سيئول (ويب ڊيسڪ)آمريڪي صدر ڊونلڊ ٽرمپ چيو آهي ته هن چين سان هڪ معاهدو ڪيو آهي جنهن موجب بيجنگ آمريڪي سويا بين جي خريداري ٻيهر شروع ڪندو، ناياب معدنيات جي برآمد جاري رکندو ۽ فينٽانيل جي غير قانوني واپار تي سختي سان ڪنٽرول ڪندو، جنهن جي بدلي ۾ آمريڪا چين تي لاڳو ٽيرف گهٽائيندو. اهڙو اظهار هن چين جي صدر شي جن پنگ سان ڏکڻ ڪوريا جي شهر بوسان ۾ روبرو ڳالهين کان پوءِ ڪيو. ٻنهي اڳواڻن ۾ 2019 کان پوءِ پهرين روبرو ملاقات هئي. هي ملاقات ٽرمپ جي تيز رفتار ايشيا جي دوري جي آخري مرحلي تي ٿي. جنهن دوران هن ڏکڻ ڪوريا، جاپان ۽ ڏکڻ اوڀر ايشيا جي ملڪن سان به واپاري پيش رفت جو اعلان ڪيو. ايشيا-پئسفڪ اقتصادي تعاون (APEC) اجلاس جي سائيڊ لائين تي ٿيل اها ملاقات لڳ ڀڳ ٻه ڪلاڪ جاري رهي. ٽرمپ شي سان هٿ ملايو، کيس گاڏي تائين ڇڏيو ۽ پوءِ هوائي اڏي تي ريڊ ڪارپيٽ الوداعي پروٽوڪول سان واپس روانو ٿيو. ايئر فورس ون تي صحافين سان ڳالهائيندي ٽرمپ چيو ته شي سان ملاقات دوران ناياب معدنيات جي فراهمي بابت هڪ ساله واڌ ويجهه جو معاهدو طئي ٿيو آهي. “سڀ ناياب معدنيات بابت معاملا طئي ٿي ويا آهن، ۽ اهو پوري دنيا لاءِ آهي،” ٽرمپ صحافين کي ٻڌايو، هن وڌيڪ چيو ته معاهدو هڪ سال لاءِ آهي ۽ هر سال ٻيهر ڳالهه ٻولهه ڪئي ويندي. هن ملاقات کي “تمام وڏي ڪاميابي” قرار ڏيندي چيو ته هو اپريل ۾ نون ڳالهين لاءِ چين جو دورو ڪندو. “مان اپريل ۾ چين ويندس ۽ هو ان کان پوءِ ڪنهن وقت هتي ايندو، چاهي اهو فلوريڊا، پام بيچ يا واشنگٽن ڊي سي هجي،” ٽرمپ وڌيڪ چيو ته بوسان ۾ ٿيل ڳالهين ۾ “ڪيتريون ئي شيون مڪمل ٿي ويون”، هن شي جن پنگ کي “هڪ تمام طاقتور ملڪ جو زبردست اڳواڻ” قرار ڏنو. هن ملاقات بعد چيني اسٽاڪ مارڪيٽ ڏهن سالن جي بلند ترين سطح تي پهچي وئي، ۽ يوآن ڪرنسي ڊالر جي مقابلي ۾ تقريباً هڪ سال جي اوچي سطح تي پهتي، جيئن سيڙپڪارن کي واپاري تڪرار ۾ گهٽتائي جي اميد پيدا ٿي. وال اسٽريٽ کان ٽوڪيو تائين عالمي اسٽاڪ مارڪيٽن ۾ به تازن ڏينهن ۾ رڪارڊ واڌ ڏٺي وئي. ٽرمپ بار بار شي سان معاهدي جي امڪان بابت پراميد لهجي ۾ ڳالهائيندو رهيو آهي، خاص طور تي پوءِ جڏهن آمريڪي ڳالهين ڪندڙن آچر تي چيو ته انهن چين سان اهڙو فريم ورڪ طئي ڪيو آهي جيڪو چيني شين تي 100 سيڪڙو آمريڪي ٽيرف کان بچائيندو ۽ ناياب معدنيات تي چين جي برآمداتي پابندين کي عارضي طور ملتوي ڪندو. تنهن هوندي به، ٻنهي ملڪن جي وچ ۾ وڌندڙ معاشي ۽ جيو-اسٽريٽجڪ مقابلي کي ڏسندي، اهو سوال اڃا باقي آهي ته هي واپاري نرم لهجو ڪيتري عرصي تائين برقرار رهندو.
