيل ليڪ ٿيو آهي ۽ نه ئي ڪنهن جي زخمي ٿيڻ جي خبر آهي”۔ ٻئي پاسي يو اي اي فوج چيو آهي ته اڄ به مٿن ايراني ڊرونز ۽ ميزائيل فائر ٿي رهيا آهن، جيڪي روڪيا پيا وڃن.
مرڪزي اسرائيل ۾ ميزائل حملي سبب 11 ماڻهو زخمي
اڄ صبح ايران پاران فائر ڪيل ميزائلن کان پوءِ مرڪزي اسرائيل ۾ گهٽ ۾ گهٽ 11 ماڻهو زخمي ٿي پيا آهن، اسرائيلي ميڊيا ملڪ جي ايمرجنسي خدمتن جو حوالو ڏيندي رپورٽ ڪيو آهي۔ حملي دوران تل ابيب، بني براڪ۽ پيتاح ٽڪوا سميت مرڪزي اسرائيل جي مختلف علائقن ۾ ڪيترن ئي هنڌن تي ميزائل ڪرڻ جا اطلاع مليا آهن۔ هلندڙ جنگ دوران 5 هزار کان مٿي اسرائيلي زخمي ٿيا آهن. اڪثر شهري ۽ وزيراعظم نيتن ياهو سميت وزير گهرن بدران بنڪرز ۾ راتيون گذارين ٿا.
ايران پاران مخالف گروپ جي ٻن ميمبرن کي ڦاسي
ايراني اختيارين ٻن ماڻهن کي ڦاسي ڏئي ڇڏي آهي، جن تي الزام آهي ته هو مخالف تنظيم مجاهدينِ خلق آرگنائيزيشن (MKO) سان لاڳاپيل سرگرمين ۾ شامل هئا۔ آءِ ايس اين اي نيوز ايجنسي موجب، هنن ٻنهي مبينه طور تهران ۾ “گهڻين” ڪاررواين ۾ حصو ورتو هو۔ ايم ڪيو او هڪ طاقتور کاٻي ڌر جو گروپ هو، جنهن 1970ع واري ڏهاڪي ۾ شاهه جي حڪومت ۽ آمريڪي هدفن خلاف ڌماڪيدار حملا ڪيا هئا، پر پوءِ ٻين گروپن سان اختلافن سبب الڳ ٿي ويو هو۔ هن تنظيم 2002ع ۾ پهريون ڀيرو ظاهر ڪيو هو ته ايران وٽ ڳجهي يورينيم افزائش وارو پروگرام موجود آهي، پر گذريل ڪيترن ئي سالن کان ايران اندر ان جي سرگرمين جا گهڻا نشان ناهن ڏٺا ويا۔
اتر غزه ۾ اسرائيلي حملي ۾ هڪ فلسطيني مارجي ويو
اتر غزه جي علائقي جباليا ۾ عام شهرين جي هڪ گروهه کي نشانو بڻائيندڙ اسرائيلي حملي ۾ هڪ ماڻهو شهيد ۽ ڪيترائي ٻيا زخمي ٿي پيا آهن، وفا نيوز ايجنسي ٻڌايو آهي۔ هي حملو اهڙي وقت ٿيو آهي، جڏهن 7 آڪٽوبر 2023 کان وٺي غزه ۾ اسرائيلي نسل ڪشي سبب شهيدن جو انگ وڌي 72,280 ٿي ويو آهي، جڏهن ته 172,014 ماڻهو زخمي ٿي چڪا آهن۔
اسرائيل کي نئين علائقائي ترتيب لاءِ تيار رهڻ گهرجي: برگيڊيئر جنرل اسماعيل قاني
اسلامي انقلابي گارڊ ڪور جي قدس فورس جي ڪمانڊر برگيڊيئر جنرل اسماعيل قاني چيو آهي ته اسرائيل کي هڪ نئين علائقائي آرڊر لاءِ تيار رهڻ گهرجي.پنهنجي بيان ۾، جنرل اسماعيل قاني چيو ته نيتن ياهو علائقي ۾ سيڪيورٽي بيلٽ کي وڌائڻ جو خواب ڏسي رهيو هو، پر لبنان جي حزب الله ۽ يمن جي انصار الله اتر ۽ ڏکڻ کان باهه جي برسات ڪري يهودي آبادگارن کي ڏنل تحفظ جي ڪوڙي واعدي کي بي نقاب ڪري ڇڏيو آهي.هن چيو ته شهيد ڪمانڊرن جون خواهشون پوريون ٿي ويون آهن ۽ محاذ هاڻي هڪ ٿي ويو آهي، تنهن ڪري اسرائيلي دشمن کي هاڻي هن نئين علائقائي آرڊر لاءِ تيار رهڻ گهرجي.
