لاهور(ويب ڊيسڪ)ڪينٽونمينٽ عدالتن ۾ هڪ عدالتي مئجسٽريٽ آڏو قلمبند ڪرايل بيان ۾ ٻن پرڏيهي عورتن ڪيترن ئي ڏينهن تائين جاري رهندڙ هڪ هولناڪ واقعي جا تفصيل بيان ڪيا، جنهن دوران سندن مبينا اغوا، لکين ڊالرن جي ڀُنگ لاءِ دٻاءُ، تشدد ۽ جنسي زيادتي ڪئي وئي. اها ڳالهه ڇنڇر تي سامهون آئي.
ڊان اخبار جي رپورٽ موجب ٻنهي پرڏيهي عورتن پنهنجا بيان خميس ڏينهن قلمبند ڪرايا، جنهن ڏينهن پوليس سندن بازيابي کان پوءِ مبينا اغوا ۽ جنسي زيادتي جي الزام هيٺ پنجن جوابدارن خلاف ڪيس داخل ڪيو. جوابدارن مان چار ڄڻا، جن ۾ هڪ سينيئر سياسي شخصيت جو ويجهو مائٽ پڻ شامل آهي(نائب وزيراعظم اسحاق ڊار جو ويجهو عزيز رضا ڊار)، گرفتار ڪيا ويا ۽ بعد ۾ کين پنجن ڏينهن جي جسماني رمانڊ تي پوليس حوالي ڪيو ويو.
شڪايت ڪندڙ متاثر عورت، جيڪا هالينڊ جي شهري آهي، ضابطه فوجداري (CrPC) جي سيڪشن 164 تحت پنهنجي رضاڪارانه بيان ڏنو. اهو بيان ڊفينس سي ٿاڻي ۾ داخل ڪيل فرسٽ انفارميشن رپورٽ (FIR) جي جاچ دوران قلمبند ڪيو ويو.
جوابدارن خلاف پاڪستان پينل ڪوڊ (PPC) جي سيڪشن 375-اي (زيادتي) ۽ 365-اي (ڀُنگ لاءِ اغوا) سميت سنگين دفعات تحت ڪيس داخل ڪيو ويو آهي.
متاثر عورت جي حلفي بيان موجب، هوءَ ۽ سندس ساٿي، جيڪا وينزويلا جي شهري آهي، 26 جون 2026ع تي پاڪستان پهتيون. سندن چوڻ موجب کين هڪ مقامي ڪاروباري ساٿي دعوت ڏني هئي، جنهن سان سندن پهرين ملاقات آڪٽوبر 2025ع ۾ سنگاپور ۾ ٿي هئي.
هالينڊ سان تعلق رکندڙ عورت ٻڌايو ته مرڪزي جوابدار، جيڪو پاڻ کي حڪومت جي بااثر شخصيتن سان ويجهو لاڳاپيل ظاهر ڪندو هو، سندس ڪمپني لاءِ وڏن سيڙپڪارن سان ملاقاتون ڪرائڻ جي بهاني ٻنهي عورتن جون ويزائون ٺهرايون.
اسلام آباد جي هڪ هوٽل ۾ ٽي ڏينهن ترسڻ دوران هنن نٿيا گلي جي سير ڪئي ۽ ڪاروباري پريزنٽيشنن ۾ پڻ شرڪت ڪئي. ان کان پوءِ 29 جون جي منجهند جو هو ڪار ذريعي لاهور روانا ٿيا.
شڪايت موجب، جوابدار عورتن کي پنهنجي هڪ مائٽ جي سالگرهه ملهائڻ جو بهانو بڻائي لاهور جي هڪ جديد گهر ۾ وٺي ويو، پر گهر اندر داخل ٿيڻ تي کين اهو مڪمل خالي نظر آيو.
