ڪراچي: (اسٽاف رپورٽر) قانون لاڳو ڪندڙ ادارن پابندي مڙهيل تنظيم سنڌ ديش ريپبلڪن آرمي سان تعلق رکندڙ انتهائي گهربل دهشتگرد عبدالجبار سرڪي کي گرفتار ڪري ورتو آهي.تفصيل موجب، پاڪستان رينجرز (سنڌ) ۽ سي ٽي ڊي پوليس، انٽيليجنس معلومات تي ڪارروائي ڪندي، پابندي مڙهيل تنظيم سنڌ ديش ريپبلڪن آرمي سان تعلق رکندڙ انتهائي گهربل دهشتگرد عبدالجبار سرڪي کي رينجرز چيڪ پوسٽ حب ريور روڊ، رئيس ڳوٺ مان گرفتار ڪيو، جڏهن هو ڪوئيٽا کان ڪراچي اچي رهيو هو. گرفتار ٿيل دهشتگرد جي قبضي مان هٿيار، ڊيٽونيٽر، بال بيئرنگ ۽ ڌماڪيدار مادو پڻ هٿ ڪيو ويو.گرفتار ٿيل دهشتگرد 2020 ۾ پابندي مڙهيل تنظيم سنڌ ديش ريپبلڪن آرمي جي ڪمانڊر سجاد شاهه جي گروپ ۾ شامل ٿيو. ڪمانڊر سجاد شاهه، پنهنجن ساٿين سان گڏ، ڪراچي ۽ اندروني سنڌ ۾ تخريبڪاري جي مختلف ڪاررواين ۾ ملوث آهي.گرفتار ٿيل دهشتگرد پنهنجي ساٿي سان گڏ جون 2020 ۾ نيشنل هاءِ وي منزل پمپ جي ويجهو رينجرز پوسٽ تي دستي بم حملو ڪيو، جنهن جي نتيجي ۾ ٻه پيادل زخمي ٿيا جڏهن ته رينجرز پوسٽ کي جزوي نقصان پهتو.گرفتار ٿيل دهشتگرد 14 آگسٽ جي موقعي تي دهشتگرد ڪارروائي لاءِ گلشن حديد ۾ آزادي اسٽال تي ڇاپو هنيو هو. گرفتار ٿيل دهشتگرد جو نالو سي ٽي ڊي ريڊ بڪ ۾ هڪ انتهائي گهربل دهشتگرد جي طور تي شامل آهي.گرفتار ٿيل دهشتگرد سنڌ ريپبلڪن آرمي جي ڪمانڊر سجاد شاهه سان ٻاهرين ملڪ رابطي ۾ هو ۽ پنهنجي ٻين ساٿين سان گڏ ڪراچي ۾ حساس هنڌن تي دهشتگرد ڪارروائين جي منصوبابندي ڪري رهيو هو. جوابدار کي هٿيار، ڌماڪيدار مادو ۽ برآمد ٿيل سامان سان گڏ وڌيڪ قانوني ڪارروائي لاءِ سي ٽي ڊي پوليس جي حوالي ڪيو ويو آهي.
