اسلام آباد(بيورو رپورٽ) پيٽروليم شين جي قيمتن ۾ تازي گھٽتائيءَ تي پاڪستان جي آئل انڊسٽري ۽ حڪومت وچ ۾ هڪ وڏو تڪرار پيدا ٿي ويو آهي. آئل مارڪيٽنگ ڪمپنين (OMCs) ۽ ريفائنريز الزام لڳايو آهي ته آئل اينڊ گيس ريگوليٽري اٿارٽي (اوگرا) عالمي پريميئم ۽ پلاٽس (Platts) جي سراسري اگهن جو غلط حساب ڪتاب لڳايو، جنهن جي نتيجي ۾، انڊسٽريءَ جي دعويٰ موجب، هاءِ اسپيڊ ڊيزل جي قيمت ۾ تقريبن 45 رپيا في ليٽر ۽ موٽر سپرٽ (پيٽرول) جي قيمت ۾ 11 رپيا في ليٽر جي حد کان وڌيڪ (اضافي) گھٽتائي ڪئي وئي.آئل انڊسٽري جي اسٽيڪ هولڊرز پاران شيئر ڪيل حساب ڪتاب موجب، اوگرا قيمتن جي تازي پندرهن ڏينهن واري جائزي دوران پريميئم جا اصل خرچ ۽ لاڳو ٿيندڙ پلاٽس جا سراسري اگهه مڪمل طور تي شامل نه ڪيا آهن.
