ڪراچي (اسٽاف رپورٽر)سنڌ جي وڏي وزير سيد مراد علي شاهه جو چوڻ آهي ته اسان ماڻهن کي ٻوڏ کان بچائڻ ۾ مصروف آهيون، ڇا گرڊ اسٽيشن کي به بچائڻ گهرجي؟ سڀني پاور ڪمپنين جا پنهنجا انجنيئر ۽ اسٽاف آهن.باني پاڪستان قائداعظم محمد علي جناح جي 74هين ورسي جي موقعي تي سنڌ جي وڏي وزير مراد علي شاهه ۽ وقتي گورنر آغا سراج دراني قائداعظم جي مزار تي حاضري ڀري گلن جي چادر چاڙهي ۽ فاتحه خواني ڪئي.ان موقعي تي وڏي وزير چيو ته باباءِ قوم جي قائداڻي صلاحيت جي ڪري اسان هڪ آزاد ملڪ ۾ رهندڙ آهيون، اسان سڀني کي گڏجي قائداعظم جي هن ملڪ کي سنوارڻو آهي.مهمانن جي ڪتاب ۾ وقتي گورنر سنڌ ۽ وزيراعليٰ سنڌ پنهنجا رايا رڪارڊ ڪيا.مزار قائد تي حاضري کانپوءِ صحافين سان ڳالهائيندي سنڌ جي وڏي وزير چيو ته هو بجلي پيدا ڪندڙ ڪمپنين جي ڪارڪردگيءَ مان مطمئن ناهيون، لوڊشيڊنگ بابت وفاقي حڪومت سان ڳالهائيندو.وڏي وزير چيو ته اسان وٽ موجود پئسن سان دوائون خريد ڪيون جيڪي اسٽاڪ ۾ هيون، سنڌ ۾ 20 لک بي گهر ماڻهو آهن.هن چيو ته ٻوڏ سبب صوبي ۾ لڳ ڀڳ 20 لک ماڻهو بي گهر آهن، سکر، خيرپور، بدين کان وٺي ٿرپارڪر تائين ٻوڏ سبب تباهي ٿي آهي.هن چيو ته پڊعيدن ۾ 1700 ملي ميٽر کان وڌيڪ برسات ٿي آهي، زرعي شعبي کي ساڍا ٽي ارب رپين جو نقصان پهتو آهي، ڪڻڪ جو فصل مڪمل طور تي ختم ٿي ويو آهي، نومبر ۽ ڊسمبر تائين 75 سيڪڙو علائقي ۾ ڪڻڪ جي پوک شروع ٿي ويندي. .وڏي وزير چيو ته ان ۾ هن خطي جي عوام جو قصور ناهي، موسمياتي تبديلين جو شڪار اڄ پاڪستان آهي، سڀاڻي ڪو ٻيو ملڪ هوندو، جڏهن کان هي خطو بڻيو آهي، اهڙي تباهي اڳ ڪڏهن به ناهي آئي.مراد علي شاهه چيو ته اهو سڀ ڪجهه فطرت سان وڙهڻ سبب ٿيو آهي، سنڌ ۾ ڪيترن ئي هنڌن تي اٺ کان ڏهه فوٽ پاڻي آهي، ماڻهن جي بحالي لاءِ پروگرام جوڙيو ويو آهي. هن چيو ته هن گڏيل قومن جي سيڪريٽري جنرل کي چيو ته اسان کي پئسن جي ضرورت ناهي، اسان کي خيمن ۽ مڇر داني جي ضرورت آهي. هڪ سوال جي جواب ۾ وڏي وزير چيو ته هر هنڌ ڊيم نٿو ٺهي سگهي، ڪراچي يا جيڪب آباد ۾ ڊيم ٺاهي سگهو ٿا ته ٻڌايو.هن چيو ته ڪراچي، پڊعيدن ۽ جيڪب آباد ۾ ڊيم نه ٿا ٺهي سگهن ڇو ته سنڌ ميداني علائقو آهي.
