اسلام آباد(بيورو رپورٽ)خاتونِ اول آصفه ڀٽو زرداري آچر ڏينهن پنجاب حڪومت کان مطالبو ڪيو آهي ته راولپنڊي ۾ حنا جاويد جي قتل جي مڪمل ۽ جامع جاچ ڪرائي وڃي، جيڪا هن هفتي جي شروعات ۾ پنهنجي اپارٽمينٽ ۾ مئل حالت ۾ ملي هئي.
حنا خميس ڏينهن شام عسڪري اپارٽمينٽس، لال ڪُرتي ۾ پنهنجي فليٽ جي واش روم مان مئل حالت ۾ ملي هئي. پوليس موجب سندس جسم تي تشدد جا نشان موجود هئا، سندس ڳچيءَ چوڌاري تار ٻڌل هئي، جيڪا شاور جي راڊ سان ٻڌي وئي هئي. پوليس ڪيس جي سلسلي ۾ سندس مڙس ۽ هڪ گهريلو ملازم کي حراست ۾ ورتو آهي.
صدر جي آفيس پاران سوشل ميڊيا پليٽ فارم ايڪس تي جاري ڪيل پوسٽ ۾ چيو ويو ته خاتونِ اول ”راولپنڊي ۾ حنا جاويد جي مبينا بي رحماڻي قتل تي گهري ڳڻتي ۽ ڏک جو اظهار ڪيو ۽ سوڳوار خاندان سان يڪجهتي ۽ تعزيت جو اظهار ڪيو.“
بيان موجب آصفه صوبائي حڪومت تي زور ڏنو ته ”هن سنگين ڏوهه جي مڪمل جاچ ۽ مناسب تحقيقات“ ڪرائي وڃي.
آصفه چيو ته ذميوارن کي انصاف جي ڪٽهڙي ۾ آندو وڃي ۽ ”انهن کي اهڙو مثال بڻايو وڃي جو ٻيهر ڪنهن کي اهڙو عمل ڪرڻ جي همت نه ٿئي.“
هن پاڪستان ۾ عورتن خلاف تشدد جي واقعن ۾ واڌ تي ڳڻتي جو اظهار ڪندي عورتن جي تحفظ ۽ مستقبل ۾ اهڙن ڏوهن جي روڪٿام کي يقيني بڻائڻ لاءِ قدم کڻڻ جو مطالبو ڪيو.
ايف آءِ آر موجب، جيڪا 20 آگسٽ تي سول لائنز ٿاڻي ۾ پاڪستان پينل ڪوڊ جي قلم 302 ارادي سان قتل) ۽ 34 (گڏيل ارادي تحت داخل ڪئي وئي، حنا جي ڀاءُ فهد جاويد الزام لڳايو ته سندس ڀيڻ کي سندس مڙس، سهري ۽ سندن گهريلو ملازم قتل ڪيو.
فهد پوليس کي ٻڌايو ته خميس ڏينهن شام تقريبن 6:53 وڳي کيس سندس ڀيڻ جي سهري جو فون آيو، جنهن کيس گهر ۾ هنگامي صورتحال بابت اطلاع ڏنو. هن چيو ته هو ٻين گهرڀاتين سان گڏ فليٽ ڏانهن روانو ٿيو ۽ تقريبن 7:23 وڳي اتي پهتو.
هن الزام لڳايو ته جڏهن هو گهر پهتو ته سندس ڀيڻ جو لاش واش روم ۾ پيل هو. شڪايت ڪندڙ وڌيڪ الزام لڳايو ته سندس ڀيڻ کي مڙس پاران ”سخت تشدد ۽ بدسلوڪي“ جو نشانو بڻايو ويندو هو.
هن اهو به خدشو ظاهر ڪيو ته شايد سندس ڀيڻ کي مرڻ کان اڳ ڪا زهريلي شيءِ کارائي يا پياري وئي هجي.
فهد پنهنجي شڪايت ۾ ٻڌايو ته حنا نومبر 2025ع ۾ جوابدار سان شادي ڪئي هئي.
شروعاتي پوسٽ مارٽم رپورٽ موجب سندس ڳچيءَ تي ڦاسي يا ڳچيءَ دٻجڻ جو نشان موجود هو، ساڄي چپ جي هيٺان زخم ۽ رت وهڻ جا نشان پڻ مليا.
ڇنڇر ڏينهن پوليس ترجمان ٻڌايو ته حنا جي مڙس ۽ سندن گهريلو ملازم کي قتل جي الزام ۾ حراست ۾ ورتو ويو آهي، جڏهن ته سندس سهري کان پوليس پڇا ڳاڇا ڪري رهي آهي. پوليس موجب مرحومه جو سهرو رٽائرڊ فوجي آفيسر آهي.
