راولپنڊي (ويب ڊيسڪ) پاڪستان جي فوج افغانستان ۾ پابندي مڙهيل تحريڪ طالبان پاڪستان (ٽي ٽي پي) لاءِ موجود محفوظ پناهگاهن ۽ ڪارروائي جي آزادي تي سخت ڳڻتي ۽ خدشا ظاهر ڪيا آهن. جمعي تي آءِ ايس پي آر جي ڊائريڪٽر جنرل پاران جاري ڪي بيان ۾ وڌي چيو ويو آهي ته آرمي چيف جنرل عاصم منير ڪوئيٽا گيريزن جو دورو ڪيو، جتي کيس بلوچستان جي علائقي ژوب ڪينٽ ۾ فوجي ٺڪاڻن تي حملي بابت بريفنگ ڏني وئي. ياد رهي ته گذريل اربع تي زوب ڇانوڻي تي ٿيل حملي ۾ 9 فوجي جوان شهيد ٿي ويا هئا جڏهن ته سڪيورٽي فورسز جي جوابي ڪارروائي ۾ 5 دهشتگرد مارجي ويا. ژوب ضلعي جي ڊپٽي ڪمشنر (ڊي سي) عظيم ڪاڪڙ موجب فائرنگ جي نتيجي ۾ هڪ شهري عورت پڻ مارجي وئي ۽ 5 ٻيا شهري زخمي ٿي پيا. هئا. آءِ ايس پي آر موجب اڄ آرمي چيف ڪمبائنڊ ملٽري اسپتال ۾ حملي ۾ زخمي ٿيل جوانن جي عيادت ڪئي، سندن خدمتن ۽ عزم کي ساراهيو. هن شهيدن کي ”خراج تحسين“ پڻ پيش ڪيو. بيان ۾ چيو ويو آهي ته پاڪ فوج کي افغانستان ۾ ٽي ٽي پي کي “محفوظ پناهه ۽ عمل جي آزادي” جي دستيابي تي ڳڻتي آهي. بيان موجب “اميد آهي ته عبوري افغان حڪومت دوحا معاهدي موجب پنهنجي سرزمين کي دهشتگردي جي خلاف استعمال ڪرڻ جي اجازت نه ڏيندي. افغانستان ۾ 2001-2021 جي جنگ جو خاتمو آڻڻ لاءِ فيبروري 2020 ۾ آمريڪا ۽ افغان طالبان جي وچ ۾ قطر جي راڄڌاني دوحه ۾ معاهدي تي صحيحون ڪيون ويون هيون. اهو معاهدو آخرڪار 15 آگسٽ 2021 تي افغانستان مان آمريڪي فوجن جي واپسي جو سبب بڻيو هو. ان دوران پاڪستان بار بار افغان سرزمين کي سرحد پار دهشتگردي لاءِ ويڙهاڪن پاران استعمال ڪرڻ تي خدشن جو اظهار ڪندو رهيو آهي. آءِ ايس پي آر پاران اڄ جاري ڪيل بيان ۾ پاڪستان ۾ دهشتگردي جي واقعن ۾ افغان شهرين جي ملوث هجڻ جي نشاندهي به ڪئي وئي آهي. ”پاڪستان ۾ دهشتگردي جي ڪاررواين ۾ افغان شهرين جي شموليت هڪ ٻيو اهم خدشو آهي جنهن کي حل ڪرڻ جي ضرورت آهي. اهڙا حملا ناقابل برداشت آهن ۽ پاڪستان جي سيڪيورٽي فورسز کين موثر جواب ڏينديون”. بيان ۾ وڌيڪ چيو ويو ته دهشتگردن خلاف ڪارروايون جاري رهنديون ۽ هٿياربند فوج ملڪ مان دهشتگردي جي خاتمي تائين آرام سان نه ويهندي. ڪجهه عرصي کان پاڪستان ۾ دهشتگردي جي سرگرمين ۾ اضافو ڏٺو ويو آهي، خاص طور تي خيبرپختونخواهه ۽ بلوچستان ۾، پابندي مڙهيل تحريڪ طالبان پاڪستان پاران گذريل سال نومبر ۾ حڪومت سان جنگبندي ختم ڪرڻ کان پوءِ ان ۾ واڌ ٿي آهي. ژوب گيريزن تي حملي کان علاوه بلوچستان جي علائقي سوئي ۾ به شدت پسندن سڪيورٽي فورسز تي حملا ڪيا، آءِ ايس پي آر جو چوڻ هو ته اڳ ۾ فائرنگ جي تبادلي دوران ٽن بهادر جوانن بهادري سان وڙهندي شهادت ماڻي هئي، جڏهن ته ٻن دهشتگردن کي ماريو ويو هو. ٻنهي حملن ۾ 12 فوجين جي گڏيل موت هن سال رپورٽ ٿيل دهشتگرد حملن مان فوج جي سڀ کان وڌيڪ هڪ ڏينهن جي موت جو تعداد آهي. جون ۾ هڪ پريس ڪانفرنس ڪندي انٽر سروسز پبلڪ رليشنز جي ڊائريڪٽر جنرل ميجر جنرل احمد شريف چوڌري چيو هو ته سيڪيورٽي فورسز هن سال 13619 انٽيليجنس آپريشن ڪيا جن ۾ 1172 دهشتگرد مارجي ويا يا گرفتار ڪيا ويا. هن چيو ته روزاني جي بنياد تي هٿياربند فوج، پوليس، انٽيليجنس ايجنسين ۽ ٻين قانون لاڳو ڪندڙ ادارن پاران دهشتگردي جي خاتمي لاءِ 77 کان وڌيڪ آپريشن ڪيا پيا وڃن. ڊي جي شريف وڌيڪ چيو هو ته ان آپريشن ۾ 95 جوان شهيد ٿيا هئا. تازو ئي اربع ڏينهن پرڏيهي آفيس جي ترجمان ممتاز زهرا بلوچ هفتيوار نيوز بريفنگ دوران افغان اختيارين تي زور ڀريو هو ته پنهنجا واعدا پورا ڪن ته سندن سرزمين پاڪستان خلاف دهشتگردي لاءِ استعمال ٿيڻ نه ڏني ويندي. هن چيو هو ته اها سندن ذميواري آهي ته اها يقيني بڻائين ته سندن سرزمين پاڪستان خلاف استعمال نه ٿئي.