آمريڪا-ايران تڪرار ۾ ثالثي جو ڪردار علائقائي مفاد ۾ آهي، پاڪستاني سفير
آمريڪا ۾ پاڪستان جي سفير رضوان سعيد شيخ چيو آهي ته آمريڪا ۽ ايران جي وچ ۾ تازي تڪرار ۾ ثالثي جو ڪردار وسيع علائقائي مفاد ۾ آهي. هن چيو ته پاڪستان مفيد ڳالهين لاءِ هر ممڪن سهولت فراهم ڪرڻ لاءِ پرعزم آهي، جڏهن ته، فيصلن جي ذميواري جنگ ڪندڙ ڌرين تي آهي.
ريپبلڪن ڪانگريس ميمبر رائن زنڪ امن ڳالهين جي ميزباني ڪرڻ تي پاڪستان جي تعريف
ريپبلڪن ڪانگريس ميمبر رائن زنڪ صدر ٽرمپ جي 15 نقطن واري امن منصوبي جي پيش ٿيڻ کان پوءِ وچ اوڀر لاءِ امن ڳالهين جي ميزباني ڪرڻ جي پاڪستاني قيادت جي قدم جي تعريف ڪئي. هن چيو ته هو وچ اوڀر لاءِ امن ڳالهين جي ميزباني ڪرڻ جي پاڪستاني قيادت جي قدم جي تعريف ڪري ٿو.
ٽرمپ آبنائي هرمز کي کولڻ کان سواءِ جنگ ختم ڪرڻ چاهي ٿو: آمريڪي اخبار
آمريڪي اخبار ٽرمپ انتظاميه جي هڪ عهديدار جو حوالو ڏيندي دعويٰ ڪئي آهي ته ٽرمپ پنهنجن صلاحڪارن کي ٻڌايو ته هو هرمز جي آبنائي کي کولڻ کان سواءِ جنگ ختم ڪرڻ چاهي ٿو.آمريڪي اخبار جي رپورٽ موجب، صدر ٽرمپ هرمز جي آبنائي کي کولڻ جي پيچيده ڪارروائي کي بعد ۾ انجام ڏيڻ چاهي ٿو.ياد رکڻ گهرجي ته ڪالهه، آمريڪي صدر ڌمڪي ڏني هئي ته جيڪڏهن ڪو معاهدو نه ٿيو ۽ هرمز جي آبنائي کي جلد نه کوليو ويو ته هو ايران جي سڀني پاور پلانٽس، تيل جي کوهن ۽ پاڻي صاف ڪرڻ وارن پلانٽس کي تباهه ڪري ڇڏيندو.
ايران ۾ حڪومت تبديل ٿي وئي آهي، اسان نون ماڻهن سان ڳالهيون ڪري رهيا آهيون: ٽرمپ جو دعويٰ
هڪ بيان ۾ صدر ٽرمپ چيو ته جلد ئي معلوم ٿي ويندو ته ايراني اسپيڪر قاليباف آمريڪا سان ڪم ڪرڻ لاءِ تيار آهي يا نه، ۽ هڪ هفتي ۾ ان بابت ٻڌايو ويندو.ٽرمپ دعويٰ ڪئي ته اسان ايران ۾ نون ماڻهن سان ڊيل ڪري رهيا آهيون ۽ نوان ماڻهو اڳ کان وڌيڪ معقول ثابت ٿيا آهن.سپريم ليڊر بابت ڳالهائيندي آمريڪي صدر چيو ته ڪنهن به ايران جي نئين سپريم ليڊر بابت ڪا خبر نه ٻڌي آهي، اسان سمجهون ٿا ته مجتبيٰ خامنه اي زنده آهي پر سندس حالت خراب آهي.
دبئي ۾ دفاعي آپريشن دوران ملبو ڪرڻ سبب هڪ گهر ۾ باهه لڳي وئي، 4 ماڻهو زخمي ٿي پيا
دبئي ميڊيا آفيس موجب، البدا علائقي ۾ هڪ ڪامياب هوائي دفاع جي آپريشن دوران ملبو ڪرڻ سبب باهه لڳي وئي، جڏهن ته، بچاءُ ٽيمن جلدي باهه تي ضابطو آندو.
