اسلام آباد(رپورٽ اياز مهر) پاڪستان ۾ دهشتگردي جا واقعا وڌي رهيا آهن، هلندڙ سال جولاءِ ۾ 38 دهشتگردي جا حملا ٿيا ۽ آگسٽ ۾ انهن جو تعداد 59 رڪارڊ ٿيو آهي. انهن واقعن ۾ ڪي پي ڪي ۾ 29، بلوچستان ۾ 28 ۽ پنجاب ۾ ٻه حملا شامل آهن، جن ۾ 84 ماڻهو مارجي ويا ۽ 166 زخمي ٿيا. اسلام آباد جي ثنڪ ٽئنڪ ’پاڪ انسٽيٽيوٽ فار پيس اسٽڊيز (PIPS)‘ پاران تيار ڪيل ڊجيٽل ڊيٽابيس جي ماهوار رپورٽ ۾ ڄاڻايو ويو آهي ته بلوچستان ۾ آگسٽ 2024 دوران دهشتگردي جا 28 واقعا پيش آيا، جن جي نتيجي ۾ 57 ڄڻا مارجي ويا ۽ 84 زخمي ٿيا. صوبي ۾ دهشتگردي سان لاڳاپيل انهن مان اڪثر جانيون 26 آگسٽ تي (نواب اڪبر بگٽي جي ورسي جي موقعي تي حملا ٿيا) صوبي جي ستن ضلعن ۾ پابندي مڙهيل تنظيم بي ايل اي جي حملن جي نتيجي ۾ سيڪيورٽي فورسز، غير بلوچ ماڻهن (خاص طور تي پنجابي) ۽ قومي انفراسٽرڪچر کي نشانو بڻايو ويو. رپورٽ ۾ ڄاڻايو ويو آهي ته ڪي پي ڪي ۾ 29 دهشتگردي جا حملا ٿيا، جن ۾ 25 ڄڻا مارجي ويا ۽ 80 زخمي ٿيا. مبينا طور تي پابندي مڙهيل تحريڪ طالبان پاڪستان، حافظ گل بهادر گروپ، لشڪر اسلام، اسلامڪ اسٽيٽ-خراسان ۽ ڪجهه مقامي طالبان گروپن اهي حملا ڪيا. ان دوران پنجاب مان ٻن حملن ۾ ٻه شهري زخمي ٿيا۽ ٻه حملي آور پڻ مارجي ويا. سيڪيورٽي فورسز ۽ پوليس جي دهشتگردي جي خاتمي واري کاتي آگسٽ ۾ ملڪ ۾ شدت پسندن خلاف 12 آپريشن ڪيا، جڏهن ته جولاءِ ۾ 11 آپريشن ڪيا ويا هئا. آگسٽ ۾ ڪيل انهن آپريشنن ۾ 88 شدت پسند مارجي ويا ۽ 15 فوجي جوان ۽ 3 پوليس اهلڪار شهيد ٿيا. رپورٽ ٿيل 12 مان 8 آپريشن ڪي پي ڪي ۾ ٿيا، جڏهن ته 4 بلوچستان ۾ ٿيا. هن سال آگسٽ ۾ بلوچستان ۾ رڪارڊ ڪيل ڪل 28 حملن مان 26 بي ايل اي پاران ڪيا ويا، جن ۾ 26 آگسٽ تي گروپ جو وسيع منظم دهشتگردي جا 7 شهرن ۾ حملا ڪيا ويا. PIPS پنهنجي ماهوار سيڪيورٽي رپورٽ ۾ چيو آهي ته هٿياربند گروهه بي ايل اي پنهنجي تباهي واري سرگرمين کي وڌايو آهي، انتهائي اثر انداز حملن کي انجام ڏيڻ ۽ عورتن جي خودڪش بمبارن کي استعمال ڪيو آهي. رپورٽ ۾ واضح ڪيو ويو آهي ته ڪيترن ئي ويڙهاڪن جي شموليت ۽ جديد هٿيارن جو استعمال بشمول گاڏين ۾ ذريعي ڌماڪيدار مادي جي استعمال، بي ايل اي جي وڌندڙ صلاحيتن جي نشاندهي ڪن ٿا.
