ڪراچي (اسٽاف رپورٽر) فيڊرل بورڊ آف روينيو (ايف بي آر) لارجر ٽيڪس پيئرز آفيس ڪراچي پهريون ڀيرو جولاءِ کان ڊسمبر 2023ع دوران 1221 ارب رپيا ٽيڪس وصول ڪري رڪارد قائم ڪيو آهي. هلندڙ مالي سال جي پهرين 6 ماهي يعني جولاءِ کان ڊسمبر تائين پهريون ڀيرو هڪ ٽريلن (هڪ هزار ارب )کان مٿي ٽيڪس گڏ ڪئي آهي. ڪمشنر انلينڊ روينيو گرڌاري مل نيوز بريفنگ دوران تفصيل ٻڌائيندي چيو ته اسانکي هلندڙ مالي سال جي ابتدائي 6 مهينن ۾ ٽيڪس وصولي جو ٽارگيٽ 1216 ارب رپيا مليو هو پر اسين ٽارگيٽ کان 5 ارب روپيا مٿي ٽيڪس گڏ ڪئي، هلندڙ سال جي ابتدائي 6 مهينن ۾ گڏ ڪيل ٽيڪس گذريل سال جي پهرين 6 ماهي کان 26.79 سيڪڙو وڌيڪ آهي. هن چيو ته اهو سنگ ميل درآمدات ۾ 2.5 سيڪڙو جي نالي ماتر واڌ جي باوجود حاصل ڪيو ويو آهي ۽ اهڙي ريت ملڪي ٽيڪسن ۾ 47 سيڪڙو جي نمايان واڌ حاصل ڪئي وئي آهي. هن اميد ظاهر ڪئي ته ايل ٽي او هلندڙ سال دوران 2.5 ٽرلين يعني 2500 ارب کان مٿي ٽيڪس گڏ ڪرڻ ۾ ڪامياب وينداسين. گرڌاري مل اشارن مان معلوم ٿئي ٿو ته ”معاشي بدحالي معاشي بحاليءَ ۾ تبديل ٿي رهي آهي،“ هن نوٽ ڪيو ۽ ان عزم جو اظهار ڪيو ته ايف بي آر قومي معيشت کي معاشي بحرانن مان ڪڍڻ لاءِ حڪومتي ڪوششن ۾ حصو وٺڻ جي ڪوشش ڪري رهيو آهي. هن ٻڌايو ته ٽيڪس وصولي ۾ واڌ بئنڪنگ، ڪاٽن جننگ، اليڪٽرڪ اينڊ اليڪٽرانڪس، ايف ايم سي جيز ۾ مثبت واڌارو آيو. انشورنس، دواسازي، سافٽ ويئر ۽ شپنگ جا شعبا شامل آهن، جڏهن ته ٽيڪس گهٽ ملڻ وارن شعبن ۾ آٽو موبائيل ۽ آٽو پارٽس، تعمير ۽ تيل جي ڳولا جا شعبا شامل آهن جيڪي منفي زون ۾ رهيا. هن ٻڌايو ته هلندڙ مالي سال جي ابتدائي 6 مهينن ۾ 75 بلين جا ريفنڊ جاري ڪيا ويا، اها رقم گذريل سال جي 36 ارب رپين جي ڀيٽ ۾ 103 سيڪڙو وڌيڪ آهي. هن چيو ته ايل ٽي او گهريلو ۽ درآمدي مرحلن تي ٽيڪس جو تفصيلي تجزيو ڪيو آهي جڏهن ته سڌي طرح ٽيڪس ۽ نان وٿ هولڊنگ ٽيڪسن مان گڏ ڪرڻ جو تناسب پڻ بهتر ٿيو آهي. عدالتي ڪيسن جا تفصيل شيئر ڪندي ڪمشنر آءِ آر ٻڌايو ته سپريم ڪورٽ ۾ 38 ارب رپين جا 1019 ڪيس ٻڌڻي هيٺ آهن، هاءِ ڪورٽن ۾ 2408 ڪيس آهن جن ۾ 331 ارب رپين جي تڪراري رقم شامل آهي جڏهن ته ٽيڪس ٽربيونل 4787 ڪيسن جي ٻڌڻي ڪري رهيا آهن. ڪيسن ۾ 1121 ارب رپين کان وڌيڪ ٽيڪس جي رقم جمع آهي. هڪ سوال جي جواب ۾ هن چيو ته ايف بي آر 1996ع ۾ آٽوميشن جو عمل شروع ڪيو هو ۽ ان ۾ بتدريج بهتري آئي آهي ۽ هاڻي ايف بي آر ۾ اڪثر عمل خودڪار ٿي چڪو آهي. هڪ ٻئي سوال تي هن چيو ته ٽيڪس جي تعميل ۽ ڀرتي لاءِ ڪوششون جاري آهن ڇو ته ڏٺو ويو آهي ته ڪجهه ماڻهو اهڙا آهن جيڪي وڏيون ٽرانزيڪشن ڪري رهيا آهن پر اهي نان فائلر آهن. هن وڌيڪ چيو ته کين ڪجهه سهولتن جي فراهمي کي روڪڻ لاءِ ڪارروائي ڪئي پئي وڃي ۽ سندن فون سمز به بلاڪ ڪيا وڃن.
