بيجنگ(ويب ڊيسڪ)اختيارين خميس ڏينهن ٻڌايو ته بيجنگ جي سڀ کان اوچي عمارت سان ننڍو جهاز ٽڪرائڻ سبب فوت ٿيل پائلٽ ذهني صحت جي مسئلن ۾ مبتلا هو ۽ پنهنجي ڊائري ۾ خودڪشي بابت به لکندو رهيو هو. ان حادثي ۾ 13 ماڻهو زخمي ٿيا.
66 ورهين جي پائلٽ جمعي ڏينهن شام 5:55 وڳي مقامي وقت موجب، بيجنگ جي سينٽرل بزنس ڊسٽرڪٽ ۾ واقع 528 ميٽر اوچي سي آءِ ٽي آءِ سي ٽاور (CITIC Tower) سان هڪ هلڪو جهاز ٽڪرايو هو.
هن حادثي کان پوءِ سخت سيڪيورٽي واري شهر بيجنگ ۾ هوابازي جي حفاظت بابت سوال اٿيا، ڇاڪاڻ ته سي آءِ ٽي آءِ سي ٽاور چيني اعليٰ اڳواڻن جي سرڪاري رهائشگاهه ۽ آفيسن واري علائقي زونگ نان هائي (Zhongnanhai) کان رڳو لڳ ڀڳ ست ڪلوميٽر (4.3 ميل) جي مفاصلي تي واقع آهي.
واقعي واري هنڌ تي موجود اي ايف پي (AFP) جي صحافين ٻڌايو ته عمارت جي مٿين منزلن مان هڪ جي دريءَ ۾ وڏو سوراخ نظر اچي رهيو هو، جڏهن ته اکين ڏٺن شاهدن موجب ٽاور جي هيٺان جهاز جا ٽڪرا پکڙيل هئا ۽ اتي ننڍڙي باهه پڻ لڳي هئي.
بيان موجب، ليو نالي پائلٽ طلاق يافته هو، بيجنگ ۾ اڪيلو رهندو هو ۽ “هو گهڻي عرصي کان بي خوابي ۽ پريشاني (اينزائٽي) جو شڪار هو، جڏهن ته سندس ڊائري ۾ ڪيترائي ڀيرا ‘پنهنجي زندگي ختم ڪرڻ’ جا حوالا موجود هئا.”
چائويانگ ضلعي جي حڪومت پنهنجي بيان ۾ چيو، “هي ذاتي سببن جي ڪري پيش آيل اهڙو واقعو هو، جنهن سان عوامي سلامتي کي خطرو پيدا ٿيو.”
بيان موجب، ليو فري لانس طور ڪم ڪندو هو. هن 2021ع ۾ اسپورٽ پائلٽ جو لائسنس حاصل ڪيو ۽ 2024ع ۾ پرائيويٽ پائلٽ جو لائسنس به ورتو.
واقعي واري ڏينهن منجهند جو هن بيجنگ جي مضافاتي پنگگو ضلعي ۾ واقع جنرل ايويئيشن ايئرپورٽ تان اڏام ڀري ۽ نگراني هيٺ اڏامن سان گڏ اڪيلي سر به اڏامون ڪيون.
اختيارين موجب، پنهنجي آخري اڪيلي اڏام دوران ليو مقرر ڪيل اڏام واري علائقي کان هٽي ويو ۽ حادثي کان اڳ ايئرپورٽ سان سندس رابطو به ختم ٿي ويو.
هو ٻه سيٽن واري پروپيلر سان هلندڙ هلڪي جهاز کي اڏائي رهيو هو.
حادثي کان ٿوري ئي دير پوءِ چيني سوشل ميڊيا تان جهاز حادثي جون تصويرون ۽ وڊيوز تيزي سان هٽايون ويون، جڏهن ته واقعي واري هنڌ موجود پوليس صحافين ۽ ٻين ماڻهن کي عمارت جون تصويرون ڪڍڻ کان به روڪيندي رهي.
