اسلام آباد (رپورٽ اياز مهر)پيپلزپارٽي جي چيئرمين بلاول ڀٽو زرداري جو چوڻ آهي ته پارليامينٽ سپريم آهي ان جي اڳيان سڀني کي جهڪڻو پوندو. پنهنجي هڪ بيان ۾ بلاول ڀٽو زرداري چيو ته 14 مئي پاڪستان ۽ جمهوريت لاءِ تاريخي ڏينهن آهي، ان ڏينهن تي بينظير ڀٽو شهيد ۽ نواز شريف ميثاق جمهوريت تي صحيحون ڪيون، جنهن سان پاڪستان ۾ اسمبلين مدت مڪمل ڪرڻ شروع ڪئي ۽ جمهوريت مضبوط ٿي. ميثاق جمهوريت کي 17 سال مڪمل ٿيڻ تي هن جاري بيان ۾ وڌيڪ چيو ته آصف علي زرداري چارٽر آف ڊيموڪريسي تي عمل ڪندي اختيار پارليامينٽ کي ڏنا، 18هين آئيني ترميم وفاق ۽ سمورن يونٽن جي وچ ۾ نئون ٺاهه آهي، اڄ پارليامينٽ تي حملا ٿي رهيا آهن ۽ ان جي اختيارن کي چيلينج ڪيو پيو وڃي. نئون آئين لکيو پيو وڃي، جنهن کي پاڪستان پيپلز پارٽي منظور نه ڪيو آهي نه ڪندي، آئين ٺاهڻ جو اختيار رڳو پارليامينٽ کي آهي.
