لاهور (ويب ڊيسڪ)اسپيشل ڪورٽ سينٽرل لاهور مني لانڊرنگ ڪيس ۾ وزيراعظم شهباز شريف جي پٽ سليمان شهباز سميت سمورن جوابدارن کي بري ڪري ڇڏيو.اسپيشل ڪورٽ سينٽرل لاهور ۾ سليمان شهباز ۽ ٻين جوابدارن جي بريت واري درخواست تي ٻڌڻي ٿي، سليمان شهباز عدالت ۾ پيش ٿيو.ايف آءِ اي ڪيس بابت 27 سوالن جا جواب عدالت ۾ جمع ڪرائي ڇڏيا آهن.جج بخت فرخ بهزاد پڇاڻو ڪيو ته مني لانڊرنگ جي انڪوائري ڪنهن ڪئي؟ وڪيل ايف آءِ اي چيو ته ڊاڪٽر رضوان جي سربراهي ۾ جي آءِ ٽي جاچ ڪري رهي آهي.جج پڇاڻو ڪيو ته ڇا ايف آءِ اي سڄي جاچ ۾ ڪنهن شاهد جو بيان رڪارڊ ڪرايو آهي؟ ان تي ايف آءِ اي جو جاچ آفيسر خاموش رهيو.عدالت پڇاڻو ڪيو ته انڪوائري ۽ جاچ ۾ موقف بدلائڻ وارن خلاف ڪهڙي ڪارروائي ڪئي وئي؟ جاچ آفيسر جواب ڏنو ته اسان ڪا به ڪارروائي ناهي ڪئي.جج چيو ته ايف آءِ اي ڪي 7 جي حجم ۾ ڪو ثبوت آهي؟ مون کي سڌو ٻڌاءِ ته مون کي ڪهاڻيون نه ٻڌاءِ، مان سڀ پڙهي چڪو آهيان، ايف آءِ اي جي سمورن ماڻهن کي جيل موڪليندس، هاڻي اهو ياد رکو، مون کي جواب گهرجي ته چالان سان ڏوهه جو ثبوت ڇا هو؟ سليمان شهباز جي وڪيل امجد پرويز چيو ته مون چيو هو ته هي ڪيس نه ٺهندو پر پوءِ به ٺاهيو ويو. عدالت چيو ته اهو نه ٻڌايو وڃي ته ڪيس ڪنهن جي دٻاءَ تي ٺاهيو ويو.پراسيڪيوٽر چيو ته ڪو به سڌو سنئون ثبوت ناهي، جنهن فارم جي روشني ۾ اڪائونٽ کوليو ويو، سليمان شهباز کي جوابدار قرار ڏنو ويو.عدالت پڇاڻو ڪيو ته ڇا توهان وٽ ان ڪيس جي جاچ جو اختيار آهي؟ ايف آءِ اي جي اڳوڻي آفيسر چيو ته اها انڪوائري مني لانڊرنگ ايڪٽ تحت ڪئي وئي.عدالت پڇاڻو ڪيو ته ڇا ڪنهن اداري توهان کي رقم موڪلڻ جي شڪايت ڪئي؟ پراسيڪيوٽر چيو ته ايف آءِ اي وٽ مني لانڊرنگ جي جاچ جا اختيار آهن. ايف آءِ اي جي اڳوڻي آفيسر چيو ته اسان اهو ايڪشن شوگر انڪوائري ڪميشن جي روشني ۾ کنيو. عدالت پڇاڻو ڪيو ته ان ۾ ڪيتريون شگر ملون ملوث هيون؟ ان تي اڳوڻي ايف آءِ اي آفيسر چيو ته پاڪستان جي سمورن شگر ملن خلاف انڪوائري ڪئي وئي آهي، اڳوڻي وفاقي حڪومت جهانگير ترين، خسرو خاندان ۽ شريف خاندان جي شگر ملن خلاف ڪارروائي جو چيو هو. عدالت پڇاڻو ڪيو ته خسرو خاندان ۽ جهانگير ترين خلاف ڪهڙي ڪارروائي ڪئي وئي؟ اڳوڻي ايف آءِ اي آفيسر چيو ته مان انهن ڪيسن جو جاچ ڪندڙ ناهيان ان ڪري ٻڌائي نٿو سگهان. عدالت پڇاڻو ڪيو ته توهان اهو ڪيس ڪهڙي بنياد تي داخل ڪرايو؟ ايف آءِ اي جي اڳوڻي آفيسر چيو ته گڏيل جاچ ٽيم استغاثه داخل ڪرڻ جي سفارش ڪئي هئي، ڪيس ان بنياد تي داخل ڪيو ويو ته گهٽ پگهار وارا ماڻهو هئا. جنهن بعد عدالت مني لانڊرنگ ڪيس ۾ وزيراعظم شهباز شريف جي پٽ سليمان شهباز سميت سمورن جوابدارن کي بري ڪري ڇڏيو. عدالت ٻاهران ميڊيا سان ڳالهائيندي سليمان شهباز چيو ته ڪيس 7 سال هليو، خدا جو شڪر آهي ته حقيقتون عوام آڏو اچي ويون، اڄ خدا جي فضل سان اسان به سرخرو ٿي ويا آهيون.
