اسلام آباد: (بيورو رپورٽ) پارليامينٽ جي ٻنهي ايوانن جو گڏيل اجلاس سڀاڻي صبح 10:30 وڳي ٿيندو جنهن ۾ صدر آصف علي زرداري خطاب ڪندو. اسلامي جمهوريه پاڪستان جي صدر آصف علي زرداري سڀاڻي صبح 10:30 وڳي مجلس شوريٰ (پارليامينٽ) جو گڏيل اجلاس طلب ڪيو آهي. صدر آئين جي آرٽيڪل 54 (1) ۽ 56 (3) جي تحت حاصل ڪيل اختيارن کي استعمال ڪندي پارليامينٽ جو گڏيل اجلاس طلب ڪيو آهي.قومي اسيمبلي سيڪريٽريٽ موجب، هر پارلياماني سال جي شروعات ۾ پارليامينٽ جو گڏيل اجلاس سڏايو ويندو آهي، ۽ صدر جو اجلاس کي خطاب آئيني ضرورت آهي. صدر آصف علي زرداري پاڪستان جي صدر جي حيثيت سان نائين ڀيرو گڏيل اجلاس کي خطاب ڪندو. قومي اسيمبلي سيڪريٽريٽ گڏيل اجلاس لاءِ تياريون شروع ڪري ڇڏيون آهن، جنهن سان گڏ خطي ۾ ڇڪتاڻ واري صورتحال جي تناظر ۾ سخت سيڪيورٽي اپاءَ ورتا پيا وڃن. ذريعن موجب، صدر پاڪستان ۽ افغانستان جي وچ ۾ جنگ، آمريڪا ۽ اسرائيل جي ايران سان جنگ ۽ جواب ۾ خليجي ملڪن تي حملن جي ڪري پيدا ٿيل صورتحال تي پڻ ڳالهائيندو. صدر جو خطاب حڪومت جي ٻن سالن جي ڪارڪردگي، قومي ترجيحن، جمهوري استحڪام، آئيني بالادستي، پائيدار معاشي ترقي، علائقائي ۽ عالمي صورتحال، دهشتگردي خلاف قومي عزم، ۽ ملڪ ۾ پرڏيهي مدد سان هلندڙ دهشتگردي کي مڪمل طور تي ختم ڪرڻ جي عزم کي ڍڪيندو.