دبئي بندرگاهه تي ايراني حملي ۾ وڏي آئل ٽينڪر کي نشانو بڻايو ويو: ڪويتي آفيسر
ڪويتي آفيسر چون ٿا ته حملي کان پوءِ متاثر آئل ٽينڪر ۾ باهه لڳي وئي، پر ڪو به جاني نقصان نه ٿيو. اهو واقعو دبئي کان 31 ناٽيڪل ميل اتر اولهه ۾ سمنڊ ۾ پيش آيو.برطانيه جي ميري ٽائيم ٽريڊ آپريشنز چيو ته باهه آئل ٽينڪر جي اڳيان لڳل هئي، آئل ٽينڪر تي عملو مڪمل طور تي محفوظ آهي، اختيارين خبردار ڪيو ته متاثر آئل ٽينڪر آس پاس جي پاڻين ۾ تيل ليڪ ڪري سگهي ٿو.
پاڪستان ۽ ٻين مسلمان ملڪ پاران والاريل بيت المقدس ۾ اسرائيلي پابندين جي مذمت
پاڪستان، سعودي عرب، مصر، اردن، انڊونيشيا، ترڪي، قطر ۽ يو اي اي جي پرڏيهي وزيرن هڪ گڏيل بيان جاري ڪيو جنهن ۾ انهن والاريل بيت المقدس ۾ مسلمانن ۽ عيسائين جي عبادت جي آزادي تي اسرائيلي پابندين جي سخت مذمت ڪئي.سعودي پرڏيهي وزارت چيو ته مسلمان عبادت ڪندڙن کي مسجد اقصيٰ ۽ حرم الشریف تائين رسائي کان روڪڻ جي قدمن کي رد ڪيو ويو، ۽ مذهبي اڳواڻن کي پام آچر جي نماز لاءِ چرچ آف دي هولي سيپلچر ۾ داخل ٿيڻ کان روڪڻ جي به مذمت ڪئي وئي.سعودي پرڏيهي وزارت جي مطابق، پرڏيهي وزيرن والاريل بيت المقدس ۾ مسلمان ۽ عيسائي مقدس هنڌن جي قانوني ۽ تاريخي حيثيت کي تبديل ڪرڻ جي هر ڪوشش کي رد ڪري ڇڏيو. گڏيل بيان ۾ مقدس هنڌن جي حيثيت کي برقرار رکڻ تي زور ڏنو ويو.
شارجه ۾ ٽيليڪميونيڪيشن ڪمپني جي عمارت تي ايراني ڊرون حملو
اماراتي عملدارن چيو ته شارجه ۾ هڪ ٽيليڪميونيڪيشن ڪمپني جي عمارت کي ايران کان ايندڙ ڊرون ذريعي نشانو بڻايو ويو، پر واقعي ۾ ڪو به جاني نقصان نه ٿيو.
سعودي عرب جو احترام ڪريون ٿا، اسان جون ڪارروايون دشمن جارح قوتن جي خلاف آهن: عباس عراقچي
ايراني پرڏيهي وزير عباس عراقچي چيو ته ايران سعودي عرب جو احترام ڪري ٿو ۽ ان کي هڪ برادر ملڪ سمجهي ٿو.هن واضح ڪيو ته ايران جا ڪارروايون دشمن جارح قوتن جي خلاف آهن، دشمن عرب نه ته ايرانين جو احترام ڪن ٿا ۽ نه ئي اهي سيڪيورٽي فراهم ڪري سگهن ٿا.ايراني پرڏيهي وزير چيو ته، “ڏسو ته اسان انهن جي هوائي ڪمانڊ سان ڇا ڪيو، اسان دشمن جي ڪمانڊ ۽ ڪنٽرول سينٽر کي تباهه ڪري ڇڏيو.” هن چيو ته هاڻي وقت آهي ته آمريڪي فوجن کي خطي مان ڪڍيو وڃي.
ايران خلاف زميني ڪارروائي ۾ حصو نه وٺنداسين، برطانيه جو اعلان
برطانوي وزيراعظم سر ڪيئر اسٽارمر ٻن لفظن ۾ واضح ڪيو ته ايران جنگ اسان جي جنگ ناهي، اسان ان ۾ شامل نه ٿينداسين، اسان جيڪو ڪيو آهي اهو هڪ دفاعي قدم آهي.برطانوي وزيراعظم چيو ته برطانيه دفاعي قدم کڻندو رهندو، آبنائے هرمز کي ٻيهر کولڻ لاءِ ڪم جاري رکندو.هن چيو ته جنگ شروع ٿيڻ کان هڪ يا ٻن ڪلاڪن اندر، اسان پنهنجا پائلٽ هوا ۾ مقرر ڪيا هئا، ڪارروائي جو مقصد برطانوي شهرين، مفادن ۽ خطي ۾ اسان جي اتحادين جو دفاع ڪرڻ هو.برطانوي وزيراعظم چيو ته اسان برطانيه جي قومي مفادن، خطي جي ماڻهن جي حفاظت تي ڌيان ڏينداسين، جنگ جي گهريلو اثر کي منهن ڏيڻ لاءِ جيڪو ڪجهه ڪري سگهون ٿا اهو ڪنداسين، ۽ بين الاقوامي اتحادين سان ڪم جاري رکنداسين.
