اسلام آباد (بيورو رپورٽ) وزيراعظم شهباز شريف چيو آهي ته انساني جانيون بچائڻ لاءِ پنهنجو ڪردار ادا ڪندا رهنداسين. وزيراعظم جي صدارت هيٺ وفاقي ڪابينا اجلاس ٿيو، جنهن ۾ شهباز شريف ڪابينا ميمبرن کي ايران – آمريڪا ڳالهين ۾ پاڪستان جي ڪوششن کان آگاهه ڪيو.وزيراعظم چيو ته ايران ۽ آمريڪا کي ڏهاڪن کانپوءِ آمهون سامهون ويهارڻ جو سهرو پاڪستان کي وڃي ٿو، ڳالهين ۾ اڳڀرائي لاءِ پراميد آهيون، ايران ۽ آمريڪا جا رنڊيل معاملا حل ڪرائڻ جي ڪوشش ڪري رهيا آهيون. وفاقي ڪابينا ايران – آمريڪا ڳالهين لاءِ وزيراعظم جي ڪوششن کي ساراهيو، جڏهن ته نائب وزيراعظم ۽ فيلڊ مارشل جي ڪردار جي به واکاڻ ڪئي وئي.
