ڪراچي: (اسٽاف رپورٽر) دنيا جي سڀني کان وڏي نعمت ماءُ آهي، ماءُ کان سواءِ ڪوبه دلاسو نه ڏيندو آهي، پاڪستان سميت سڄي دنيا ۾ اڄ مائرن جو عالمي ڏينهن ملهايو پيو وڃي.تفصيل موجب 1911 ۾ آمريڪا جي هڪ رياست ۾ پهريون ڀيرو مائرن جو عالمي ڏينهن ملهايو ويو، هر سال مائرن جو عالمي ڏينهن ملهائڻ لاءِ مختلف ملڪن ۾ هڪ ئي ڏينهن مقرر نه آهي، پاڪستان ۽ اٽلي سميت مختلف ملڪن ۾ اهو ڏينهن مئي جي ٻئي آچر تي ملهايو ويندو آهي.هونئن ته هر ڏينهن ماءُ جو ڏينهن آهي پر خاص طور تي انهي ڏينهن کي ملهائڻ جو بنيادي مقصد مائرن جي عظمت کي خراج تحسين پيش ڪرڻ آهي، هر ماءُ قابل تحسين آهي پر ڪجهه مائرون اهڙيون به آهن جيڪي مشڪلات کي چيلينج سمجهي قبول ڪنديون آهن ۽ پنهنجي ٻارن جي بهترين تعليم، تربيت جي خاطر گهرن جي ذميواري ئي نٿيون سنڀالين پر ٻارن جي پيءُ سان گڏ ڪلهو ڪلهي ۾ ملائي محنت ڪنديون آهن.سمورين مخالفتن ۽ چيلنجز جي باوجود هڪ ماءُ پنهنجي ٻار کي بهترين زندگي ڏيڻ جي لاءِ پريشاني کڻڻ لاءِ هر دم تيار رهندي آهي. ماءُ جو دل ته ٻارن لاءِ ڌڙڪندو آهي ٻارن سان گڏ رهڻ اولين ترجيح آهي پر ان جي بهتر مستقبل لاءِ پيشوارانه ذميواريون به سٺي طريقي سان نڀائيندي آهي.دنيا جو هر رشتو انسان جو ساٿ ڇڏي ڏيندو آهي پر تڏهن به ماءُ آخري دم تائين پنهنجي اولاد جي فڪر ناهي ڇڏيندي، اهو هڪ واحد انساني رشتو آهي جيڪو بنا ڪنهن لالچ جي آهي پر وقت جي ستم ظريقي آهي ته پاڪستان ۾ اولڊ هومز ٺهيا جيڪي هاڻ ڀرجندا پيا وڃن. پنهنجن ٻارن کي پالڻ لاءِ هر ڏک سهندڙ مائرون اولڊ هومز ۾ مختلف اذيتن کي منهن ڏئي رهيون آهن.
