جيڪب آباد(ن س) پيپلز پارٽي جو سينئر اڳواڻ مير بابل خان جکراڻي فوت ٿي ويو آهي. سندس جنازي نماز اڄ شام جيڪب آباد ۾ ادا ڪئي ويندي. هو ڳچ عرصي کان بيمار هو. هو قومي اسمبلي ۽ سنڌ اسمبلي جو اڳوڻو ميمبر هو ۽ هن وقت پيپلز پارٽي جي قومي اسمبلي ۾ چيف وهپ اعجاز خان جکراڻي جو والد هو. اعجاز جکراڻي پنهنجي فيسبڪ تي سندس هڪ يادگار تصوير شيئر ڪئي آهي جنهن ۾ هو ڳاڙهي ٽوپي پائي تڏهوڪي وزيراعظم محترمه بينظير ڀٽو جي پويان ويٺل نظر اچي ٿو. پيپلز پارٽي جي چيئرمين بلاول ڀٽو زرداري، سنڌ جي وڏي وزير سيد مراد علي شاهه ۽ شازيه مري سندس وفات تي ڏک جو اظهار ڪندي مرحوم جي بخشش جي دعا ڪئي آهي.