بحرين ۾ حزب الله سيل ٺاهڻ جي الزام ۾ 3 ماڻهو گرفتار
بحرين جي گهرو وزارت جي هڪ بيان ۾ چيو ويو آهي ته حزب الله سيل ٺاهڻ جي الزام ۾ 3 ماڻهن کي گرفتار ڪيو ويو آهي. بيان ۾ دعويٰ ڪئي وئي آهي ته گرفتار ٿيل ماڻهو حزب الله سان رابطي ۾ هئا ۽ لبنان جي دوري دوران حزب الله کان تربيت پڻ حاصل ڪئي هئي. گهرو وزارت اهڙن عملن کي ملڪ جي خودمختياري جي خلاف ورزي قرار ڏنو.
اسرائيل ايران خلاف هوائي حملن جي نئين لهر شروع ڪري ڇڏي
اسرائيلي فوج هڪ بيان ۾ چيو آهي ته هن ايران جي گادي واري هنڌ تهران تي هوائي حملن جي هڪ نئين لهر شروع ڪئي آهي. بيان ۾ چيو ويو آهي ته حملن ۾ مخصوص انفراسٽرڪچر کي نشانو بڻايو ويو. رپورٽ موجب، انهن حملن ۾ ڪنهن به نقصان جي شروعاتي رپورٽ نه ملي آهي.
يوڪرين جي تڪرار کي آمريڪا ۽ اسرائيل جي ايران خلاف جنگ سان ڳنڍڻ هڪ تباهي ڪندڙ غلط فهمي آهي: ايران
ايراني وزارت خارجه جي ترجمان اسماعيل باغائي يوڪرين جي تڪرار کي آمريڪا ۽ اسرائيل جي ايران خلاف جنگ سان ڳنڍڻ کي هڪ تباهي ڪندڙ غلط فهمي قرار ڏنو، ۽ اميد ظاهر ڪئي ته گڏيل عرب امارات ايراني شهرين سان دور انديشي سان پيش ايندو ۽ انهن جي حقن جو خيال رکندو. هن چيو ته بوشهر نيوڪليئر پاور پلانٽ اڃا تائين ڪم ڪري رهيو آهي.
ايران جنگ ڪل 4 کان 6 هفتا هلي سگهي ٿي: وائيٽ هائوس
وائيٽ هائوس جي ترجمان ڪيرولين لوٽ دعويٰ ڪئي ته ايران آمريڪا جي ڪجهه تجويزن تي راضي ٿي ويو آهي.پريس بريفنگ دوران، وائيٽ هائوس جي ترجمان چيو ته صدر ٽرمپ 6 اپريل جي آخري تاريخ کان اڳ ايران سان هڪ معاهدو چاهي ٿو، هن اهو به چيو ته ايران جنگ ڪل 4 کان 6 هفتا هلي سگهي ٿي.ڪيرولين لوٽ چيو ته ايندڙ ڪجهه ڏينهن ۾ 20 ٽينڪر آبنائي هرمز مان گذرڻ جي اميد آهي. آمريڪا روس کي انساني بنيادن تي ڪيوبا ڏانهن تيل ٽينڪر موڪلڻ جي اجازت ڏني، ڪيوبا جي حوالي سان آمريڪي پاليسي ۾ ڪا به تبديلي نه آئي آهي.
اسرائيلي فوج پاران نئين آپريشن جي تياري، اولهه لبنان جي شهرين کي علائقو ڇڏڻ جو حڪم
اسرائيلي فوج اولهه لبنان جي ڇهن ڳوٺن جي شهرين کي علائقو ڇڏڻ جو حڪم ڏنو آهي.اسرائيلي فوج هڪ بيان ۾ چيو آهي ته ممڪن فوجي آپريشن کان اڳ سڀني شهري مغربي علائقي کي خالي ڪري وڃن. عرب ميڊيا جي رپورٽن موجب، اسرائيلي فوج جي حملي سبب 1.2 ملين لبناني شهري پنهنجا گهر ڇڏي ٻئي هنڌ منتقل ٿي ويا آهن.انساني حقن جي تنظيمن اسرائيلي قدم تي سخت ڳڻتي جو اظهار ڪندي چيو آهي ته لبنان ۾ بي گهر ماڻهن لاءِ پناهه گاهه مڪمل طور تي ڀرجي ويا آهن ۽ انهن پناهه گاهه ۾ وڌيڪ ماڻهن لاءِ جاءِ ناهي.
