اسلام آباد(بيورو رپورٽ)وزيراعظم شهباز شريف، جيڪو هن وقت ٻن ڏينهن جي سرڪاري دوري تي سعودي عرب ۾ موجود آهي، جمعي ۽ خميس جي رات عمرو ادا ڪيو ۽ ملڪ جي “آپريشن بنيان المرصوص” جي ڪاميابي لاءِ شڪرانو ادا ڪيو. پرڏيهي وزارت جي ترجمان موجب، هي دورو ولي عهد محمد بن سلمان جي دعوت تي 5 ۽ 6 جون تائين ڪيو ويو. دوري جو مقصد ٻنهي ملڪن جي وچ ۾ اهم شعبن ۾ گڏيل سهڪار کي هٿي ڏيڻ آهي. وزيراعظم شهباز شريف سعودي قيادت جو پاڪ ڀارت تڪرار ۾ تعميراتي ڪردار ادا ڪرڻ تي شڪريو ادا ڪيو. وزيراعظم سان گڏ آرمي چيف فيلڊ مارشل جنرل عاصم منير، نائب وزيراعظم ۽ پرڏيهي وزير محمد اسحاق ڊار، گهرو وزير سيد محسن رضا نقوي، ۽ اطلاعات ۽ نشريات وارو وزير عطاالله تارڙ پڻ عمره ادا ڪيو. وفد لاءِ ڪعبه شريف، جيڪو اسلام جو مقدس ترين هنڌ آهي، جا در خاص طور کوليا ويا، جتي انهن پاڪستان ۽ دنيا جي مسلمان برادري، خاص طور تي غزه ۽ ڀارت جي قبضي هيٺ ڪشمير ۾ رهندڙ مسلمانن جي خوشحالي لاءِ دعائون گهريون. هنن گذريل مهيني ڀارت جي جارحيت خلاف پاڪستان جي ڪاميابي ۽ حاليه اقتصادي واڌ ويجهه لاءِ به الله جو شڪر ادا ڪيو. پرڏيهي وزارت چيو: “هي دورو پاڪستان ۽ سعودي عرب جي وچ ۾ گهري، آزمودہ دوستي ۽ گڏيل ايمان، عزت ۽ حڪمت عملي واري ڀائيواري تي ٻڌل لاڳاپن کي وڌيڪ مضبوط بڻائي ٿو.” بيان ۾ وڌيڪ چيو ويو: “اهو ٻنهي ملڪن جي قيادت جي معاشي ۽ سفارتي لاڳاپن کي وڌيڪ هٿي ڏيڻ، سعودي عرب جي ويزن 2030 ۽ پاڪستان جي ترقياتي ترجيحن سان هم آهنگي پيدا ڪرڻ واري عزم جي عڪاسي ڪري ٿو.” وزيراعظم شريف جو دورو پاڪستان ۽ سعودي عرب جي لاڳاپن کي وڌيڪ مضبوط ڪرڻ ۽ گهڻ رخا سهڪار جا نوان رستا کولڻ جي توقع ڪئي پئي وڃي.
