ڏهرڪي(قادر خان جٽ) شهر جي مک وارڊ 15 گلاب شاھ ڪالوني ۾ قائم گورنمينٽ پرائمري بوائز اسڪول جي ڪنهن به سار نه لڌي سار نه لاهڻ سبب اسڪول جي بلڊنگ زبون حالت ۾ اچڻ ڪري ڪرڻ جو خطرو وڌي ويو آهي ۽ ڇت جا چاپڙ به ڪرڻ روز جو معمول بڻيل آهن.
اسڪول جي استادن ۽ شاگردن احتجاج ڪندي ٻڌايو ته اسين تعليم کاتي جي آفيسرن درخواستون ڏنيون ۽ احتجاج پڻ ڪيا مگر ڪو به ٻڌڻ وارو ناهي اسڪول جي بلڊنگ جي حالت خطرناڪ بڻجي وئي آهي ۽ ڪنهن وقت به وڏو حادثو پيش اچي سگهي ٿو. جڏهن ته نالين جو گندو پاڻي ڪمرن ۾ ڪهي آيو آهي جنهن ڪري روز ٻار بيمار ٿين ٿا ۽ پوري اسڪول ۾ بدبو ڦھلجي وئي آهي. هنن ڊي سي محمد خالد سليم ۽ اختيارن کان مطالبو ڪندي چيو ته جلد کان جلد بلڊنگ جو مرمتي ڪم شروع ڪرايو وڃي ۽ گندي پاڻي جي نيڪال جو سسٽم درست ڪيو وڃي