رڳو پندرهن منٽن اندر چار هٿياربند ماڻهو، جن وٽ بندوقون ۽ رسيون هيون، گهر ۾ گهڙي آيا. مبينا طور تي هنن ٻنهي عورتن جا هٿ پٺيان ٻڌي مٿن تشدد شروع ڪري ڇڏيو.
شڪايت ڪندڙ موجب، شروعات ۾ مرڪزي جوابدار پاڻ کي به اغوا ٿيل ظاهر ڪري پنهنجي ملوث هجڻ کي لڪائڻ جي ڪوشش ڪندو رهيو، پر پوءِ واضح ٿي ويو ته هو هٿياربند ٽولي سان ملي ڀڳت ۾ شامل هو.
هن الزام هنيو ته اغوا ڪندڙن شروعات ۾ 2 ملين آمريڪي ڊالر ڀُنگ طلب ڪيو ۽ ڌمڪي ڏني ته جيڪڏهن رقم نه ملي ته ٻنهي عورتن کي قتل ڪري سندن عضوا وڪڻي ڇڏيندا.
شڪايت ڪندڙ موجب، ٻنهي عورتن کي الڳ الڳ رکيو ويو. کيس هيٺئين ماڙ تي هٿياربند پهري هيٺ رکيو ويو، جڏهن ته سندس ساٿي کي مٿئين ماڙ تي قيد ڪيو ويو.
رات جو، هن ٻڌايو ته مرڪزي جوابدار ۽ سندس هڪ ساٿي، جنهن کي “باس” سڏيو پئي ويو، زبردستي سندس موبائل فون کسي سندس ڪرپٽو ڪرنسي اڪائونٽن مان 17 هزار آمريڪي ڊالر منتقل ڪري ورتا.
عورت موجب، کيس بار بار مجبور ڪيو ويو ته هوءَ پنهنجي گهرڀاتين ۽ دوستن کي وائس ميسيج موڪلي کين رقم موڪلڻ لاءِ التجا ڪري.
تنهن هوندي به، هن پنهنجي اڳواٽ طئي ٿيل هنگامي ڪوڊ لفظ “CARLITOS” پنهنجي پيغامن ۾ ڳجهي نموني شامل ڪري ڇڏيو، جنهن کان پوءِ يورپ ۾ موجود سندس گهرڀاتين فوري طور عالمي ۽ مقامي قانون لاڳو ڪندڙ ادارن کي اطلاع ڏنو.
30 جون تي، سندس چوڻ موجب، ڪاري رنگ جو مقامي لباس پهريل هڪ هٿياربند شخص کيس بيڊ روم ۾ جنسي زيادتي جو نشانو بڻايو.
پهرين جولاءِ تي مرڪزي جوابدار ٻنهي عورتن کي اهو چئي گاڏي ۾ ويهاريو ته هو کين هوائي اڏي تي وٺي وڃي رهيو آهي.
پر هالينڊ سان تعلق رکندڙ عورت ٻڌايو ته هن هڪ لڪيل موبائل فون ذريعي رستي تي نظر رکي ۽ محسوس ڪيو ته جوابدار ڄاڻي واڻي ڪوڙ ڳالهائي رهيو هو. هو آهستي گاڏي هلائيندي “باس” سان مشڪوڪ نموني رابطي ۾ هو.
اهو خدشو پيدا ٿيڻ تي ته شايد کين ڪنهن ٻي جاءِ تي منتقل ڪيو پيو وڃي، ٻنهي عورتن زور زور سان رڙيون ڪرڻ شروع ڪيون ۽ گاڏي روڪڻ جو مطالبو ڪيو.
جڏهن سندن گاڏي اڳيان ويندڙ هڪ ٻي گاڏي سان معمولي ٽڪرائجي وئي، ته ٻنهي عورتن ان موقعي مان فائدو وٺندي هلندڙ گاڏي مان ٽپو ڏئي ٻاهر نڪري ويون ۽ ڊوڙندي ڀرسان موجود هڪ مڪينڪ جي دڪان ۾ پناهه ورتي.
هالينڊ جي عورت موجب، هڪ مقامي ٽريفڪ پوليس اهلڪار عورتن کي ڏسي فوري طور وڌيڪ پوليس گهرائي. سخت ذهني صدمي سبب ٻنهي عورتن شروعات ۾ خوف وچان پوليس جي پهرين گاڏي مان به ڀڄڻ جي ڪوشش ڪئي.
بعد ۾ پوليس جا سينيئر آفيسر ۽ هڪ عورت پوليس اهلڪار پهتا، جن عورتن کي اعتماد ۾ وٺندي کين ثبوت ڏيکاريا ته قانون لاڳو ڪندڙ ادارا گذريل 48 ڪلاڪن کان سندن اغوا واري ڪيس جي جاچ ڪري رهيا هئا.
ان کان پوءِ ٻنهي عورتن کي محفوظ نموني ٿاڻي منتقل ڪيو ويو، جتي سندن سرڪاري بيان قلمبند ڪيا ويا.
متاثر عورت طرفان واضح تصديق ڪرڻ کان پوءِ ته هن بنا ڪنهن دٻاءُ جي پنهنجي مرضي سان بيان ڏنو آهي، عدالتي مئجسٽريٽ اهو بيان سيل ڪري جوابدارن خلاف قانوني ڪارروائي اڳتي وڌائڻ جو حڪم ڏنو.
ٻي متاثر عورت، جيڪا وينزويلا جي شهري آهي، پڻ الڳ بيان قلمبند ڪرايو، جيڪو هالينڊ جي عورت جي بيان سان گهڻي حد تائين هڪجهڙو هو ۽ سندس بيان جي تصديق ڪندو هو.
40 ورهين جي هن عورت ٻڌايو ته سندس به مرڪزي جوابدار سان پهرين ملاقات سنگاپور ۾ ڪرپٽو ڪرنسي بابت هڪ تقريب دوران ٿي هئي. هن جي ڳالهين تي اعتبار ڪندي، هن ۽ سندس ساٿي ساڻس گڏ ڪاروباري ڀائيواري شروع ڪئي.
سندس چوڻ موجب، جوابدار پاڻ کي حڪومت جي هڪ اعليٰ وزير جو پٽ ظاهر ڪندو هو ۽ هڪ پيغام رساني واري ايپ تي پنهنجي پروفائل تصوير ۾ پاڻ کي اڳوڻي وزيراعظم سان گڏ ڏيکاريندو هو، جنهن سان هن پنهنجي ساک مضبوط بڻائي.
انهن ڳالهين تي اعتبار ڪندي ٻئي عورتون پاڪستان اچڻ تي راضي ٿيون. پر پاڪستان پهچڻ کان پوءِ کين هڪ ويران رهائشگاهه تي وٺي وڃي هٿ ٻڌي قيد ڪيو ويو.
قيد دوران، هن الزام هنيو ته مرڪزي جوابدار بار بار سندس ڪمپيوٽر تائين رسائي ۽ مالي اثاثن بابت پڇا ڳاڇا ڪندو رهيو ۽ ڌمڪيون ڏيندو رهيو ته جيڪڏهن گهربل رقم نه ملي ته ٻنهي عورتن کي قتل ڪيو ويندو.
متاثر عورت وڌيڪ الزام هنيو ته قيد دوران سندن مسلسل هراسان ڪيو ويو ۽ اتي موجود ٻن ماڻهن ساڻس جنسي زيادتي ڪئي.
سندس چوڻ موجب، اغوا ڪندڙن کين ٽٽل شيشي جا ٽڪرا ڏيکاري جسماني نقصان پهچائڻ جون به ڌمڪيون ڏنيون.
هن دعويٰ ڪئي: “اتي هڪ ٻيو شخص به هو، جيڪو بندوقون کڻي هلندڙ ٻين ماڻهن کان مختلف هو ۽ تمام سٺي انگريزي ڳالهائيندو هو.”
